ភ្នំពេញ៖ នាយឧត្តមសេនីយ៍ កែ គឹមយ៉ាន បានជំរុញឲ្យគ្រប់ភាគីពាក់ព័ន្ធធ្វើការរួមគ្នាដោះស្រាយបញ្ហាគ្រឿងញៀន និងកញ្ឆា ដែលកំពុងមានអ្នកប្រើប្រាស់ និងដាំដុះបណ្តាខេត្តដទៃ ជាពិសេសនៅខេត្តតាកែវមានជនខិលខូតលួចដាំកញ្ឆាច្រើនជាងគេ ។
ក្នុងពិធីបើកសន្និបាតបូកសរុបលទ្ធផលការងារត្រួតពិនិត្យគ្រឿង ញៀនឆ្នាំ២០១៧ និងទិសដៅការងារឆ្នាំ២០១៨ នៅព្រឹកថ្ងៃទី៥ ខែកុម្ភៈ ឆ្នាំ២០១៨នេះ នាទីស្តីការក្រសួងមហាផ្ទៃ លោកនាយឧត្តមសេនីយ៍ កែ កឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា នៅខេត្តតាកែវ អ្នកប្រើប្រាស់គ្រឿងញៀន ក្នុងឆ្នាំ២០១៧ គឺមានចំនួនរហូតដល់ជិត២ពាន់នាក់និងបានស្នើឲ្យថ្នាក់ខេត្ត និងអាជ្ញាធរជាតិប្រយុទ្ធប្រឆាំងគ្រឿងញៀនត្រូវរួមគ្នាដោះស្រាយបញ្ហានេះ នៅខេត្តតាកែវ។
លោកនាយឧត្តមសេនីយ៍ បានមានប្រសាសន៍ថា ចំពោះបញ្ហាកញ្ឆានៅខេត្តតាកែវ គឺមានការដាំដុះប្រភេទដាំណាំកញ្ឆាឡើងវិញ ច្រើនជាងបណ្តាខេត្តផ្សេងៗទៀត បើធៀបនឹងខេត្តបាត់ដំបង និងខេត្តសៀមរាប ។
លោកឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ បានលើកឡើងថា សមត្ថកិច្ចនគរបាលខេត្តតាកែវ តែងតែធ្វើការបង្ក្រាបជាប្រចាំ លើបញ្ហាការជួញដូរ និងប្រើប្រាស់គ្រឿងញៀន ហើយ រាល់ការចាប់បានជនសង្ស័យដែលប្រើប្រាស់ គ្រឿងញៀន គឺសមត្ថកិច្ចតែងតែធ្វើរបាយការណ៍ ដូច្នេះហើយបានជាចំនួននៃការប្រើប្រាស់ ឃើញថាច្រើនបែបនេះ ។
លោកឧត្តមសេនីយ៍ទោ បន្តថា បញ្ហាប្រើប្រាស់គ្រឿងញៀននៅខេត្តតាកែវនេះ គឺវាមិនទាន់មានភាពធ្ងន់ធ្ងរនោះទេ ដោយសារតែសមត្ថកិច្ចតែងតែធ្វើការបង្ក្រាបទាន់ពេលវេលានៅពេល ដែលពួកគេចាប់ផ្តើមប្រើប្រាស់នោះ ។ ចំពោះបញ្ហាកញ្ឆាវិញនោះ គឺសមត្ថកិច្ចតែងតែដាក់កម្លាំងដើម្បីធ្វើការតាមដានចំពោះការលួចដាំដុះខុសច្បាប់ និងការចរាចរណ៍នៅព្រំដែន ។
លោកស្នងការខេត្ត បានបញ្ជាក់ថា ដើម្បីលុបបំបាត់ការដាំដុះ ជួញដូរ ដោយខុសច្បាប់នូវដំនាំញ្ឆារនៅក្នុងភូមិសាស្ត្រខេត្តតាកែវ ជាពិសេសក្នុងស្រុកគិរីវង់ បានជំរុញ និងដាក់បទបញ្ជាយ៉ាងម៉ឺនម៉ាត់ដល់បណ្តាអធិការដ្ឋានចំណុះស្នងការដ្ឋាននគរបាល ឱ្យខិតខំស្រាវជ្រាវ និងបង្ក្រាបកុំអោយមានករណីខាងលើក្នុងភូមិសាស្ត្ររបស់ខ្លួនទទួលខុសត្រូវ។
សូមបញ្ជាក់ថា នៅព្រឹកថ្ងៃទី២៥ ខែមករា ឆ្នាំ២០១៨ លោកវរសេនីយ៍ឯក យុគ សារ៉ាត់ អធិការនគរបាលស្រុកគិរីវង់ រួមជាមួយកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត ដឹកនាំដោយលោកវរសេនីយ៍ទោ ម៉ាក់ សេរីវឌ្ឍនា នាយការិយាល័យ និងមានការដឹកនាំរួមដោយលោក ភិន សុភក្ត្រ័ អភិបាលរងស្រុកគិរីវង់ ដោយប្រើប្រាស់កម្លាំងសរុបចំនួន ៧១នាក់បានចុះបង្ក្រាបនិងបំផ្លាញផលដំណាំកញ្ឆា ដែលជនខិលខូចលួចដាំខុសច្បាប់ មានចំនួនរួម៥៦ទីតាំង ស្មើ២១.៣៧១ដើម អណ្តូងប្រស់ទឹក ចំនួន៦៣អណ្តូង ស្ថិតនៅចំណុច ជ្រោះឃ្លៃ .ដុបកំរ៉ែង.ដាខ្មៅ នៅក្រោមជួរភ្នំបាយ័ងកោ និង គុហារចិន ស្ថិតក្នុងភូមិជ្រោយ ឃុំព្រះបាទជាន់ជុំ ស្រុកគិរីវង់
ដែលមានផ្ទៃដីសរុប ៖៨.០៩២ម៉ែត្រការ៉េ ។
ចំណែកនៅថ្ងៃទី១៦ ខែមករា ឆ្នាំ២០១៨ ក្រោមការចង្អុលបង្ហាញពីសំណាកលោក ឧត្តមសេនីយ៏ទោ សុខ សំណាង ស្នងការ នគរបាលខេត្តតាកែវ កម្លាំងអធិការដ្ឋាននគរបាលស្រុក ដឹកនាំដោយ លោកវរសេនីយ៍ឯក យុគ សារ៉ាត់ អធិការ នគរបាលស្រុកគិរីវង់ ដឹកនាំកម្លាំងនគរបាលចំនួន៧០នាក់ បានចុះបង្ក្រាប និងបំផ្លាញចោលនូវដំណាំកញ្ឆាខុសច្បាប់ ដែលជនខិលខូចលួចដាំ ស្ថិតនៅចំណុច ជ្រោះឃ្លៃ .ដាក្រឡាញ់ ដុបជុំសេក និង ដុបបែកថ្លាំង ស្ថិតក្នុងភូមិជ្រោយ ឃុំព្រះបាទជាន់ជុំ ស្រុកគិរីវង់ មានចំនួនរួម៦៩ទីតាំង ស្មើ១៦.២៧០ដើម និងអណ្តូងប្រស់ទឹក ចំនួន៨៤អណ្តូង ដែលមានផ្ទៃដីសរុប ៥.០៧៥ម៉ែត្រការ៉េ៕ ដោយ៖បញ្ញាស័ក្តិ
