ថ្មីៗនេះ មានរឿងដ៏គួរឲ្យអាណិតអាសូរមួយ ដែលត្រូវបានគេចែករំលែកនៅលើបណ្តាញសង្គម បានឲ្យដឹងថា នារីជនជាតិខ្មែរម្នាក់ ត្រូវបានមិត្តភ័ក្ដិធ្វើការជាមួយ យកមកបោះបង់ចោលនៅម្ដុំហ្វែត8 ក្នុងតំបន់និគមអាំម៉ាតាក់សិធីស្ថិតនៅក្នុងស្រុកផានថងខេត្តឈុនបុរីប្រទេសថៃ កាលពីថ្ងៃទី២២ ខែសីហា ឆ្នាំ២០២០។ នេះបើតាមប្រភពពីឈ្មោះ Pheaktra ប្រាប់ឲ្យដឹង។
នារីរងគ្រោះខាងលើត្រូវបានដឹងថាមានឈ្មោះ ឈឿន សុខលីនអាយុ ២៩ ឆ្នាំ ស្រុកកំណើតរស់នៅភូមិព្រែកបាក់ ឃុំព្រែកទន្លាប់ ស្រុកលើកដែក ខេត្តកណ្តាល។
ប្រភពខាងលើបន្តថា បើតាមការបញ្ជាក់ពីបុរសជនជាតិថៃម្នាក់ ដែលបានជួយនារីខ្មែរខាងលើ បានសរសេរនៅក្នុងបណ្តាញសង្គមថា គាត់បានប្រទះឃើញនារីជនជាតិខ្មែរខាងលើដើរបណ្ដើរយំបណ្ដើរ នៅតាមដងផ្លូវម្ដុំហ្វែត8 ក្នុងស្ថានភាពគ្មានកម្លាំងកំហែងគ្មានប្រាក់ជាប់ខ្លួន គ្មានញាតិនៅតំបន់នេះទៀត ហើយថែមទាំងមិនចេះនិយាយភាសាថៃទៀតផង។ ពេលឃើញគួរឲ្យអាណិតបែបនេះ បុរសជនជាតិថៃរូបនោះ ក៏នាំនាងទៅកាន់អធិការដ្ឋានតម្រួតប៉ុស្តិ៍ផានថង បន្ទាប់មកមានអ្នករត់ម៉ូតូឌុបនៅក្បែរនោះ ដែលចេះនិយាយភាសាខ្មែរខ្លះៗ បានសួរនាំនាងអំពីមូលហេតុដែលកើតឡើងហើយនាងបានប្រាប់ថា នាងត្រូវមិត្តភ័ក្ដិយកមកបោះបង់ចោលហើយពេលនេះ នាងឃ្លានបាយខ្លាំងណាស់ ឮដូច្នោះ បុរសជនជាតិថៃចិត្តធម៌ ដែលនាំនាងមកបានទៅទិញបាយទិញទឹក និងនំមួយចំនួនឲ្យនាងហូប ដើម្បីបន្ធូរភាពហេវហត់ព្រមទាំងផ្ដល់ប្រាក់បន្តិចបន្តួច ដល់នាងសម្រាប់ទិញរបស់ហូបចុកតទៅមុខទៀត។
បុរសជនជាតិថៃចិត្តធម៌នោះ ក៏បានបញ្ជាក់ឲ្យដឹងជាមួយដំណឹងល្អផងដែរថា វេលាម៉ោង១០និង៣០នាទីយប់ថ្ងៃដដែលនោះ មានថៅកែចិត្តធម៌ម្នាក់ ព្រមទទួលយកនាងទៅធ្វើការជាមួយ ព្រោះកន្លែងធ្វើការគាត់ ក៏មានកម្មករខ្មែរធ្វើការផងដែរ។
នេះចាត់ទុកជាសំណាងល្អហើយ និងក៏សូមអរគុណជំនួសផងដែរ ចំពោះទឹកចិត្តដ៏ល្អរបស់បុរសជនជាតិថៃម្នាក់នោះ ដែលបានជួយដល់ពលករខ្មែរខាងលើ។
ជាមួយគ្នានេះផងដែរ យើងក៏សូមអំពាវនាវដល់បងប្អូនខ្មែរទាំងអស់ ដែលជាពលករ មុននឹងសម្រេចចិត្តចំណាកស្រុក សូមគិតពិចារណាឲ្យបានច្បាស់ មុននឹងធ្វើការសម្រេចចិត្តមួយនេះ ព្រោះថាការចំណាកស្រុកទៅធ្វើនៅស្រុកគេ នោះបងប្អូននឹងប្រឈមបញ្ហាគ្រប់បែបយ៉ាង ជាក់ស្តែងដូចករណីខាងលើនេះជាដើម៕ ដោយ៖ លឹម ហុង
