ខេត្តព្រះសីហនុ ៖មានករណីបុរសម្នាក់លោតពីលើទូក ចូលទឹកសមុទ្រ ហើយបាត់ខ្លួន កាលពីយប់ថ្ងៃទី២០ ខែសីហា ឆ្នាំ២០២០ នៅចំណុច Lat 10°27’00” N, Long 103°16’00” E ខាងត្បូងឈៀងខាងលិចពយភ្លើងស៊ីញ៉ូ កោះរ៉ុងសន្លឹម ភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា គិតត្រឹមថ្ងៃត្រង់ថ្ងៃ២២ខែសីហានេះ សមត្ថកិច្ចនគរបាល នៅមិនទាន់ស្វែងរកឃើញនៅឡើយ។
យោងតាមប្អូនជនរងគ្រោះ ឈ្មោះ ឈឹម ឆាយ បានរៀបរាប់ប្រាប់សមត្ថកិច្ចថា៖ បងប្រុសគាត់បាន ចេញទូកឈើយន្ត ពីទំនប់រលកទៅនេសាទក្នុងសមុទ្រ មានគ្នា ២នាក់ មកដល់ចំណុចខាងលើបានចតបោះយុថ្កា ដើម្បីសម្រាកដាំបាយហូប ហើយក្នុងពេលនោះ បងគាត់បានលោតចូលទឹកសមុទ្រ រួចក៏បាត់ខ្លួនតែម្តង ។
ជនរងគ្រោះ មានឈ្មោះ ឈឹម ឆេង ភេទប្រុស អាយុ ៣១ឆ្នាំ ទីលំនៅបច្ចុប្បន្នភូមិ៣ សង្កាត់១ ក្រុងព្រះសីហនុ ។ ចំណែកអ្នករួមដំណើរ ឈ្មោះ ធ្មេញ ជាមនុស្សគ អាយុ ១៣ ឆ្នាំ ទីលំនៅជាមួយគ្នា បច្ចុប្បន្នមកដល់ដីគោកវិញហើយ និងកំពុងសាកសួរបន្តដោយសមត្ថកិច្ច។ ករណីនេះ សមត្ថកិច្ចកំពុងស្រាវជ្រាវបន្ត រកមូលហេតុពិតថាតើជាករណីលោតទឹកធ្វើអត្តឃាត ឬក៏ធ្លាក់ទឹកដោយចៃដន្យ ឬដោយមូលហេតុផ្សេងណាមួយ។
បច្ចុប្បន្ន កម្លាំងការិយាល័យនគរបាលចរាចរណ៍ផ្លូវទឹក បានសហការជាមួយក្រុមហ៊ុនGTVC របស់លោកឧកញ៉ា ទៀ វិចិត្រ និងអធិការដ្ឋាននគរបាលក្រុងកោះរ៉ុង ព្រមទាំងសាច់ញាតិជនរងគ្រោះ កំពុងបន្តស្វែងរកក្នុងសមុទ្រ និងមិនទាន់ដឹងថា ជនរងគ្រោះស្លាប់ឬនៅរស់នៅឡើយ៕
ដោយ៖បញ្ញាស័ក្តិ