កំពត៖ក្នុងថ្ងៃឈប់សម្រាកពេញ១សប្តាហ៍នេះ ឃើញថាបងប្អូនប្រជាពលរដ្ឋខ្មែរយ៉ាងច្រើនកុះករ បានសម្រុកធ្វើដំណើកម្សាន្តស្ទើរគ្រប់ទិសទី ដែលក្នុងនោះមានទីកន្លែងកម្សាន្តសំខាន់ៗដូចជា ទឹកដីខេត្តសៀម ខេត្តមណ្ឌលគិរី កំពង់សោម កំពត និងទីកន្លែងផ្សេងៗទៀត នៅក្នុងព្រះរាជាណាចក្រកម្ពុជា។
ទោះយ៉ាងណា អ្វីដែលគួរឲ្យសោកស្តាយ និងនឹកស្មានមិនដល់នោះ គឺមានករណីចោរឆ្លៀតឱកាសនិយម បានធ្វើសកម្មភាពវាយកម្ទេចកញ្ចក់រថយន្តស៊េរីទំនើប១គ្រឿង ប្រមូលយករបស់របស់ឥវ៉ាន់ក្នុងឡានភ្ញៀវទេសចរឡើងខ្ទេចតែម្តង ខណៈម្ចាស់ទៅមើលទឹកធ្លាក់តែមួយភ្លែត នៃរមណីដ្ឋានជ្រោះទឹកធ្លាក់ពពកវិល ដែលមានទីតាំងស្ថិតនៅលើកំពូលភ្នំបូកគោ ក្នុងទឹកដីខេត្តកំពត។
នេះបើយោងតាមគណនីហ្វេសប៊ុកឈ្មោះ Phannath Nat ដែលជាម្ចាស់ឡានរងគ្រោះ បានបង្ហោះរូបភាព និងសរសេរបញ្ជាក់កាលពីរសៀលថ្ងៃទី១៨ ខែសីហា ឆ្នាំ២០២០ ឲ្យដឹងថា៖ «ចោរវាយកញ្ចក់ឡានយកអីវ៉ាន់ខ្ទេច ទឹកធ្លាក់ពពកវិល ភ្នំបូកគោ ចូលមើលទឹកធ្លាក់តែមួយភ្លែតសោះ»។
តាមរយៈរូបភាពនេះផងដែរ សូមបងប្អូនទាំងអស់គ្នា ធ្វើដំណើរកម្សាន្តដោយការប្រុងប្រយ័ត្ន មិនថាទាំងការធ្វើដំណើរនៅលើដងផ្លូវទាំងទៅនិងមក និងថែរក្សាសុខភាពពីកូវីដ១៩ ប៉ុណ្ណោះទេ គឺត្រូវប្រយ័ត្នប្រយែងរបស់ទ្រព្យមានតម្លៃ ដាក់ក្នុងរថយន្តរថយន្តផង ព្រោះថាសូម្បីតែទីកន្លែងមានសន្តិសុខយាមកាម ក៏ចោរឆ្លៀតឱកាសនិយមអាចធ្វើសកម្មភាពបែបនេះបានដែរ៕ ដោយ៖ លឹម ហុង