ភ្នំពេញៈ សម្តេចពិជ័យសេនា ទៀ បាញ់ មានប្រសាសន៍ផ្តាំផ្ញើដល់កងកម្លាំង ដែលត្រៀមចេញទៅបំពេញបេសកកម្មថែរក្សាសន្តិភាព នៅប្រទេសស៊ូដង់ខាងត្បូងត្រូវមានការប្រុងប្រយ័ត្ន និងត្រូវចេះកាពារខ្លួនពីការឆ្លងកូវីដ-១៩ ដោយត្រូវធ្វើអនាម័យ ជាមួយសាប៊ូ អាកុល ឬជែល ឲ្យបានញឹកញាប់ និងត្រូវចេះសាមគ្គីសហការគ្នាក្នុងការបំពេញការងារឱ្យបានល្អប្រសើរដើម្បីជាប្រយោជន៍សម្រាប់ ប្រទេសជាតិ ។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញជួបសំណេះសំណាលជាមួយកងអនុសេនាធំកងរាជអាវុធហត្ថលេខ ១៨៦ ដែលត្រៀមចេញទៅបំពេញ បេសកកម្មរក្សាសន្តិភាពក្រោមឆ័ត្ររបស់អង្គការសហប្រជា ជាតិ (UN) នៅសាធារណរដ្ឋស៊ូដង់ខាងត្បូង ដោយមានការអញ្ជើញចូលរួមពីសំណាក់ថ្នាក់ដឹកនាំក្រសួងការពារជាតិ អគ្គបញ្ជាការជាច្រើនរូបទៀតនៅព្រឹកថ្ងៃទី២៤ ខែសីហា ឆ្នាំ២០២០នេះ នៅវិទ្យាស្ថានហ្វឹកហ្វឺនបណ្តុះបណ្តាលកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម នៅក្នុងស្រុកឧដុង្គ ខេត្តកំពង់ស្ពឺ។
សម្តេចពិជ័យសេនា ទៀ បាញ់ បានមានប្រសាសន៍ថា៖ «ឥឡូវមិនទាន់ទៅទេ កម្លាំងដែលយើង ត្រៀមមានកម្លាំងចំនួន៧៣នាក់ ដែលជាកម្លាំងកងរាជអាវុធហត្ថ អ្វីៗយើងត្រៀមគ្រប់លក្ខណៈសម្បត្តិទាំងអស់ ទាំងមធ្យោបាយ និងតាមនិយាមរបស់អង្គការសហប្រជាជាតិ គឺដល់ពេលវេលាកម្លាំងហ្នឹង ត្រូវប្តូរគឺយើងនឹងបំពេញការងារ ប្រហែលខែក្រោយ យើងកំពុងពិនិត្យមើល»។
សម្តេចពិជ័យសេនា ទៀ បាញ់ បានបន្តថា រាជរដ្ឋាភិបាលកម្ពុជា បានត្រៀមរួចជាស្រេចនូវទីតាំងសម្រាប់ដាក់កងទ័ពមួកខៀវ ដែលនឹងបញ្ចប់បេសកកម្មរបស់ខ្លួននៅក្រៅប្រទេស ដែលវិលចូលមាតុភូមិ ដើម្បីធ្វើចត្តាឡីស័ករយៈពេល១៤ថ្ងៃ តាមវិធានសុខាភិបាលកំណត់ជាដើម ខណៈកងទ័ពមួកខៀវដែលនឹងធ្វើមាតុភូមិនិវត្តន៍សម្រាប់ឆ្នាំ២០២០ មកពីប្រទេសម៉ាលី ប្រទេសស៊ូដង់ខាងត្បូង និងអាហ្វ្រិកកណ្តាល មានចំនួនសរុបចំនួន ៤៦៣នាក់ ដែលត្រូវនិវត្តន៍ជាតំណាក់កាលបន្តបន្ទាប់ ចាប់ពីខែកញ្ញា ខាងមុខនេះ។
នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម បានឱ្យដឹងថា ទន្ទឹមនឹងការចេញដំណើររបស់កងរាជអាវុធហត្ថលេខ១៨៦ កងវិស្វកម្មព្រលានយន្តហោះលេខ ៩៧២ និងកងកម្ទេចគ្រឿងផ្ទុះលេខ៨៨២ នឹងធ្វើដំណើរទៅកាន់បេសកកម្មនៅសាធារណរដ្ឋម៉ាលី នាខែកញ្ញា ឆ្នាំ២០២០ ខាងមុខផងដែរ។
សូមបញ្ជាក់ថា បច្ចុប្បន្ននេះ កម្ពុជាមានកងទ័ពមួកខៀវចំនួន៥ កងកម្លាំងធំៗ និងមានកងកម្លាំងរក្សាសន្តិភាពសរុបចំនួន ៦៧៨នាក់ ក្នុងនោះនារីជិត៨០នាក់ បាននឹងកំពុងបំពេញបេសកកម្មរក្សាសន្តិភាព UN នៅតាមបណ្តាប្រទេសចំនួន៤ រួមមាន ៖ ប្រទេសម៉ាលី, ប្រទេសស៊ូដង់ខាងត្បូង, ប្រទេសអាហ្វ្រិកកណ្ដាល និងប្រទេសលីបង់ជាដើម ខណៈស្ថានភាពវិបត្តិជំងឺកូវិដ-១៩ នៅតាមបណ្តាប្រទេសទាំង៤ នោះកំពុងតែរីករាលដាល៕ដោយ៖បញ្ញាស័ក្តិ
