ខេត្តបន្ទាយមានជ័យ៖លោកជំទាវម៉ៅ ម៉ាល័យ កែ គឹមយ៉ាន បានសរសេរសារលើហ្វេសប៊ុកថា ស្រណោះជើង ស្ពាន ទឹកថ្លាណាស់ គេកាយយកដី ជិតដាច់ហើយ សូមលោកមន្ត្រីដែលមាន តួនាទី ជួយមើលៗផង ពីព្រោះស្ពាននេះ ឯកឧត្ដម កែ គឹមយ៉ាន លោកខំ អភិរក្សទុកឲ្យក្មេងជំនាន់ក្រោយបានស្គាល់។
ករណីនេះ អាជ្ញាធរក្រុង រួមជាមួយកងកម្លាំងសមត្ថកិច្ច ចុះឃាត់គ្រឿងចក្ររបស់ ឈ្មួញ ដែលបានកំពុងធ្វើសកម្មភាពជីកកកាយយកអាចម៍ដី ក្នុងផ្ទៃបាតស្ទឹងសរីសោភ័ណ ជាប់ទីតាំងក្បាលស្ពានទឹកថ្លា(ស្ពានដែកពីសង្គម) ដោយគ្មានការអនុញ្ញាត ច្បាប់ត្រឹមត្រូវ មករក្សាទុកជាបណ្តោះអាសន្ននៅប៉ុស្តនគរបាលរដ្ឋបាលសង្កាត់ទឹកថ្លា។
រដ្ឋបាលខេត្តបន្ទាយមានជ័យ នៅថ្ងៃទី២០ ខែសីហា ឆ្នាំ២០២០ សូមជូនជម្រាដល់សាធារណមតិ និងបណ្តាញផ្សព្វផ្សាយថា ថ្ងៃនេះក្រោយទទួលព័ត៌មានរាយការណ៍ពី អាជ្ញាធរក្រុងសិរីសោភ័ណ ឯកឧត្តមអភិបាលខេត្ត បានបញ្ជាឲ្យអាជ្ញាធរក្រុង រួមជាមួយកងកម្លាំងសមត្ថកិច្ច ចុះឃាត់គ្រឿងចក្ររបស់ ឈ្មួញ ដែលបានកំពុងធ្វើសកម្មភាពជីកកកាយយកអាចម៍ដី ក្នុងផ្ទៃបាតស្ទឹងសរីសោភ័ណ ជាប់ទីតាំងក្បាលស្ពានទឹកថ្លា(ស្ពានដែកពីសង្គម) ដោយគ្មានការអនុញ្ញាត ច្បាប់ត្រឹមត្រូវ មករក្សាទុកជាបណ្តោះអាសន្ននៅប៉ុស្តនគរបាលរដ្ឋបាលសង្កាត់ទឹកថ្លា ។
កន្លងមកក្នុងកិច្ចប្រជុំគណៈបញ្ជាការឯកភាពខេត្ត ឯកឧត្តម អ៊ុំ រាត្រី អភិបាលខេត្ត ប្រធានអង្គប្រជុំ ធ្លាប់បានណែនាំដល់ជំនាញធនធានទឹកខេត្ត និងអាជ្ញាធរក្រុង សង្កាត់ឲ្យចុះពិនិត្យមើលណែនាំដល់ក្រុមឈ្មួញខាងលើ ឲ្យឈប់សកម្មភាពកាយ តែនៅតែលួចបន្តធ្វើសកម្មភាពមក ។
ស្របពេលក្នុងឱកាសថ្ងៃសម្រាកសងបុណ្យចូលឆ្នាំ មន្ត្រីរាជការឈប់សម្រាក ជាក់ស្តែងថ្ងៃទី២០ សីហា ឆ្នាំ២០២០នេះ សកម្មភាព នៃការជីកកកាយបានធ្វើឲ្យរាល់ដាលកាន់តែខ្លាំងដល់ចំណុចសសរជើងស្ពានដែកដែលបន្សល់ទុកពីសម័យសង្គមមក ដែលបច្ចុប្បន្នថ្នាក់ដឹកនាំខេត្ត ពិសេសឯកឧត្តមឧបនាយករដ្ឋមន្ត្រី កែ គឹមយ៉ាន និងលោកជំទាវ លោកបានយកចិត្តទុកដាក់ ធ្វើការរក្សាអភិរក្សរៀបចំកែលម្អទុក កូនចៅជំនាន់ក្រោយបានឃើញ។
ជាមួយគ្នានេះក្នុងឆ្នាំ២០១៩កន្លងមកដោយគំនិតចង់អភិរក្សរក្សាការពាររៀបចំបន្ថែមនោះ ឯកឧត្តម អ៊ុំ រាត្រី ក្នុងនាមរដ្ឋបាលខេត្ត បានប្រើប្រាស់ថវិកាអភិវឌ្ឍន៍ខេត្តរៀបចំឲ្យមានជាសួនផ្កាចម្រុះ និងភ្លើងបំភ្លើពេលរាត្រី នៅម្ខាងស្ពានក៍មានរៀបចំជាសួន និងរូបសំណាកលោកយាយសំផងដែរ ។
