ភ្នំពេញ៖ នៅថ្ងៃទី២៣ ខែសីហា ឆ្នាំ២០២០ សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណៈកម្មការប្រយុទ្ធប្រឆាំងជំងឺកូវីដ១៩ និងក្រសួងសុខាភិបាលបានអនុញ្ញាតឱ្យកម្លាំងមួកខៀវកម្ពុជា៧១នាក់ វិលត្រឡប់ទៅផ្ទះរបស់ខ្លួនវិញ បន្ទាប់ពីក្រុមគ្រូពេទ្យនៃក្រសួងសុខាភិបាល បានយកសំណាកវិភាគ ទទួលលទ្ធផលអវិជ្ជមានមេរោគកូវីដ១៩ ក្រោយពួកបានធ្វើចត្តាឡីស័កចំនួន១៤ថ្ងៃនៅមណ្ឌលចត្តាឡីស័ក រាជធានីភ្នំពេញ។
យោងតាមការប្រកាសព័ត៌មានពីមជ្ឈមណ្ឌលជាតិរក្សាសន្តិភាពបានថ្លែងបញ្ជាក់ឲ្យដឹងថា អំឡុងពេលកម្លាំងមួកខៀវកម្ពុជា ធ្វើចត្តាឡីស័ក សម្តេចតេជោ តែងតែយកចិត្តទុកដាក់ តាមដានជាប្រចាំពីស្ថានភាពកម្លាំងមួកខៀវ, បានផ្តល់អាហារគ្រប់គ្រាន់ លើកទឹកចិត្ត និងបានណែនាំផ្តាំផ្ញើក្រុមគ្រូពេទ្យក្រសួងសុខាភិបាល ក៏ដូចជាមជ្ឈមណ្ឌលជាតិរក្សាសន្តិភាព មើលថែទាំ កម្លាំងមួកខៀវកំពុងធ្វើចត្តាឡីស័ក ចំពោះសុខភាពរបស់ពួកគាត់ដែលនេះសរបញ្ជាក់ឱ្យឃើញថា សម្តេចតេជោ នាយករដ្ឋមន្ត្រី បានយកចិត្តទុកដាក់ខ្លាំងណាស់ចំពោះប្រជាពលរដ្ឋ កម្លាំងប្រដាប់អាវុធ និងមន្ត្រីរាជការ។
ដោយឡែកទាហានមួកខៀវនារីមួយរូប ដែលឆ្លងមេរោគ COVID-19 ក្រោយគេបង្អស់ នៅសង្កាត់សិត្បូ ក្រុងតាខ្មៅ ខេត្តកណ្តាល ត្រូវបានព្យាបាលជាសះស្បើយ និងត្រូវបានអនុញ្ញាតឱ្យត្រឡប់ទៅគេហដ្ឋានវិញ កាលពីថ្ងៃទី១៦ ខែសីហា ឆ្នាំ២០២០។ ដោយឡែក ក្រុមគ្រួសារគាត់ចំនួន៩នាក់ ត្រូវបានពិនិត្យឃើញថាអវិជ្ជមានទាំងអស់គ្នា ហើយត្រូវបានក្រសួងសុខាភិបាលអនុញ្ញាតឱ្យត្រឡប់ទៅគេហដ្ឋានវិញទាំងអស់គ្នានាថ្ងៃទី២២ ខែសីហា ឆ្នាំ២០២០ និង ទាហានមួកខៀវ៨នាក់ លទ្ធផលវិជ្ជមានកូវីដ-១៩ ក៏បានព្យាបាលជាសះស្បើយ១០០% និងបានវិលត្រឡប់ទៅវិញផងដែរ។ ដូច្នេះសូមបងប្អូនប្រជាពលរដ្ឋ ក្នុងសហគមន៍ សូមកុំមានការព្រួយបារម្ភអ្វីនោះឡើយ គឺថាក្រុមគ្រូពេទ្យនៃក្រសួងសុខាភិបាល បានយកចិត្តទុកដាក់ និងពិនិត្យពិច្ច័យច្បាស់លាស់ខ្លាំងណាស់លើបញ្ហាកូវីដ-១៩នេះ។
គួរបញ្ជាក់ថា កម្លាំងទ័ពមួកខៀវ៨០នាក់ បានមាតុភូមិន្ទនិវត្តន៍ពីបេសកកម្មអង្គការសហប្រជាជាតិ នៅសាធារណរដ្ឋម៉ាលី កាលពីថ្ងៃទី១០ ខែកក្តដា ឆ្នាំ២០២០ ត្រូវបានធ្វើចត្តាឡីស័កនៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ស្រុកភ្នំស្រួច ខេត្តកំពង់ស្ពឺច ចំនួន២២ថ្ងៃ ហើយបានបន្តធ្វើចត្តាឡីស័ក១៤ថ្ងៃទៀត នៅមណ្ឌលចត្តាឡីស័ក រាជធានីភ្នំពេញ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី១៧ខែសីហាឆ្នាំ២០២០នេះ បានសម្រេចឡើងវិញ គឺមិនសុំពន្យារពេលការវិលត្រឡប់របស់កងទ័ពមួកខៀវកម្ពុជា និងការបញ្ជូនកងទ័ពមួកខៀវ ទៅជំនួសនោះទេ ក្រោយពីទទួលបាននូវពេលវេលាជាក់លាក់ នៃការវិលត្រឡប់និងការផ្លាស់ប្តូរកងទ័ពមួកខៀវកម្ពុជា ដែលរៀបចំដោយអង្គការសហប្រជាជាតិ។
