ភ្នំពេញ៖ សម្ដេចអគ្គព្រះមហាសង្ឃរាជាធិបតី ទេព វង្សបានដួលនៅក្នុងបន្ទប់ទឹក កាលពីម៉ោង៩និង៤០នាទីយប់ ថ្ងៃទី១៩ ខែសីហា ឆ្នាំ២០២០កន្លងទៅ ហើយ កំពុងប្រឈួនធ្ងន់ប៉ះពាល់ដល់ព្រះកេស និងមានឈាមកកនៅក្នុងព្រះកេស ត្រូវបានបញ្ជូនទៅ ព្យាបាលនៅមន្ទីរពេទ្យប្រទេសវៀតណាម។
សូមថ្វាយព្រះរាជសព្ទសាធុការពរព្រះបរមសុខគ្រប់ប្រការថ្វាយ សម្តេចព្រះមហាសង្ឃរាជកិត្តិឧទ្ទេសបណ្ឌិត ទេព វង្ស សម្តេច ព្រះមហាសង្ឃរាជគណៈមហានិកាយនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមស្តេចមានព្រះរាជសុខភាពល្អឡើងវិញ។
បើយោងតាមលិខិតរបស់សម្តេចសង្ឃ អំ លឹមហេង នៅរសៀលថ្ងៃទី២៣ ខែសីហា ឆ្នាំ២០២០នេះ បានរៀបរាប់ថា បន្ទាប់ពីដួលនៅក្នុងបន្ទប់ទឹក ដោយប៉ះពាល់ព្រះកាយផ្នែកខាងឆ្វេង ធ្វើឱ្យដៃ និងជើងកម្រើកមិនរួច ព្រមទាំងប៉ះពាល់ដល់ព្រះកេស និងមានឈាមកកនៅក្នុងព្រះកេសផងដែរ ត្រូវការការព្យាបាលយ៉ាងលឿនបំផុត នៅមន្ទីរពេទ្យរដ្ឋ ថងញ៉ិត របស់វៀតណាម។
គណៈសង្ឃនាយក នៃព្រះរាជាណាចក្រកម្ពុជា បានចេញសង្ឃលិខិតមួយច្បាប់ជម្រាបជូន ឯកឧត្តម NGUYEN PHU TRONG អគ្គលេខាធិការបក្សកុម្មុយនីស្តវៀតណាម និងជា ប្រធានាធិបតី នៃសាធារណរដ្ឋសង្គមនិយមវៀតណាម ក្នុងកម្មវត្ថុ សំណើសុំព្យាបាលព្រះរោគថ្វាយសម្តេចអគ្គព្រះមហាសង្ឃរាជាធិបតី ទេព វង្ស ។
តបតាមកម្មវត្ថុខាងលើ អាត្មាភាព សូមចម្រើនពរ ឯកឧត្តមអគ្គលេខាធិការបក្ស មេត្តាជ្រាបថា កន្លងមកព្រះរាជសុខភាពរបស់សម្តេចព្រះមហាសង្ឃរាជ ជាទូទៅ គឺតែងតែទទួលបានការព្យាបាល និងមើលថែពីសំណាក់ វេជ្ជបណ្ឌិតល្បីៗ ពីមន្ទីរពេទ្យនានាក្នុងប្រទេសវៀតណាម។ ដោយឡែកកាលពីយប់ថ្ងៃទី១៩ ខែសីហា ឆ្នាំ២០២០នេះ វេលាម៉ោង៩និង៤០នាទីយប់ សម្តេចព្រះមហាសង្ឃរាជ បានដួលនៅក្នុងបន្ទប់ទឹកដោយ ប៉ះពាល់ព្រះកាយផ្នែកខាងឆ្វេង ធ្វើឱ្យដៃ និងជើងកម្រើកមិនរួចព្រមទាំងប៉ះពាល់ដល់ព្រះកេសនិងមានឈាមកកនៅក្នុងព្រះកេស ហើយស្ថានភាពនេះអាចនឹងធ្ងន់ធ្ងរឡើង ទើបគណៈសង្ឃនាយក នៃព្រះរាជាណាចក្រកម្ពុជា សូមការអនុញ្ញាតពីឯកឧត្តមអគ្គលេខាធិការបក្ស ដើម្បីទទួលការព្យាបាលយ៉ាងលឿនបំផុត តាមកាលដែលអាចធ្វើទៅបាន ដោយគោរពទៅតាមគោលការណ៍របស់ក្រសួងសុខាភិបាលនៃប្រទេសវៀតណាម ដែលតម្រូវឱ្យស្នាក់នៅដាច់ដោយឡែករយៈពេល១៤ថ្ងៃ ក្នុងគ្រាមានអាសន្ននៃជំងឺ covid 19 នេះ ។ ការយាងទៅសម្រាកព្យាបាលព្រះរោគនេះ នៅមន្ទីរពេទ្យថងញ៉ុត ចាប់ពីថ្ងៃទី២១ ខែសីហា ឆ្នាំ២០២០ តទៅ និងមិនទាន់កំណត់ថ្ងៃត្រឡប់មកប្រទេសកម្ពុជាវិញទេ ដោយអមដំណើរជាមួយសម្តេចមហាសង្ឃរាជ ចំនួន ៧អង្គ/នាក់ ។
អាស្រ័យហេតុដូចបានចម្រើនពរខាងលើសូម ឯកឧត្តមអគ្គលេខាធិការបក្ស មេត្តាជួយសម្រួល ថ្វាយសម្តេចព្រះមហាសង្ឃរាជ ដោយសេចក្ដីអនុគ្រោះ។
ព្រះសិរីកោសល សុំ សុខា ព្រះវិន័យធរគណរាជធានីភ្នំពេញ ព្រះគ្រូសង្ឃសរណវេទី ព្រះអនុគណខណ្ឌកំបូល ព្រះចៅអធិការ វត្តភ្នផតសិម្ពលី មានសង្ឃដីកាប្រាប់បណ្តាញព័ត៌មានក្នុងស្រុក នៅរសៀលថ្ងៃទី២៣សីហានេះឲ្យដឹងថា ដោយមានការសម្របសម្រួលពី អាជ្ញាធរវៀតណាម សម្ដេចអគ្គព្រះមហាសង្ឃរាជាធិបតី ទេព វង្ស ត្រូវបានបញ្ជូនទៅព្យាបាលនៅមន្ទីរពេទ្យវៀតណាម ហើយនៅពេលនេះ ស្ថានភាពព្រះរោគរបស់សម្ដេចអគ្គព្រះមហាសង្ឃរាជាធិបតី ទេព វង្ស មិនទាន់មានអ្វីវិវត្តន៍ថ្មីនោះទេ ដោយក្រុមគ្រូពេទ្យជំនាញរបស់វៀតណាម កំពុងពិនិត្យ និងតាមដានស្ថានភាពជំងឺ៕ ដោយ៖កូឡាប
