បន្ទាយមានជ័យ ៖ រកឃើញមុខអ្នកជីកដីបំផ្លាញគល់ស្ពានទឹកថ្លាឃើញហើយ គឺលោក អ៊ឹង ប៊ុនហួរ ថៅកែឡានដឹកដី និង ជាថៅកែ ឡឥដ្ឋផង ដែលជីកកាយដីស្ទឹងទឹកថ្លា ក្បែរស្ពានដែក។
តើតាហួរពិតជាមានអំណាច កាយដីគល់ស្ពាន និង យកដីរដ្ឋធ្វើជាម្ចាស់កម្មសិទ្ធិតាមអំពើចិត្តឬ តើមានមន្ត្រីណាខ្លះឃុបឃិតគ្នាជាមួយតាហួរ ។
មិនយូរទេ ចម្លើយដោះសាររបស់មន្ត្រីពាក់ព័ន្ធ នឹងបំភ្លឺប្រាប់មហាជនថា អាជ្ញាធរធ្លាប់ណែនាំច្រើនសារហើយ ធ្វើម៉េចបើប្រាប់ហើយតាហួរមិនស្ដាប់ ធ្វើម៉េចតាហួរធ្វើចំថ្ងៃឈប់សម្រាក មន្ត្រីរាជការ ទូទាំងខេត្តបន្ទាយមានជ័យ រវល់សម្រាកដើរលេងអស់ហើយ ធ្វើម៉េចបើអត់ដឹងអី។
ក្រោយពីការកាយដីជិតដល់ជើងគល់ស្ពានដែកពីជំនាន់បារាំង ដែលស្ថិតក្នុងសង្កាត់ទឹកថ្លា ក្រុងសិរីសោភ័ណ គណៈបញ្ជាការឯកភាពក្រុងសិរីសោភ័ណ ដឹកនាំដោយលោក ហ៊ឹល រ៉ាយ៉ា អភិបាលក្រុងសិរីសោភ័ណ និងមានការចូលរួមពីលោក យ៉ាន់ សុវណ្ណ មេបញ្ជាការកងរាជអាវុធហត្ថក្រុងសេរីសោភ័ណ នៅវេលាម៉ោង១រសៀល ថ្ងៃទី២០ ខែសីហា ឆ្នាំ២០២០ បានចុះបង្ក្រាបរថយន្តដឹកដី ចំនួន៩គ្រឿង ត្រាក់ទ័រ១គ្រឿង អេសស្កា៣គ្រឿង ដែលកាយយកអាចម៍ដីពីមាត់ស្ទឹង និងចំណីស្ទឹងសិរីសោភ័ណយកទៅចាក់ដីរបស់ខ្លួន អង្កន់ដីលក់ត្រង់ចំណុចក្បាលស្ទឹងស្ពានទឹកថ្លា ក្នុងភូមិទឹក សង្កាត់ទឹកថ្លា ក្រុងសិរីសោភ័ណ ។
លោក ហ៊ឹល រ៉ាយ៉ា បានប្រាប់ឲ្យដឹងថា ៖ កន្លងមកលោកបានដឹកនាំរដ្ឋបាលក្រុងចុះបង្ក្រាប លោក អ៊ឹង ប៊ុនហួរ ម្តងរួចមកហើយ ព្រោះគាត់បានឲ្យកម្មករ និងគ្រឿងចក្ររបស់លោកកាយយកអាចម៍ដីពីមាត់ស្ទឹង និងចំណីស្ទឹងសិរីសោភ័ណរបស់រដ្ឋត្រង់ក្បាលស្ពានទឹកថ្លាក្នុងទំហំប្រមាណជិត៣០.០០០ម៉ែត្រក្រឡាដើម្បីយកធ្វើជាកម្មសិទ្ធិឯកជនម្តងរួចមកហើយ តែលោក អ៊ឹង ប៊ុនហួរ នេះនៅគឃ្លើនបានបន្តឲ្យកម្មករ និងគ្រឿងចក្ររបស់លោកកាយយកអាចម៍ដីពីមាត់ស្ទឹង និងចំណីស្ទឹងក្រុងសិរីសោភ័ណរបស់រដ្ឋ ត្រង់ក្បាលស្ទឹងស្ពានទឹកថ្លាបន្តទៀត ដោយមិនញញើតនិងច្បាប់ឡើយ។
លោក ហ៊ឹល រ៉ាយ៉ា បានប្រាប់ឲ្យដឹងថា អាជ្ញាធរជំនាញនឹងត្រូតពិនិត្យលម្អិតបន្ថែមទៀត លើសកម្មភាពរំលោភខាងលើ ហើយនឹងប្រើឧបករណ៍និយាមការភូមិសាស្ត្រ(GPS) ចុចផ្ទៀងផ្ទាត់ឲ្យបានជាក់លាក់
លោកអភិបាលក្រុង បានបញ្ជាក់ឲ្យដឹងទៀតថា លើកទី១លោកចុះបញ្ឈប់ឲ្យកាយ លើកទី២លោកចុះឃាត់រថយន្តដឹកដី៩គ្រឿង ត្រាក់ទ័រ១គ្រឿង និងម៉ែខូ ៣គ្រឿង ធ្វើកិច្ចសន្យា បើមានលើកក្រោយទៀត និងបញ្ជូនទៅតុលាការ ដើម្បីធ្វើទៅតាមនីតិវិធីច្បាប់៕
ដោយ៖កូឡាប