សម្តេចតេជោ បានប្រកាសព័ត៌មានតាមរយៈហ្វេសប៊ុកថា ក្រោយពីទទួលបាននូវពេលវេលាជាក់លាក់នៃការវិលត្រឡប់ និងការផ្លាស់ប្តូរកងទ័ពមួកខៀវកម្ពុជាដែលរៀបចំដោយអង្គការសហប្រជាជាតិ។ នៅព្រឹកនេះខ្ញុំបានសម្រេចឡើងវិញគឺមិនសុំពន្យារពេលការវិលត្រឡប់របស់កងទ័ពមួកខៀវកម្ពុជា និងការបញ្ជូនកងទ័ពមួកខៀវ ទៅជំនួសនោះទេ។
ការរៀបចំពេលវេលារបស់អង្គការសហប្រជាជាតិ បានផ្តល់ឱ្យយើងរៀបចំការធ្វើចត្តាឡីស័ក បានងាយស្រួលដើម្បីទប់ស្កាត់ការនាំចូលកូវីដ១៩ មកក្នុងប្រទេសនោះគឺ៖ ១.មកពីប្រទេសម៉ាលី ខែកញ្ញា២០២០ ២.ស៊ូដង់ខាងត្បូង ខែតុលា២០២០, ៣.អាហ្វ្រិកកណ្តាល ខែវិច្ឆិកា២០២០ , ៤.លីបង់ ខែមករា២០២១។
សូមនាយទាហាននាយទាហានរង និងពលទាហាន ដែលកំពុងស្ថិតនៅប្រទេសទាំង៤ខាងលើរៀបចំខ្លួន ដើម្បីវិលត្រឡប់ និងសូមនាយទាហាននាយទាហានរង និងពលទាហានដែលនឹងត្រូវទៅជំនួសរៀបចំខ្លួនចេញដំណើរតាមការចាត់ចែងរបស់ក្រសួងការពារជាតិនិងអង្គការសហប្រជាជាតិ។
បើទោះបីកម្ពុជាជាប្រទេសក្រីក្រនិងកំពុងប្រឈមជាមួយកូវីដ១៩បន្ថែម ដោយប្រទេសដែលកងទ័ពមួកខៀវ
កម្ពុជាត្រូវទៅកំពុងមានការវាយលុកដោយកូវីដ១៩ក៏ដោយ ក៏រាជរដ្ឋាភិបាលកម្ពុជា និងកងទ័ពរបស់ខ្លួនមិនបោះបង់ចោលភារកិច្ចក្នុងការចូលរួមថែរក្សាសន្តិភាពនៅតាមប្រទេសនានាក្រោមឆត្ររបស់អង្គការសហប្រជាជាតិនោះឡើយ។យើងចូលរួមដោយស្ម័គ្រចិត្តនិងការទទួលរទទួលខុសត្រូវក្នុងឋានៈជាសមាជិកអង្គការសហប្រជាជាតិ។
សូមបញ្ជាក់ថា នៅក្នុងពិធីសម្ពោធសួនទឹក «ហ្គាឌិនស៊ីធី» នៅព្រឹកថ្ងៃអាទិត្យនេះ សម្តេចតេជោបានលើកឡើងថា សម្តេច បានប្រាប់ទៅរដ្ឋមន្ត្រីក្រសួងការបរទេស ឲ្យទាក់ទងទៅអង្គការសហប្រជាជាតិ ពីសំណើររបស់កម្ពុជា។
ការធ្វើដូច្នេះ ដោយសារតែកម្ពុជា បានរកឃើញកងកម្លាំងមួកខៀវចំនួន ៩នាក់បានឆ្លងកូវីដ ១៩ បន្ទាប់ពីវិលត្រឡប់មកពីប្រទេសម៉ាលី ។
សម្តេចតេជោ បានបញ្ជាក់ថា បើទោះជាមិនបានផ្អាកឬពន្យារពេលការដោះដូរសម្រាប់ប្រទេសផ្សេងក៏ដោយ ក៏សូមឲ្យអនុវត្តសម្រាប់កងទ័ពមួកខៀវរបស់កម្ពុជា។
កាលពីថ្ងៃទី ១០ ខែកក្តដា ឆ្នាំ ២០២០ មានកងកម្លាំងរក្សាសន្តិភាពចំនួន ៨០នាក់ បានវិលត្រឡប់មកពីប្រទេសម៉ាលី ។ នៅក្នុងចំណោមយោធិនទាំង ៨០នាក់ គឺមាន ៩នាក់ ដែលបានឆ្លងជំងឺកូវីដ ១៩៕ ដោយ៖កូឡាប