ភ្នំពេញ ៖ លោកឧកញ៉ា ភិរម្យ វិចិត្រដារ៉ា ដែលត្រូវបានគេដឹងមានក្រុមហ៊ុនជាច្រើននៅក្នុងដៃ និងជាម្ចាស់គម្រោងអចលនទ្រព្យនៅខេត្តសៀមរាប ខេត្តកំពង់ស្ពឺ ខេត្តកំពត ផងនោះ បានរងការចោទប្រកាន់បានបោកទូរស័ព្ទ និងវៃនារីម្នាក់យ៉ាងព្រៃផ្សៃបំផុត កាលពីវេលាម៉ោង២១និង៣០នាទី ថ្ងៃទី២០ ខែសីហា ឆ្នាំ២០២០ នៅចំណុចហាងមួយកន្លែងឈ្មោះ «ឡា វ៉ូត» ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ ដោយសារខឹងមកទារលុយចំនួន ៥.៥០០ ដុល្លារ ពីប្អូនស្រីខ្លួន។
យោងតាមពាក្យបណ្តឹងរបស់នារីរងគ្រោះឈ្មោះ គឹម ចាន់សុធី អាយុ ២៧ ឆ្នាំ ចុះនៅថ្ងៃទី២១ ខែសីហា ឆ្នាំ២០២០ បានរៀបរាប់អំពីដំណើររឿងហេតុឲ្យដឹងថា «កាលពីថ្ងៃទី១៩ ខែសីហា ឆ្នាំ២០២០ បងស្រីរបស់នាងខ្ញុំឈ្មោះ គឹម ចាន់សុធា បានមកពីភ្នំពេញ មកលេងជាមួយខ្ញុំនៅខេត្តព្រះសីហនុ។ នៅយប់ថ្ងៃទី២០ ខែសីហា ឆ្នាំ២០២០ ម៉ោង ២០ និង៣០នាទី ពួកខ្ញុំមានគ្នា៤នាក់ប្រុស២នាក់ បាននាំគ្នាទៅរកហូបអាហារនៅហាងយីហោ ឡាវ៉ូត ស្ថិតក្នុងក្រុម១៤ ភូមិ៤ សង្កាត់លេខ៤ ក្រុង-ខេត្តព្រះសីហនុ ។ កំពុងកូម្ម៉ង់ម្ហូបអាហារ បានប្រទះឃើញឈ្មោះ យ៉េន ម៉ារ៉ាណង ភេទស្រី មានអាសយដ្ឋានផ្ទះ៧១៥ ផ្លូវលំភូមិមានជ័យ សង្កាត់ស្ទឹងមានជ័យ ភ្នំពេញ និងមកជាមួយបងប្អូនរបស់គាត់ប្រហែលទៅ៨នាក់ មានប្រុសស្រីចូលមករកហូបអាហារក្នុងហាងខាងលើនេះដែរ ។ ក្នុងខណៈពេលនោះ បងស្រីបានចូលទៅសួរនាំជាមួយឈ្មោះ យ៉េន ម៉ារ៉ាណង ស្រាប់តែភាគីម៉ារ៉ាណងបានស្រែកជេរមកលើបងស្រីខ្ញុំ ដោយឃើញហេតុការណ៍មិនស្រួល នាងខ្ញុំក៏បានលើកទូរស័ព្ទថតសកម្មភាព ស្រាប់តែភ្លាមៗនោះមានមនុស្សប្រុសម្នាក់ ត្រូវជាបងប្អូនរបស់ម៉ារ៉ាណង បានស្ទុះមកទាញទូរស័ព្ទពីដៃខ្ញុំម៉ាក SAMSUNG S10 យកទៅបោកបែក និងប្រើហិង្សាយកដៃវាយនាងខ្ញុំត្រូវមុខ ធ្វើឲ្យដួលផ្ងារ បែកឈាមហូរជាច្រើនដួលសន្លប់តែម្តង ហើយជនសង្ស័យបានរត់គេចអស់មុនពេលសមត្ថកិច្ចមកដល់កន្លែងកើតហេតុ ។ នៅម៉ោង ៤ និង ៣០ នាទី ចូលថ្ងសទី២១ ខែសីហា ឆ្នាំ២០២០ នាងខ្ញុំដឹងខ្លួននៅក្នុងមន្ទីរពេទ្យ»។
ឆ្លើយតបចំពោះការចោទប្រកាន់នេះវិញ លោកឧកញ៉ា ភិរម្យ វិចិត្រដារ៉ា ថ្លែងប្រាប់កាសែតក្នុងស្រុកមួយថា លោកមិនបានប្រព្រឹត្តអំពើហិង្សាដូចការចោទប្រកាន់របស់នារីរងគ្រោះនោះទេ ។ លោកក៏បានបញ្ជាក់ថា លោកបានត្រៀមមេធាវីរួចរាល់ហើយ ដើម្បីតតាំងករណីនេះ និងក៏ត្រៀមធ្វើសន្និសីទកាសែតដើម្បីស្រាយបំភ្លឺចំពោះករណីនេះ ជាសាធារណៈផងដ។
