ព្រះសីហនុ កែប ៖ លោក សោម ពិសិដ្ឋ អភិបាលនៃគណ:អភិបាលខេត្តកែប នាព្រឹកថ្ងៃទី១៧ ខែសីហា ឆ្នាំ២០២០ បានដឹកនាំមន្ត្រីជំនាញនិងយុវជនចុះត្រួតពិនិត្យការរៀបចំជញ្ជីងយុត្តិធម៌នៅផ្សារក្តាមដើម្បីទទួលបានតម្លាភាពទាំងអ្នកទិញទាំងអ្នកលក់។
ការចុះត្រួតពិនិត្យនេះ ត្រូវបានធ្វើឡើងគឺស្របពេលដែលភ្ញៀវទេសចរ បានសម្រុកទៅលេងខេត្តកែប យ៉ាងច្រើនកុះករ ក្នុងអំឡុងពេលថ្ងៃឈប់សម្រាកសងនាថ្ងៃចូលឆ្នាំខ្មែរប៉ុន្មានថ្ងៃនេះ និងជាពិសេសគឺតែងតែលេចឮពាក្យភ្ញៀវទេសចររអ៊ូរទាំថា អាជីវករនៅផ្សារក្តាមខេត្តកែប លក់ដូរកោរភ្ញៀវមិនដាក់ទឹក ហើយថ្លឹងគីឡូឲ្យភ្ញៀវមិនគ្រប់គីឡូទៀត។
ទន្ទឹមនោះផងដែរ លោកអភិបាលខេត្តកែប ក៏បានបញ្ជាក់ឲ្យដឹងថា ក្នុងករណីដែលមន្ត្រីជំនាញរកឃើញថា មានអាជីវកររូបណាលក់ដូរទំនិញឲ្យភ្ញៀវ បានកេងបន្លំមិនគ្រប់គីឡូ អាជីវកររូបនោះនឹងទទួលនូវការពិន័យពីរដ្ឋបាលខេត្ត ឬបិទកន្លែងអាជីវកម្ម និងអាចទទួលខុសត្រូវជាមួយច្បាប់ទៀតផង។
ដោយឡែក លោក គួច ចំរើន អភិបាលខេត្តព្រះសីហនុវិញ បានសង្កត់ធ្ងន់ៗនៅលើបណ្តាញសង្គមហ្វេសប៊ុកយ៉ាងដូច្នេះថា៖ «នៅតែមានត្រីងៀតឆ្លៀតពង ជូនដំណឹងហើយ ណែនាំហើយ កុំកោរភ្ញៀវ ឆ្នេរសាធារណៈទេ នៅតែបំពានជួលថ្លៃហួសកំណត់ មានតែបញ្ឈប់កុំឲ្យនៅជួលទៀត»។
សូមបញ្ចាក់ថា ការលើកឡើងបែបនេះរបស់លោកអភិបាលខេត្តព្រះសីហនុ គឺក្រោយលេចធ្លាយព័ត៌មានថា អាជីវកបានជួលពោងធំឲ្យភ្ញៀវក្នុងតម្លៃសេវា ១ ម៉ឺនរៀល ខណៈពោងតូចតម្លៃសេវា ៧ ពាន់រៀល៕ ដោយ៖ លឹម ហុង