ភ្នំពេញ ៖ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានដាស់តឿនឲ្យមន្ត្រីពាក់ព័ន្ធទាំងអស់ ត្រូវត្រួតពិនិត្យមុខសញ្ញាប្រើប្រាស់ និងជនរងគ្រោះដោយសារថ្នាំញៀន រស់នៅតំបន់គ្រប់គ្រងរបស់ខ្លួន ឲ្យបានត្រឹមត្រូវ ដើម្បីផ្តល់ភាពងាយស្រួល ក្នុងការកំណត់តួលេខឲ្យបានច្បាស់លាស់ និងបង្កើនការទប់ស្កាត់ការនាំចូលគ្រឿងញៀនពីច្រកព្រំដែនឡាវបន្ថែមទៀត ខណៈការនាំចូលគ្រឿងញៀនពីតំបន់ភាគឦសាននេះ នៅតែមានកម្រិតខ្ពស់ជាងតំបន់ផ្សេងៗទៀតនោះ ។
លោកនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ថ្លែងនៅក្នុងពិធីបើកសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ២០១៧ និងទិសដៅការងារឆ្នាំ២០១៨ និងកិច្ចប្រជុំបូកសរុបលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ ឆ្នាំ២០១៧ នៅទីស្តីការក្រសួងមហាផ្ទៃ នាព្រឹកថ្ងៃទី៥ ខែកុម្ភៈ ឆ្នាំ២០១៨នេះ។ លោក បានបន្តទៀតថា ការនាំចូលនូវគ្រឿងញៀនពីតំបន់ព្រំដែនឡាវ និងផ្លូវអាកាសនៅតែច្រើនជាងគេ ។ ជាក់ស្តែងកាលពីឆ្នាំ២០១៧កន្លងទៅនេះ អាជ្ញាធរសមត្ថកិច្ចចាប់រឹបអូសគ្រឿងញៀនពីច្រកព្រំដែននោះបានប្រមាណជាងមួយរយគីឡូក្រាម ហើយបើតាមផែនការនៅឆ្នាំ២០១៨ ត្រូវតែនាំគ្នាខិតខំទប់ស្កាត់ និងពង្រឹងនៅច្រកនោះបន្ថែមទៀត ដើម្បីសន្តិសុខ និងសុវត្ថិភាពរបស់ពលរដ្ឋខ្មែរ ។
នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី បានបញ្ជាក់ទៀតថា បណ្តាខេត្តនៅភាគឦសាន្តប្រទេសនៅតែជាខេត្ត ដែលបន្តមានសកម្មភាពលួចចរាចរនាំចូលគ្រឿងញៀនដោយ ខុសច្បាប់ទោះបីយើងបង្ក្រាបបានចំករណីធំៗ និងកាត់ផ្តាច់ខ្សែរយៈទាក់ទងជាច្រើនហើយក៏ដោយ ។ ឧក្រិដ្ឋជនអន្តរជាតិនៅតែព្យាយាមប៉ុនប៉ងប្រើប្រាស់កម្ពុជា ធ្វើជាប្រទេសផលិតកែច្នៃ និងឆ្លងកាត់គ្រឿងញៀនខុសច្បាប់តាមគ្រប់រូបភាពទាំងផ្លូវគោក ទឹក និងអាកាស ។
ឧបនាយករដ្ឋមន្ត្រី កែ គឹមយ៉ាន់ បានថ្លែងថា “ទោះបីជាចំនួនអ្នកប្រើប្រាស់ មានការថយចុះចំនួន១២ភាគរយក្តី តែមានករណីខ្លះគួរឲ្យសង្ស័យ ដូច្នេះសូមគណៈអភិបាលរាជធានី-ខេត្ត រួមជាមួយគណៈអភិបាល គ្រប់គ្រងបញ្ហាគ្រឿងញៀន រាជធានី-ខេត្ត ទាំងអស់ត្រូវតាមដានឡើងវិញ អំពីបញ្ហាខាងលើនេះ ដើម្បីធ្វើយ៉ាងណាតម្រងគោលដៅឆ្នាំ២០១៨នេះ ទៅរកការបង្ក្រាប ឲ្យចំគោលដៅប្រើប្រាស់ និងចែកចាយគ្រឿងញៀន ឲ្យមានប្រសិទ្ធភាព”។
ឧបនាយករដ្ឋមន្ត្រី កែ គឹមយ៉ាន់ បានបញ្ជាក់ បច្ចុប្បន្ននេះ ការព្យាបាល និងបន្សាបជនរងគ្រោះដោយសារថ្នាំញៀន មានភាពល្អប្រសើរដោយ គ្រប់គ្រងបានកើនឡើង៩ភាគរយ បើតាមការរាយការណ៍របស់មន្ត្រីជំនាញ ជនរងគ្រោះដោយសារថ្នាំញៀន នៅសល់ប្រមាណជាង២០០០នាក់ ដែលមិនបានព្យាបាល។
លោកនាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា កាលពីឆ្នាំ២០១៧កន្លងទៅនេះ បទល្មើសគ្រឿងញៀនបង្ក្រាបបាន ៨.១៧៣ករណី បើប្រៀបធៀបឆ្នាំ២០១៦កន្លងទៅមានការកើនឡើង ៩២,៤៨ភាគរយ ដែលឆ្នាំ២០១៦ មានត្រឹមតែ៤.២៤៦ករណីនោះ ។
ជនសង្ស័យឃាត់ខ្លួនបានចំនួន ១៧.៧៩៥នាក់ កើនឡើងចំនួន ៧.៨៦២នាក់ បើធៀបនឹងឆ្នាំ២០១៦ ហើយរឹបអូសគ្រឿងញៀនពីជនល្មើសបានជិតបីរយគីឡូក្រាម ។ ដោយឡែកសម្រាប់ឆ្នាំ២០១៧នេះ ក្រុមការងារបានបន្សាបគ្រឿងញៀន ដល់អ្នកញៀនគ្រឿងញៀនបានប្រមាណជាងមួយម៉ឺននាក់ផងដែរ ហើយបានបញ្ជូនឲ្យត្រឡប់ទៅផ្ទះរបស់ពួកគេវិញចំនួនជាងប្រាំបីពាន់នាក់ ប៉ុន្តែក្នុងចំណោមជាងប្រាំបីពាន់នាក់ ដែលបានបញ្ជូនទៅផ្ទះវិញនោះបានលាប់ឡើងវិញចំនួនជាងមួយពាន់នាក់៕ ដោយ៖បញ្ញាស័ក្តិ