មេដឹកនាំកំពូលកូរ៉េខាងជើងលោក គីម ជុងអ៊ុន បានប្រកាសថា ប្រទេសរបស់លោកមិនទទួលជំនួយពីខាងក្រៅនោះឡើយ បើទោះបីជាប្រទេសខ្លួនបាននិងកំពុងទទួលរងគ្រោះធ្ងន់ធ្ងរ ដោយសារតែទឹកជំនន់ក៏ដោយ។
ទីភ្នាក់ងារសារព័ត៌មានផ្លូវការរបស់កូរ៉េខាងជើងបានដកស្រង់សំដីមេដឹកនាំ គីម ជុងអ៊ុន ក្នុងកិច្ចប្រជុំបន្ទាន់មួយរបស់គណៈកម្មាធិការកណ្តាលនៃគណបក្សពលករកូរ៉េ ដោយលោក គឹមបានសង្កត់ធ្ងន់ថា៖ «ក្នុងស្ថានភាពវីរុស Covid-19 កំពុងរីករាលដ៏អាក្រក់ នៅទូទាំងសកលលោក ហេតុនេះ យើងមិនអនុញ្ញាឲ្យទទួលជំនួយពីខាងក្រៅណាមួយ សម្រាប់ការខូចខាតដោយសារគ្រោះមហន្តរាយទឹកជំនន់នេះទេ ប៉ុន្តែ ត្រូវបានបិទព្រំដែន និងអនុវត្តការងារប្រឆាំងទប់ស្កាត់វីរុសការរាតត្បាតនេះយ៉ាងតឹងរ៉ឹង»។
សូមបញ្ជាក់ថា គ្រោះទឹកជំនន់យ៉ាងធ្ងន់ធ្ងរដោយសារភ្លៀងធ្លាក់យ៉ាងគំហក់នៅទូទាំងប្រទេសចាប់តាំងពីថ្ងៃទី១ ដល់ថ្ងៃទី ៦ ខែសីហា បានបំផ្លាញផលដំណាំ ៣៩,២៩៦ ហិកតា, ផ្ទះសម្បែងចំនួន ១៦,៦៨០ ខ្នង និងព្រមទាំងអគារសាធារណៈប្រមាណ ៦៣០ ផងដែរ នៅទូទាំងប្រទេស។ តែយ៉ាងណា មិនមានសេចក្តីរាយការណ៍អំពីគ្រោះថ្នាក់ដល់មនុស្សក្នុងតំបន់នោះទេ ។ នេះបើយោងតាមបាយការណ៍ KCNA។
ទន្ទឹមនោះផងដែរ លោក គីម ជុងអ៊ុន ដែលកំពុងស្ថិតនៅក្នុងតំបន់រងគ្រោះ ជាមួយរថយន្តប្រណីតដែលគេសន្មត់ថា Lexus LX 570 បានបញ្ជាឱ្យអាជ្ញាធរមូលដ្ឋានគិតគូរផ្តល់អាហារ ថ្នាំសង្កូវ និងសំភារៈចាំបាច់ផ្សេងៗទៀត ដល់ប្រជាជនដែលរងគ្រោះដោយទឹកជំនន់។
គួរបញ្ជាក់ផងដែរថា ក្រុមប្រឹក្សាសន្តិសុខជាតិ បានហាមឃាត់ការនាំចេញទំនិញប្រណីតទៅកាន់ប្រទេសកូរ៉េខាងជើង។ ប៉ុន្តែ លោក គីម ត្រូវបានគេមើលឃើញជិះរថយន្តទំនើបៗ ដែលកាលពីមុនៗមានទាំងរថយន្ត Mercedes-Benzes និង Rolls Royce ផងដែរ៕ ដោយ៖ លឹម ហុង