សៀមរាប ៖ រដ្ឋបាលខេត្តសៀមរាប បានឲ្យដឹងថា ឆ្លងតាមគណៈកម្មការត្រួតពិនិត្យ និង ធ្វើការដាក់ពិន្ទុ ដល់បងប្អូនជាបេក្ខជនមានអាជីពអ្នកអាំងមាន់ឆ្ងាញ់លក់ មកពីបណ្តាក្រុង ស្រុកទាំង១២ លទ្ធផល នៃការប្រកួតមាន់អាំងឆ្ងាញ់នៅខេត្តសៀមរាប ទទួលបានជ័យលាភីលេខ១ ទៅលើស្រុកបន្ទាយស្រី ,ជ័យលាភីលេខ២ បានទៅលើស្រុកសូទ្រនិគម និង ជ័យលាភីលេខ៣ បានទៅលើក្រុងសៀមរាប។
សូមបញ្ជាក់ថា នៅរសៀលថ្ងៃពុធ ទី១៩ ខែសីហា ឆ្នាំ២០២០ រដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជាខេត្ត ដោយមានការចូលរួមពីមន្ទីរ អង្គភាព និង អាជ្ញាធរក្រុង ស្រុកទាំង១២ បានរៀបចំពិធីប្រកួតមាន់អាំងឆ្ងាញ់ តាមបណ្តាក្រុង ស្រុក ទាំង១២ ដើម្បីបង្ហាញជូនដល់ភ្ញៀវជាតិ អន្តរជាតិ ក្រោមអធិបតីភាពរបស់សម្តេចពិជ័យ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តសៀមរាប និង ឯកឧត្តម អ៊ឹង ហឿន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាល នៃគណៈអភិបាលខេត្តនិង លោកជំទាវ ដោយមានការអញ្ជើញ ចូលរួមពីឯកឧត្តម លោកឧកញ៉ា លោកជំទាវ សមាជិកសមាជិកាក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាព សមាជិកសហភាពសហព័ន្ធយុវជនកម្ពុជា អាជ្ញាធរក្រុង ស្រុក មន្ត្រីរាជការ កងកម្លាំងទាំងបីនិង បងប្អូនប្រជាពលរដ្ឋចូលរួមយ៉ាងច្រើនកុះករ នៅបរិវេណសួនច្បារព្រះរាជដំណាក់សៀមរាបផងដែរ ។
តាមសេចក្តីរាយការណ៍របស់លោក ភឿន គឹមលី ប្រធានមន្ទីរពាណិជ្ជកម្មខេត្ត បានឲ្យដឹងអំពីលក្ខខណ្ឌនៃការប្រកួតមាន់អាំងនេះ ដោយមានរៀបចំគណៈកម្មការត្រួតពិនិត្យ ដាក់ពិន្ទុ និង ភ្លក្សរសជាតិផងដែរ ។ នៅក្នុងលក្ខខណ្ឌប្រកួតនោះ ដោយបានពិនិត្យទៅលើសោភ័ណភាព អនាម័យ របៀបផ្សំគ្រឿង ប្រភពនៃមាន់ (មាន់ស្រែ ឬ កសិកម្ម ) និង រសជាតិទៀតផង។
កម្មវិធីសម្រាកសៀមរាបនាពេលនេះ ជាការផ្តល់ឱកាសក្នុងការលើកកម្ពស់ និង ជំរុញនូវផលិតផលក្នុងស្រុក ក៏ដូចជាការ ជំរុញជីវភាពរស់នៅរបស់ប្រជាពលរដ្ឋនៅក្នុងខេត្តសៀមរាប ។ ក្នុងកម្មវិធីប្រកួតពានរង្វាន់មាន់អាំងឆ្ងាញ់ជាងគេនៅក្នុងខេត្តសៀមរាបដែលរៀបចំឡើង ដោយសមាគមចុងភៅកម្ពុជាខេត្តសៀមរាប ដោយមានការអញ្ជើញចូលរួមប្រកួតយ៉ាងច្រើនកុះករ ពីសំណាក់បងប្អូនប្រជាពលរដ្ឋ ក៏ដូចជាចុងភៅចំណានៗ ជាច្រើនរូបផងដែរ ។
ជាមួយគ្នានេះផងដែរ ការរៀបចំកម្មវិធីប្រកួតពានរង្វាន់មាន់អាំងឆ្ងាញ់ជាងគេខេត្តសៀមរាប នាពេលនេះ រៀបចំឡើងក្នុងគោលបំណង បង្ហាញនូវស្នាដៃ នៃការអាំងមាន់ របស់ចុងភៅគ្រប់តំបន់ក៏ដូចជារូបមន្តពិសេសខុសៗគ្នាជាច្រើនទៀត ព្រមទាំងបានដាក់តាំងបង្ហាញ សម្រាប់ឲ្យបងប្អូនប្រជាពលរដ្ឋខ្មែរគ្រប់ស្រទាប់វណ្ណៈបានចូលរួមទស្សនា និង ភ្លក្សនូវរសជាតិដ៏ឈ្ងុញឆ្ងាញ់ពិសា នូវមាន់អាំងពីគ្រប់តំបន់ក្នុងខេត្តសៀមរាប ៕ដោយ៖កូឡាប