ភ្នំពេញ៖ លោកសួន សេរីរដ្ឋា អតីតប្រធានគណបក្សអំណាចខ្មែរ បច្ចុប្បន្នជារដ្ឋលេខាធិការក្រសួងអភិវឌ្ឍន៍ជនបទ បានសរសេរសារលើហ្វេសប៊ុកថា លទ្ធផលស្ទង់មតិរបស់ Comfrel ដើម្បីបំបះបំបោរសតិអារម្មណ៍ពលរដ្ឋឲ្យប្រឆាំងនឹងការអនុវត្តន៍ច្បាប់របស់រដ្ឋាភិបាល ត្រូវបរាជ័យ ។
ជាអង្គការសម្ព័ន្ធសង្គមស៊ីវិល ដែលបានជ្រើសរើសបេសកម្មរបស់ខ្លួនដើម្បីឃ្លាំមើលនឹងតាមដានត្រឹមតែការបោះឆ្នោតឲ្យមានសេរីនិងយុត្តិធម៌ ប៉ុណ្ណោះ តែ Comfrel បានដើរហួសពីបន្ទាត់បេសកម្មរបស់ខ្លួន ទៅធ្វើកាស្ទង់មតិតាម Page Comfrel របស់ខ្លួន ពីការចាប់ខ្លួនបុគ្គល រ៉ុង ឈុន ហើយក៏បានទទួលលទ្ធផលយ៉ាងអាម៉ាស់ដែរ ចំពោះការតាំងសំណួរឲ្យសាធារណៈឆ្លើយថា ត្រូវច្បាប់ឬអត់ ដែលចាប់ខ្លួនបុគ្គល រ៉ុង ឈុន ?
ការចាប់ខ្លួន រ៉ុង ឈុន វាមិនមែនជារឿងបោះឆ្នោត សេរី ឬយុត្តិធម៌ ដែរឬអត់ដែល Comfrel ត្រូវឃ្លាំមើល ឬត្រូវធ្វើការស្ទង់មតិនោះទេ ! តែវាជារឿងអនុវត្តច្បាប់សុទ្ធសាត ដែលរដ្ឋាភិបាលមានកាតព្វកិច្ចពង្រឹងនីតិរដ្ឋ និងលុបបំបាត់នូវវប្បធម៌រួចទោសនៅក្នុងប្រទេស ។
តែចរឹតស្ទាបស្ទងមតិរបស់ Comfrel ដែលបោះសំណួរជាសាធារណៈ ដោយផ្តោតយកចម្លើយតែ ២ មកឲ្យអ្នកឆ្លើយធ្វើការជ្រើសរើសគឺ ត្រូវច្បាប់ ឬមិនត្រូវច្បាប់នោះ គឺមិនត្រឹមតែកំពុងដើរហួសបន្ទាត់បេសកម្មអង្គការបស់ខ្លួន ដែលបានដាក់ដំកលលក្ខន្តិកៈនៅក្រសួងមហាផ្ទៃនោះទេ តែវាគឺជាចរឹតប្រឆាំងការអនុវត្តន៍ច្បាប់របស់រដ្ឋាភិបាល និងជាជាចេតនាបំបះបំបោរសតិអារម្មណ៍ពលរដ្ឋឲ្យងើបឡើងប្រឆាំងនឹងការចាប់ខ្លួនបុគ្គល រ៉ុង ឈុន ក្នុងគោលបំណងបម្រើនយោបាយទុច្ចរឹតរបស់ខ្មោចគណបក្សសង្គ្រោះជាតិ ដែលមាន សម រង្ស៊ី កំពុងដេកចាំថ្នូរ ។
មានតែក្រុមអ្នកនយោបាយអាណាធិបតេយ្យប៉ុណ្ណោះ ដែលប្រើវិធីសាស្ត្របែប អាណាធិបតេយ្យ បញ្ឆេះកំហឹងពលរដ្ឋឲ្យចេញមកទាមទាររំដោះជនសង្ស័យឲ្យរួចផុតពីអំណាចតុលាការ ។
ក្នុងប្រទេសមានច្បាប់ ហើយកំពុងកែទម្រង់ដើម្បីពង្រឹងនីតិរដ្ឋ គឺមិនត្រូវឲ្យពួកក្រុមអ្នកនយោបាយអាណាធិបតេយ្យអស់រស់នៅក្រៅរង្វង់ច្បាប់ ធ្វើអ្វីស្រេចតែចិត្តនោះឡើយ… យើងគោរពសិទ្ធិសំដែងមតិរបស់ពលរដ្ឋ តែត្រូវសំអាតពួកអ្នកនយោបាយអាណាធិបតេយ្យ ដែលបន្លំខ្លួនចូលទៅស្រែកបញ្ឆេះកំហឹងពលរដ្ឋ កេងយកចមុខមាត់ យកចំណេញនយោបាយ ក្នុងវេទិកាសំដែងមតិរបស់ពលរដ្ឋ ។
អ្នកនយោបាយអាណាធិបតេយ្យ ដែលចូលចិត្តបន្លំខ្លួនចូលស្រែកស៊ីឡាក់ក្នុងហ្វូងវេទិកាសំដែងមតិរបស់ពលរដ្ឋ ហើយដែលចូលចិត្តប្រើវិធីសាស្ត្រអាណាធិបតេយ្យបំផ្លាញសណ្តាប់ធ្នាប់សង្គម ត្រូវតែប្រមូលយកទៅដាក់កន្លែងឲ្យគេមើលថែអប់រំ ៕ ដោយ ៖ កូឡាប