ដោយឡែក នារីរងគ្រោះវិញ បានសរសេរនៅលើគណនីហ្វេសប៊ុករបស់ខ្លួន ដោយបានបញ្ជាក់ថា៖ «បើខ្ញុំមិនទទួលបានយុត្តិធម៌ទេ គឺខ្ញុំមិនសុខចិត្តទេ ខ្ញុំនឹងបើកចំហជាសាធារណៈ ដើម្បីឲ្យពុកម៉ែបងប្អូនបានដឹងថាតើលោកឧកញ៉ាម្នាក់នោះជាអ្នកណា ហើយតើគាត់បានធ្វើអ្វីខ្លះមកលើរូបខ្ញុំ ខ្ញុំគ្មានលុយតតាំងរឿងក្ដីទេ ខ្ញុំមានតែសុំឲ្យពុកម៉ែបងប្អូនក្នុងបណ្ដាលសង្គម Facebook ជួយរកយុត្តិធម៌ឲ្យខ្ញុំផង ។ បើជននោះ នៅតែមិនបានជាប់ទោសតាមច្បាប់ទៀត ខ្ញុំអស់សង្ឃឹមហើយ ខ្ញុំជាជនរងគ្រោះ តើខ្ញុំត្រូវអស់លុយតតាំងនឹងគេហើយត្រូវឈឺខ្លួនទៀតមែនទេ សូមពុកម៉ែបងប្អូនជួយ share ដើម្បីរកយុត្តិធម៌ឲ្យរូបខ្ញុំផង ព្រោះគិតមកដល់ពេលនេះកើតហេតុបានបីថ្ងៃហើយ នៅតែមិនឃើញមានអ្វីសោះ ថ្ងៃកើតហេតុយប់ថ្ងៃទី ២០ ខែសីហា ឆ្នាំ២០២០ វេលាម៉ោង ៩និង០នាទីយប់ នាងខ្ញុំត្រូវបុរសម្នាក់បានជាប់យកទូរស័ព្ទដៃរបស់ខ្ញុំបោកហើយវាយខ្ញុំទៀត ភាពនៃការឈឺចាប់របស់ខ្ញុំ គឺគេបានវាយនាងខ្ញុំហើយព្យាយាមរត់គេចខ្លួនបាត់ តាមទ្វារក្រោយ នៅពេលដែលនាងខ្ញុំត្រូវបានបញ្ជូនទៅមន្ទីរពេទ្យ ខ្ញុំត្រូវការឲ្យមនុស្សម្នាក់នោះត្រូវច្បាប់ដាក់ទោស ដើម្បីជាការព្រមានដល់អ្នកក្រោយ ដែលហ៊ានប្រើអំពើហិង្សាទៅលើស្ត្រីក្នុងប្រទេសកម្ពុជា ខ្ញុំជឿជាក់ថានឹងមានមនុស្សល្អបរិសុទ្ធមកជួយនាងខ្ញុំបាន»។
សូមបញ្ជាក់ថា លោកឧកញ៉ា ភិរម្យ វិចិត្រដារ៉ា ត្រូវបានរងការចោទប្រកាន់វាយលើមនុស្សស្រីយ៉ាងសាហាវបែបនេះ គឺដោយសាររឿងខឹងបងស្រីនារីរងគ្រោះមកទារលុយចំនួន ៥.៥០០ ដុល្លារ ពីប្អូនស្រីរបស់ខ្លួននៅក្នុងហាង។
នេះបើយោងតាមគណនីហ្វេសប៊ុកឈ្មោះ Kim Chansothea ដែលត្រូវជាបងស្រីជនរងគ្រោះ បានបង្ហោះឲ្យដឹងថា៖ «មើលបងអត់ស្គាល់មែន យ៉េន ម៉ារ៉ាណង បានជាថាមិនស្គាល់បង លុយ 5.500 $ ណាអូន ១ឆ្នាំហើយ !!! ឥទ្បូវបានជួបចៃដន្យម្មង ជួបមីកូនបំណុលកំពូលថោក មើលមុខវាធ្វើផ្គើនហ!!! ធ្វើអត់ស្គាល់ ហើយនិយាយថាអត់បានជំពាក់លុយទៀត ធ្វើដូចអត់ដឹងរឿងអ៊ីចឹង មីកូនបំណុលអត់ហេមកវៃទេ បែរជាបងឧកញ៉ាវារអៀសខ្លួន ហេគុកមកច្រទ្បោតជេរបងប្អូនខ្ញុំ ហើយវាយប្អូនខ្ងុំម៉ង អ្នកឯងកុំគិតថាងារឧកញ៉ាអ្នកឯង លើកដៃវាយមនុស្សស្រី នៅទីសាធារណៈហើយរួចខ្លួន មានគេច្រើនណាស់បានឃើញទង្វើអ្នកឯង។ នាងខ្ញុំសង្ឃឹមថា ច្បាប់នឹងមានវិធានការរកភាពយុត្តិធម៌ជូនប្អូននាងខ្ញុំផង កុំឲ្យអាងមានងារជាឧកញ៉ាដើរបង្កហឹង្សាតាមចិត្ត សូមមេត្តាបងប្អូនជួយ Shareផង»៕ ដោយ៖ លឹម ហុង