ភ្នំពេញ៖ ដូចដែលប្រិយមិត្ត និងបងប្អូនប្រជាពលរដ្ឋជាច្រើនបានស្គាល់រួចហើយ ឯកឧត្តមបណ្ឌិត ម៉ុង ឫទ្ធី ដែលលោកគឺជាអ្នកឧកញ៉ាដ៏មានឈ្មោះល្បីមួយរូបនៅស្រុកខ្មែរ និងជាស្ថាបនិកក្រុមហ៊ុន ម៉ុង ឫទ្ធី គ្រុប ដោយផ្ដោតទៅលើវិស័យ ឧស្សហកម្ម និងកសិកម្ម ដែលមានបុគ្គលិករហូតដល់ទៅជិត១ម៉ឺននាក់ឯណោះ។
លោកឧកញ៉ាបណ្ឌិត ម៉ុង ប្ញទ្ធីបានឲ្យដឹងថា លោកមានសួនសត្វមួយកន្លែងនៅក្នុងឃុំសែនដីស្រុកសំរោងទង ខេត្តកំពង់ស្ពឺ ដែលកំពុងទទួលបានការចាប់អារម្មណ៍យ៉ាងខ្លាំងពីបងប្អូនខ្មែរយេីង ចូលទៅលេងកម្សាន្តមើលសត្វកម្រជាច្រើនប្រភេទផងដែរ។
ដោយឡែក ថ្មីៗនេះ លោកឧកញ៉ាបណ្ឌិត ម៉ុង ប្ញទ្ធី បានធ្វើឲ្យអ្នកប្រើប្រាស់បណ្តាញសង្គម លាន់មាត់ភ្ញាក់ផ្អើលស្ទើរតែមិនគួរឲ្យជឿគ្រប់ៗគ្នាតែម្តង ព្រោះនឹកគិតសង្ស័យថាលោកឧកញ៉ានិយាយកំប្លែងលេង បន្ទាប់ពីបានឃើញការប្រកាសរបស់លោកឧកញ៉ា ត្រូវការបុគ្គលិក២នាក់ ដែលមានជំនាញថែទាំងូតទឹក លាងសម្អាតខ្លាដំបងឯប្រាក់ខែវិញក៏មិនធម្មតាដែរ។
ជាការពិតណាស់ តាមរយៈទំព័រហ្វេសប៊ុកផ្លូវការរបស់លោកឧកញ៉ា បានសរសេរបញ្ជាក់ប្រាប់ភ្ជាប់ជាមួយហេតុផលឲ្យដឹងថា៖ «ដោយសារតែបុគ្គលិកថែទាំខ្លាដំបងនេះស្គមពេកមិនសូវមានសាច់ ដូចច្នេះហើយក្រុមហ៊ុនមានតម្រូវការជ្រើសរើសបុគ្គលិកចំនួនពីរនាក់ ដែលមានជំនាញថែទាំងូតទឹក លាងសម្អាតខ្លាដំបង សម្រាប់ប្រាក់ខែនិងប្រាក់ឧបត្ថម្ភផ្សេងៗអាចចរចាគ្នាបាន បើមានចំណាប់អារម្មណ៍ទូរស័ព្ទមកលោកយន់ សេរី+855 16 997 185» ៕ ដោយ៖ លឹម ហុង