បាត់ដំបង៖ ប្ដីញៀនថ្នាំ វាយប្រពន្ធ ព្រោះតែជម្លោះរឿងប្រពន្ធបានលក់ដីអណ្ដូងទឹកដែលមានទំហំ ៥គុណ៨ម៉ែត្រ ឱ្យបងប្អូនក្នុងតម្លៃ៥០ម៉ឺនរៀល ពេលប្ដីដឹងរឿងនេះ ប្ដីខឹងខ្លាំងប្រពន្ធយ៉ាងខ្លាំង កើតជាអំពើហិង្សាវាយប្រពន្ធសន្លប់លើអង្រឹង។
អំពើហិង្សានេះត្រូវបានបង្ហោះលើបណ្តាញសង្គមហ្វេសប៊ុក ផេក វណ្ណណាក់ សុវត្ថនី៖ សុំឲ្យបងប្អូនជួយ share ឲ្យខ្ញុំម្នាក់មួយផង អានេះវាអាក្រក់ណាស់ វាជក់ថ្នាំហើយវាវាយប្រពន្ធ អាចុយម្រាយអានេះ វាមិនគិតរកស៊ីអីទេ វាវាយតែប្រពន្ធ អាឆ្កែឆ្កួតវានៅភូមិស្វាយធំ ឃុំអូរដំពីរ ស្រុកសង្កែ ខេត្តបាត់ដំបង ជួយ share ឲ្យអាជ្ញាធម៌បានដឹងផង។
ករណីអំពើហិង្សានេះ កើតឡើងកាលពីវេលាម៉ោង ៥និង២៨នាទីល្ងាច ថ្ងៃទី២០ ខែសីហា ឆ្នាំ២០២០ នៅក្នុងភូមិស្វាយធំ ឃុំអូរដំបង២ ស្រុកសង្កែ ខេត្តបាត់ដំបង។
ក្រោយពីទទួលបានព័ត៌មានពីវីដេអូឃ្លីបលើបណ្តាញសង្គម ករណីប្រើអំពើហិង្សាដែលប្អូនថ្លៃបានបង្ហោះ នៅលើបណ្ដាញសង្គមហ្វេសប៊ុក នាថ្ងៃទី២២ ខែសីហា ឆ្នាំ២០២០នេះ អធិការស្រុកសង្កែ បានបញ្ជាកម្លាំងឱ្យចុះទៅនាំខ្លួនបុគ្គលប្រើអំពើហិង្សានេះ មកធ្វើការសាកសួរនៅអធិការដ្ឋាននគរបាលស្រុកសង្កែ ។
ប្រពន្ធ បានស្នើឲ្យសមត្ថកិច្ចនគរបាលស្រុកសង្កែ ធ្វើការអប់រំប្ដីរបស់ខ្លួន និងនាំយកទៅដាក់មណ្ឌលអប់រំកែប្រែ ដើម្បីបន្សាបសារធាតុញៀន។
បើតាមរបាយការណ៍របស់ ស្នងការដ្ឋាននគរបាលខេត្តបាត់ដំបង បានឲ្យដឹងថា បុរសជាប្តីដែលប្រើហិង្សាលើប្រពន្ធត្រូវបានឃាត់ ខ្លួនអប់រំនៅស្រុកសង្កែ ខេត្តបាត់ដំបង។ ពីថ្ងៃទី២០ ខែសីហា ឆ្នាំ២០២០វេលាម៉ោង១៧និង២៣នាទី ចំណុចក្រុម១៥ ភូមិស្វាយធំ ឃុំអូរដំបង២ ស្រុកសង្កែ ខេត្តបាត់ដំបង មានអំពើហិង្សាក្នុងគ្រួសារ(ប្តីវាយប្រពន្ធ) មួយកើតឡើងដែលករណីនេះបង្កដោយប្តីឈ្មោះយ៉ែម សារ៉េត ហៅ គល់ អាយុ៣៦ឆ្នាំមានទីលំនៅចំណុចកើតហេតុ បានយកដៃវាយប្រពន្ធមួយដៃត្រូវចំក្បាលខាងឆ្វេងនិងទាត់មួយជើងដែលប្រពន្ធឈ្មោះកឺ គឿន អាយុ៣៥ឆ្នាំរស់នៅជាមួយគ្នា។
