ខេត្តព្រៃវែង ៖ សាកសពស្ត្រីម្នាក់ ត្រូបានប្រទះឃើញនៅប្រឡាយទឹក មានលក្ខណៈស្អុយរលួយ ដែលគេសង្ស័យថាជាអំពើឃាតកម្ម ដោយមានស្នាមរបួសចំនួន ៣ កន្លែង បន្ទាប់ពីបុរសម្នាក់ បានជិះម៉ូតូមួយគ្រឿង មកដឹកជនរងគ្រោះចេញពីផ្ទះ ហើយក៏បាត់ដំណឹងសូន្យឈឹង។ ករណីកើតឡើង កាលពីថ្ងៃទី ២១ ខែសីហា ឆ្នាំ២០២០ វេលាម៉ោង ៧នឹង៣០ នៅចំណុចប្រឡាយទឹកស្ថិតភូមិស្វាយតានី ឃុំបឹងព្រះ ស្រុកបាភ្នំ ខេត្តព្រៃវែង។
សពជនរងគ្រោះឈ្មោះ ឌឹម ផង់ អាយុ២៦ ឆ្នាំ ជាមនុស្សសតិមិនប្រក្រតី រស់នៅភូមិតាពេជ្រត្បូង ឃុំរក្សជ័យ ស្រុកបាភ្នំ ខេត្តព្រៃវែង ។
តាមបណ្ដឹង របស់ឈ្មោះ អ៊ឹម ប៉ាង ភេទស្រី អាយុ៦៥ឆ្នាំ ជាម្ដាយជនរងគ្រោះ បានប្ដឹងសមត្ថកិច្ចថា នៅថ្ងៃទី១៩ ខែសីហា ឆ្នាំ២០២០ វេលាម៉ោងប្រហែល១៩និង៣០នាទី ឈ្មោះ អ៊ឹម រ័ត្ន ហៅឆ្អឹង ភេទប្រុស អាយុ២០ ឆ្នាំ រស់នៅភូមិប្រស្រែ ឃុំបឹងព្រះ ស្រុកបាភ្នំ និងបក្ខពួកពីរនាក់ទៀតបានឌុបជនរងគ្រោះ ជាមួយនឹងម៉ូតូមួយគ្រឿង ឆ្ពោះទៅទិសខាងកើត ហើយស្ត្រីជាម្តាយបានតាមរកជនរងគ្រោះ តែរកមិនឃើញ លុះដល់ថ្ងៃទី២១ ខែសីហា ឆ្នាំ២០២០ ប្រទះឃើញសាកសពក្នុងប្រឡាយទឹក ។
សមត្ថកិច្ចជំនាញកោសល្យវិច័យ និងគ្រូពេទ្យបានពិនិត្យសាកសព ឃើញមានស្នាមរបួស ចំនួន កន្លែង ៖ ១-ក្រោមភ្នែកខាងស្ដាំ ២-ចំកញ្ចប់មាត់ ៣-ចំច្រមុះ។ តាមការសន្និដ្ឋាន ជនរងគ្រោះស្លាប់ដោយអំពើឃាតកម្ម។ ករណីនេះសមត្ថកិច្ចបានកំណត់បានមុខសញ្ញា៕
ដោយ៖បញ្ញាស័ក្តិ
