ភ្នំពេញ៖ លោក សុខ ចិន្តាសោភា រដ្ឋមន្ត្រីទទួលបន្ទុកក្រុមប្រឹក្សាតំបន់វិនិយោគអាស៊ាន បានលើកសរសើរ ចំពោះកិច្ចខិតខំប្រឹងប្រែងរបស់រដ្ឋសមាជិកអាស៊ានទាំងអស់ ក្នុងការអនុវត្តនូវ វិធានការចាំបាច់ និងគំនិតផ្តួចផ្តើមនានាសម្រាប់អាស៊ាន ដើម្បីរក្សាបាននូវភាពរឹងមាំ, បើកចំហរ , និងទាក់ ទាញចំពោះការវិនិយោគ , ជួយវិនិយោគិន និងផ្តល់កិច្ចសម្រួលដល់ការវិនិយោគរបស់ពួកគេ នៅក្នុងអំឡុង ពេលនៃការប្រឈម និងវេលាពុំធ្លាប់កើតមានពីមុនមក ដោយសារការរាតត្បាតនៃកូវី-១៩ ។
លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ដ្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងជារដ្ឋមន្ត្រីទទួលបន្ទុកក្រុមប្រឹក្សាតំបន់វិនិយោគអាស៊ាន (ASEAN Investment Area Council) របស់កម្ពុជា នៅព្រឹកថ្ងៃទី២៥ ខែសីហា ឆ្នាំ២០២០បានចូលរួមកិច្ចប្រជុំលើកទី២៣ នៃក្រុមប្រឹក្សាតំបន់វិនិយោគអាស៊ាន ដើម្បីពិនិត្យពិភាក្សាលើកិច្ចសហប្រតិបត្តិការវិនិយោគអាស៊ាន ក្នុងបរិបថនៃភាពតានតឹងនៃពាណិជ្ជកម្មសកល និងការរាតត្បាតនៃកូវីដ១៩។
កិច្ចប្រជុំរដ្ឋមន្ត្រីវិនិយោគអាស៊ានលើកទី២៣ សេចក្តីថ្លែងការណ៍រួម គឺលោករដ្ឋមន្ត្រី បានស្វាគមន៍ការចូលជាធរមាននៃពិធីសារ ទីពីរ និងពិធីសារទីបីស្តីពីវិសោធនកម្មកិច្ចព្រមព្រៀង វិនិយោគទូលំទូលាយអាស៊ាន (ACIA) នៅថ្ងៃទី១៨ ខែមិថុនា ឆ្នាំ២០២០ បន្ទាប់ពីអគ្គលេខាធិការអាស៊ាន បានទទួលបាននូវលិខិតូបករណ៍សច្ចាប័នចុងក្រោយ ។
លោក សុខ ចិន្តាសោភា បានថ្លែងថា ក្នុងចំណោមបញ្ហាផ្សេងៗ ពិធីសារ ទីពីរនេះបានកែសម្រួលនិយមន័យ “ រូបវន្តបុគ្គល” ក្នុងកិច្ចព្រមព្រៀងវិនិយោគទូលំទូលាយអាស៊ាន ដើម្បីដោះស្រាយ បញ្ហាពាក់ព័ន្ធនឹងប្រព្រឹត្តកម្ម នៃនិវេសនជនអចិន្ត្រៃយ៍ក្រោមកិច្ចព្រមព្រៀងនេះ ខណៈពិធីសារទីបីស្ដីពី វិសោធនកម្មកិច្ចព្រមព្រៀងវិនិយោគទូលំទូលាយអាស៊ាន បានលុបចេញនូវកថាខណ្ឌទី៨ នៃកំណត់ សម្គាល់មេ សម្រាប់បញ្ជីរក្សាសិទ្ធិនៅក្រោមកិច្ចព្រមព្រៀងវិនិយោគទូលំទូលាយអាស៊ានដែលធ្វើឱ្យមាន ការអនុវត្តល្មើភាពគ្នាចំពោះវិនិយោគិន នៃរដ្ឋសមាជិកអាស៊ានទាំងអស់ក្រោមកិច្ចព្រមព្រៀងវិនិយោគ ទូលំទូលាយអាស៊ាន។
លោករដ្ឋមន្ត្រី បានស្វាគមន៍ផងដែរ ចំពោះការបញ្ចប់ទាំងស្រុងនូវការចុះហត្ថលេខាលើពិធីសារ ទីបួន ស្តីពី វិសោធនកម្មកិច្ចព្រមព្រៀងវិនិយោគទូលំទូលាយអាស៊ាន កាលពីថ្ងៃទី១៥ ខែមិថុនា ឆ្នាំ២០២០។ ពិធីសារទីបួននេះ បានធ្វើឱ្យមាននូវការដាក់បញ្ចូល នូវការហាមឃាត់ចំពោះការតម្រូវកាតព្វកិច្ចបន្ថែម (TRIMS-plus PPR) ទៅក្នុងកិច្ចព្រមព្រៀងវិនិយោគទូលំទូលាយអាស៊ាន។
លោករដ្ឋមន្ត្រី បានកោតសរសើរ ចំពោះកិច្ចខិតខំប្រឹងប្រែងរបស់រដ្ឋសមាជិកអាស៊ានទាំងអស់ ក្នុងការអនុវត្តនូវ វិធានការចាំបាច់ និងគំនិតផ្តួចផ្តើមនានាសម្រាប់អាស៊ាន ដើម្បីរក្សាបាននូវភាពរឹងមាំ, បើកចំហរ , និងទាក់ ទាញចំពោះការវិនិយោគ , ជួយវិនិយោគិន និងផ្តល់កិច្ចសម្រួលដល់ការវិនិយោគរបស់ពួកគេ នៅក្នុងអំឡុង ពេលនៃការប្រឈម និងវេលាពុំធ្លាប់កើតមានពីមុនមក ដោយសារការរាតត្បាតនៃកូវី-១៩ ។
លោករដ្ឋមន្ត្រី បានណែនាំដល់មន្ត្រីពាក់ព័ន្ធ ឱ្យធ្វើអានុភាវូបនីយកម្មនូវគំនិតផ្តួចផ្តើមក្នុងតំបន់ ដើម្បីផ្តល់កិច្ចសម្រួលដល់ការ វិនិយោគនៅក្នុងអាស៊ាន និងត្រូវត្រៀមខ្លួនជាមុន សម្រាប់ប្រក្រតីថ្មី ក្រោយកូវីដ-១៩ ៕ដោយ៖កូឡាប