មូលហេតុនៃអំពើហិង្សានេះដោយសារប្តីខឹងប្រពន្ធលក់ដីមួយកន្លឺងមានអណ្តូងទទឹង៥ម៉ែត្រ បណ្តោយ៨ម៉ែត្រ លក់ក្នុងតម្លៃ៥០០.០០០រៀល (ហាសិបម៉ឺនរៀល) (ជាតម្លៃថោក) ឱ្យទៅប្អូនថ្លៃឈ្មោះ កឺ ម៉ៅ ភេទស្រី អាយុ២៥ឆ្នាំ មានទីលំនៅភូមិ ឃុំ ជាមួយ ។
ក្រោយកើតហេតុ រហូតដល់ថ្ងៃទី២២ ខែសីហា ឆ្នាំ២០២០ ទើបជនរងគ្រោះជាប្រពន្ធ មកដាក់បណ្តឹងនៅអធិការដ្ឋាននគរបាលស្រុកសង្កែ ដោយសំណូមពរសុំឱ្យសមត្ថកិច្ចធ្វើការអប់រំណែនាំ។
អនុវត្តតាមបទបញ្ជារបស់ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចយោបល់របស់លោកវរសេនីយ៍ទោ លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ លោកវរសេនីយ៍ឯក ស៊ុន សុវណ្ណ អធិការនគរបាលស្រុកសង្កែ ដឹកនាំឱ្យធ្វើការនាំខ្លួនបុរសជាប្តីមកធ្វើការសាកសួរពីករណីហិង្សាខាងលើ នៅអធិការដ្ឋាននគរបាលស្រុក។
ក្រោយពីបានសារភាពទទួលស្គាល់កំហុសរបស់ខ្លួន និងដោយបានធ្វើកិច្ចសន្យាអប់រំណែនាំ ឱ្យបញ្ឈប់សកម្មភាពបែបនេះបន្តទៀត រួចបានបញ្ជូនខ្លួនទៅមណ្ឌលអប់រំបន្សាបគ្រឿងញៀន នៅស្រុកបវេល ដោយសារបុរសជាប្តីរូបនេះមានប្រើប្រាស់គ្រឿងញៀនផង។
សូមជម្រាបជូនថា ករណីហិង្សាមួយនេះត្រូវបានអ្នកប្រើប្រាស់បណ្តាញសង្គមផុស Posteរូបភាពនិងស៊ែរ Shaer ចែកចាយបន្តនូវឃ្លីបវីដេអូយ៉ាងព្រោងព្រាត នាប៉ុន្មានថ្ងៃនេះ និងបានស្នើឱ្យសមត្ថកិច្ចនគរបាល ចាត់វិធានការចំពោះករណីនេះ។
ពាក់ព័ន្ធករណីខាងលើនេះ ម្ចាស់ផេក វណ្ណណាក់ សុវត្ថនី ដែលបានបង្ហោះវីដេអូលើបណ្តាញសង្គមហ្វេសប៊ុករបស់ខ្លួននោះ បានរៀបរាប់ថា “ខ្ញុំសូមអគុណបងប្អូនទាំងអស់ដែលបានជួយ share ពេលនេះសម្មតកិច្ចស្រុកសង្កែ បានចាប់វាទៅមណ្ឌលកែប្រែហើយ។ អរគុណដល់សមត្ថកិច្ចស្រុកសង្កែ ដែលបានអន្ដរាគមន៍ យកចិត្តទុកដាក់លើប្រជាពលរដ្ឋ”៕ដោយ៖កូឡាប