បន្ទាយមានជ័យ ៖ ពលរដ្ឋមួយគ្រួសារ សង់របងលើផ្លូវលំនៅភូមិអូរអំបិល មិនព្រមទទួលយកការសម្របសម្រួលពីអាជ្ញាធរ។ ករណីនេះ ពលរដ្ឋជាច្រើនគ្រួសារដែលរស់នៅក្បែរភូមិផងរបងជាមួយគ្នា នៅភូមិអូរអំបិល សង្កាត់អូរអំបិល ក្រុងសិរីសោភ័ណ មានការមិនពេញចិត្ត ចំពោះមួយគ្រួសារដែលរំលោភសង់របងថ្មដាក់សំណាញ់ដែក លើផ្លូវលំបង្កឲ្យមានការប៉ះពាល់ដល់គម្រោងស្ថាបនាផ្លូវក្រួសក្រហម ដែលធ្វើឲ្យរាំងស្ទះដំណើរការគម្រោងស្ថាបនាផ្លូវ ដោយសារមួយគ្រួសាមួយនោះ មិនព្រមរើរបងចេញពីផ្លូវ។
នៅព្រឹកថ្ងៃទី២៥ ខែសីហា ឆ្នាំ២០២០ អាជ្ញាធរក្រុងសិរីសោភ័ណ ដឹកនាំដោយលោក ហ៊ឹល រ៉ាយ៉ា អភិបាលក្រុងសិរីសោភ័ណ និងជំនាញនៃមន្ទីដែនដី នគរូបនីយកម្ម សំណង់ និងសូរិយោដី ខេត្តបន្ទាយមានជ័យ ដឹកនាំដោយលោក អាង ណារិទ្ធ ប្រធានមន្ទីរដែនដី បានសម្របសម្រួលជាមួយពលរដ្ឋមួយគ្រួសារ ស្នើសុំឲ្យរុះរើរបងលើផ្លូវ ក្នុងគម្រោងសាងសង់ផ្លូវក្រួសក្រហម មួយខ្សែ ដែលមានប្រវែងជាង២២០ម៉ែត្រ ទទឹង៥ម៉ែត្រ ស្ថិតនៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ហើយក៏មានការចូលរួមពីសំណាក់លពលរដ្ឋ និងអាជ្ញាធរនៅមូលដ្ឋានបានចូលរួមផងដែរ។
ជាមួយគ្នានឹងការចុះសម្របសម្រួលដោះស្រាយនោះដែរ លោក ហ៊ឹល រ៉ាយ៉ា អភិបាលក្រុង និងលោក អាង ណារិទ្ធ ប្រធានមន្ទីរដែនដី បានធ្វើការសម្របសម្រួលភាគីដែលសង់របងលើផ្លូវ ប៉ះពាល់ដល់គម្រោងសាងសង់ផ្លូវក្រួសក្រហមមួយខ្សែនេះ លោកសូមឲ្យមានការយោគយល់អធ្យាស្រ័យ ក្នុងការជួយសម្រួលនូវផលប៉ះពាល់ ដើម្បីគម្រោងឆាប់បានដំណើរការ មួយវិញទៀតនៅពេលបានផ្លូវ គឺបង្កលក្ខណៈងាយស្រួលដល់បងប្អូនធ្វើដំណើរ។
បងប្អូនពលរដ្ឋនៅមូលដ្ឋានខាងលើ សុំឲ្យភាគីខាងលើដែលសង់របងលើផ្លូវ រុះរើរបងនោះចេញ ដើម្បីអាជ្ញាធរឆាប់បានដំណើរការស្ថាបនាផ្លូវ ពីព្រោះពួកគាត់ទាំងអស់គ្នាចង់បានផ្លូវងាយស្រួលធ្វើដំណើរ ហើយពួកគាត់ទាំងអស់គ្នា យល់ព្រមជាមួយអាជ្ញាធរ ក្នុងការសម្រួលនូវផលប៉ះពាល់ហើយដែរ ដើម្បីឆាប់បានផ្លូវធ្វើដំណើរស្រួល ចំណែកភាគីខាងលើបែរជាធ្វើរបងលើផ្លូវ។ បងប្អូនពលរដ្ឋនៅមូលដ្ឋាននេះ បានបញ្ជាក់យ៉ាងខ្លីថា “ស្រឡាញ់ដីខ្លាំងណាស់គ្រួសារមួយនេះ ប្រយ័ត្នដីស្រឡាញ់វិញ លែងបានឃើញពន្លឺថ្ងៃ”។
ទោះមានការសម្របសម្រួលពីអាជ្ញាធរ និងមន្ត្រីជំនាញយ៉ាងណាក៏ដោយ ភាគីដែលសង់របងលើផ្លូវ មិនទទួលយកការសម្របសម្រួលពីអាជ្ញាធរឡើយ ដោយបានលើកឡើងថា ការធ្វើរបងនេះដោយសំអាងទៅប្លង់ដែលចេញដោយ សុរិយោដីខេត្ត។
តំណាងពលរដ្ឋនៅភូមិអូរអំបិលលោកអ៊ំ ពុយ សន បានលើកឡើងថា ៖ ផ្លូវមួយខ្សែខាងលើ គឺមានតាំងពីយូរណាស់មកហើយ ហើយពលរដ្ឋនៅមូលដ្ឋានមិនបានទាមទារអ្វីច្រើននោះទេ សុំឲ្យតែមានផ្លូវស្រួលសម្រាប់ពលរដ្ឋធ្វើដំណើរទៅមក មួយវិញទៀត ងាយស្រួលដល់សិស្សានុសិស្សដើរទៅរៀនសូត្រផងដែរ លោកអ៊ំស្នើសុំដល់អាជ្ញាធរ ធ្វើយ៉ាងណាធ្វើផ្លូវខាងមុខ និងខាងក្រោយឲ្យបានស្នើគ្នា។
តាមរយៈការចុះសម្របសម្រួលមួយព្រឹកធំ មិនទាន់មានដំណោះស្រាយនៅឡើយទេ ដោយអាជ្ញាធរ និងធ្វើការដោះស្រាយនៅជំហានបន្តបន្ទាប់ទៀត ៕
ដោយ៖បញ្ញាស័ក្តិ