ក្នុងនាមរដ្ឋបាលខេត្តសូមបញ្ជាក់ជូនសាធារណៈមតិ និងបណ្តាញផ្សព្វផ្សាយទាំងអស់មេត្តាជ្រាបថា ជុំវិញករណីខាងលើនេះ ខេត្តមិនបានអនុញ្ញាត្តឲ្យមានការជីកកកាយយ៉ាងអនាធិបតេយ្យដូចពាក្យចោតប្រកាន់ បំភ្លើស បំផ្លៃផ្ទុយពីការពិត និងចោតរិះគន់មកលើអាជ្ញាធរខេត្ត ឯកឧត្តម អភិបាលខេត្ត ថាមានការអនុញ្ញាតនោះ។
ផ្ទយទៅវិញឯកឧត្តមអភិបាលខេត្តបានដឹកនាំគិតគូររៀបចំឲ្យមានសួនច្បារ ភ្លើងបំភ្លឺ និង ហើយថ្ងៃនេះក្រោយទទួលបានព័ត៌មាន សេចក្តីរាយការណ័របស់លោកហ៊ឹល រ៉ាយ៉ា អភិបាលភ្លាមៗ លោកបានបញ្ជាឲ្យចុះឃាត់គ្រឿងចក្រដែលកំពុងធ្វើសកម្មភាពជាបណ្តោះអាសន្ន។
សូមបញ្ជាក់ថា នៅវេលាម៉ោង១២និង៥០នាទីថ្ងៃទី២០ ខែសីហា ឆ្នាំ២០២០ លោក ហ៊ឹល រ៉ាយ៉ា អភិបាលក្រុងសិរីសោភ័ណ បានដឹកនាំកងកំលាំងប្រដាប់អាវុធ និងមន្ត្រីជំនាញចុះឃាត់គ្រឿងចាក់កាយដីខុសច្បាប់ របស់ឈ្មោះ អ៊ឹង ទន់ហួរ ចាក់ដីលុបស្ទឹង និងកាយដីជិតបាក់ជើងស្ពាន នៅត្រង់ចំណុចគល់ស្ពានទឹកថ្លា ភូមិទឹកថ្លា សង្កាត់ទឹកថ្លា យកមករក្សាទុក្ខនៅប៉ុស្ត៏នគរបាល សង្កាត់ទឹកថ្លា ដើម្បីដោះស្រាយតាមផ្លូវច្បាប់ ។ សម្ភាររួមមាន អេស្កាកាយដីចំនួន៣គ្រឿង ឡានដឹកដីចំនួន៧គ្រឿង ត្រាក់ទ័ឈូសដីចំនួន១គ្រឿង។
យោងតាមប្រវត្តិស្រាវជ្រាវបានឲ្យដឹងថា ស្ពានដែកថែបទាំងបន្ទះតាប់ជាអក្សរUVHLជាកេរ្តិ៍សម័យអាណានិគមនិយមបារាំង នៅសល់រូបរាងដើមតែមួយគត់លើបណ្តោយផ្លូវជាតិលេខ៥នោះគឺស្ពានទឹកថ្លា ស្ថិតនៅក្បាលស្ទឹងសិរីសោភ័ណនាភូមិ-សង្កាត់ទឹកថ្លា ខាងលិចក្រុងសិរីសោភ័ណ ៦គីឡូម៉ែត្រ។
ស្ពាននេះ កសាងនៅឆ្នាំ១៩៣១ ជាពេលកសាងផ្លូវជាតិលេខ៥ (ភ្នំពេញ-ប៉ោយប៉ែត ប្រវែង៤០៨ គីឡូម៉ែត្រ) ដែរ។ ស្ពានដែកដូចគ្នានេះខ្លះទៀត មានរាប់ទាំងស្ពានសែសិន ឆ្លងស្ទឹងសិរិសោភ័ណ ប៉ែកខាងត្បូង ត្រូវររុះរើចេញអស់នៅពេលគេស្តារ និងស្ថាបនាផ្លូវជាតិលេខ៥ឡើងវិញកន្លងមក។ ប៉ុន្តែសម្រាប់ស្ពានដែកនៅទឹកថ្លានេះ ក្រសួងសាធារណការ និងរាជរដ្ឋាភិបាល បានរក្សាទុកតាមសំណើរបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ។
ក្នុងនោះសម្តេចតេជោ ហ៊ុន សែន នាយករដ្ឋមន្ត្រី ក៏បានថ្លែងគាំទ្រសំណើរក្សាទុកស្ពានដែកថែប នៅទឹកថ្លានោះ ហើយត្រូវ សង់ស្ពានថ្មថ្មីនៅប្របស្របគ្នានោះវិញគឺសម្តេចថ្លែង កាលពីសម្តេចអញ្ជើញសម្ពោធដាក់ឲ្យប្រើប្រាស់ សាកលវិទ្យាល័យមានជ័យ ដែលស្ថិតនៅជិតស្ពាននោះ កាលពីថ្ងៃទី៤ ខែមេសា ឆ្នាំ២០០៨ ។ ហើយសម្តេចតេជោក៏ចាប់អារម្មណ៍យ៉ាងខ្លាំងលើរូបថត១សន្លឹករបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ដែលឈរស្ពាយកាំភ្លើងនៅមុខស្ពានដែក ទឹកថ្លានេះថាជាអនុស្សាវរីយ៍ ដូចជាកងទព័យាមការពារស្ពានម្នាក់ នាសម័យសាធារណរដ្ឋប្រជាមានិតុកម្ពុជា ៕ ដោយ៖កូឡាប