យោងតាម Youngster (thanhnien) កាលពីថ្ងៃទី១៩ ខែសីហា បុរសជនជាតិវៀតណាមម្នាក់ បានធ្វើឲ្យគ្រប់គ្នានៅក្នុងមន្ទីរពេទ្យ ភ្ញាក់ផ្អើលស្លុតរន្ធត់ខ្លាំងបំផុត បន្ទាប់ពីរូបភាពត្រូវបានបង្ហោះឡើង បង្ហាញគាត់ស្ថិតក្នុងស្ថានភាពឈឺចុកចាប់យ៉ាងខ្លាំង នៅលើហ្វ្រង់កាសង្គ្រោះបន្ទាន់ ខណៈដៃកាន់ពស់វែកដ៏ធំ១ក្បាល ដែលត្រូវបានគេដឹងថាវាបានចឹកគាត់។
ជុំវិញករណីដ៏សែនស្លុតរន្ធត់ ស្ទើរមិនគួរឲ្យជឿនេះ លោកវេជ្ជបណ្ឌិត ង្វៀនថៃប៊ិញ អនុប្រធានមន្ទីរពេទ្យនៅខេត្តតានិញ) បានបញ្ជាក់ពីការពិត និងបង្ហាញថា អ្នកជំងឺត្រូវបានបញ្ជូនទៅកាន់មន្ទីរពេទ្យជោរៃ (Cho Ray) ដើម្បីទទួលការព្យាបាលបន្ត។ ពស់ដែលបានវាយប្រហារគាត់ ត្រូវបានគេស្គាល់ថាជាស្តេចពស់វែកមានប្រវែង ៣ ម៉ែត្រ និងទម្ងន់ ៤,៥ គីឡូក្រាម។
បុរសរងគ្រោះមានឈ្មោះ P.V.T អាយុ ៣៨ ឆ្នាំ រស់នៅក្នុងភូមិ តានឡី ឃុំតានហ៊ុង ស្រុក តានចូ ខេត្តតៃនិញ ប្រទេសវៀតណាម។ គាត់ត្រូវបានក្រុមគ្រួសារដឹកមកសង្គ្រោះបន្ទាន់ នៅឯមន្ទីរពេទ្យទូទៅនៃខេត្តតាយញិញ នាវេលាម៉ោង ៨ នាទីព្រឹកថ្ងៃទី១៩ ខែសីហា ឆ្នាំ២០២០។
លោកវេជ្ជបណ្ឌិត ប៊ិញ បានបន្ថែមថា អ្នកជំងឺត្រូវបានអនុញ្ញាតឲ្យចូលមន្ទីរពេទ្យ ស្ថិតក្នុងសភាពដឹងខ្លួន ដកដង្ហើមធម្មតា ប៉ុន្តែ ជើងខាងស្តាំរបស់គាត់ប្រែជាពណ៌ស្វាយ និងមានឈាម។ ក្រុមគ្រូពេទ្យបានធ្វើការព្យាបាល និងសំអាតមុខរបួសជាមូលដ្ឋាន។
លោកវេជ្ជបណ្ឌិត ប៊ិញ នៅបានបន្ថែមឲ្យដឹងទៀតថា «ដំបូងឡើយ អ្នកជំងឺមានបង្ហាញស្មារតីមាំមួនណាស់ ប៉ុន្តែ ភ្លាមៗនោះ គាត់មានដង្ហើមខ្លីៗ ហើយត្រូវការជំនួយអុកស៊ីហ្សែន។ ការធ្វើរោគវិនិច្ឆ័យបានបង្ហាញថា គាត់មានជំងឺផ្លូវដង្ហើមដោយសារការខាំពីពស់វែកនោះ។ គាត់ត្រូវបានបញ្ជូនទៅមន្ទីរពេទ្យចោរៃភ្លាមៗ»។
យោងតាមសមាជិកគ្រួសារអ្នកជំងឺ បានឲ្យដឹងថា ប្រហែលជាម៉ោង ៧ និង ៣០ នាទី ព្រឹកថ្ងៃទី១៩ ខែសីហា នៅពេលធ្វើការនៅសួនច្បារមួយក្នុងស្រុកស៊ូយ៉ា លោក ធី បានរកឃើញពស់ ហើយគាត់ក៏សម្រេចចិត្តចាប់វា។ ទោះយ៉ាងណា ពស់នោះក៏ងាកទៅបុកភ្លៅខាងស្តាំរបស់គាត់តែម្តង។ បន្ទាប់ហេតុការណ៍នេះកើតឡើង គាត់បានចាប់ក្បាលពស់នោះ ហើយបានជូនដំណឹងនេះដល់ក្រុមគ្រួសារឲ្យនាំគាត់និងពស់ ទៅកាន់មន្ទីរពេទ្យ៕ ដោយ៖ លឹម ហុង
