ភ្នំពេញ៖ ក្នុងកាលៈទេសៈនៃការរីករាលដាលនៃជំងឺកូវីដ-១៩ បានធ្វើឱ្យវិស័យអាកាសចរណ៍ដាំក្បាលចុះយ៉ាងខ្លាំង ដោយសារការផ្អាកជើងហោះហើរជាបន្តបន្ទាប់ ទន្ទឹមនោះក៏មានក្រុមហ៊ុនអាកាសចរណ៍ក្នុងស្រុក ចំនួន៥ បានលើកយកបញ្ហាប្រឈមនានា និងស្នើសុំឱ្យមានការហោះហើរជាបណ្តើរៗតាមដែលអាចធ្វើបាន ក្នុងបណ្តាប្រទេសអាស៊ាន។
ការស្នើឱ្យមានការហោះហើរឡើងវិញជាបណ្តើរៗនេះ បានធ្វើឡើងក្នុងកិច្ចពិភាក្សាជាមួយនឹងឯកឧត្តមនាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី២៥ ខែសីហា ឆ្នាំ២០២០។
តាមការឲ្យដឹងពីមន្ត្រីរដ្ឋលេខាធិការដ្ឋានអាកាសចរណ៍ស៊ីវិល សព្វថ្ងៃនេះ ដំណើរការជើងហោះហើររបស់កម្ពុជាពេលបច្ចុប្បន្ននេះមានពី ៧ ទៅ ១០ជើងក្នុងមួយថ្ងៃ ហើយរំពឹងថា នឹងមានការភ្ជាប់ជើងហោះហើរកាន់តែច្រើននាពេលដ៏ខ្លីខាងមុខ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានប្រាប់ឱ្យដឹងថា តាមសំណើររបស់ក្រុមហ៊ុនអាកាសចរណ៍នេះ រដ្ឋាភិបាលេខាធិការអាកាសចរណ៍ស៊ីវិលនឹងពិនិត្យឡើងវិញ និងដាក់សំណើរទៅកាន់គណៈកម្មការប្រយុទ្ធប្រឆាំងជំងឺកូវីដ ១៩ ដើម្បីពិនិត្យនឹងសម្រេចទៅលើការសម្រួលនិតិវិធីមូយចំនួន។
ប្រទេសកម្ពុជា មានក្រុមហ៊ុនអាកាសចរណ៍ចំនួន ៧ ដែលបានប្រតិបត្តិការ ក្នុងនោះរួមមាន៖ Cambodia Angkor Air, Sky Angkor Airlines, Bassaka Air, JC (Cambodia) International Airlines, Lanmei Airlines, Cambodia Airways, Prince International Airlines។
ក្រុមហ៊ុនអាកាសចរណ៍នៅក្នុងស្រុក ក៏ដូចក្រុមហ៊ុនអាកាសចរណ៍នានា បានទទួលរងនូវផលប៉ះពាល់ពីឥទ្ធិពលនៃជំងឺកូវីដ ១៩ តែរហូតមកដល់ពេលនេះ មិនមានក្រុមហ៊ុនណាមួយប្រកាសពីក្ស័យធននោះទេ ខណៈមានការជ្រោមជ្រែងពីរដ្ឋាភិបាលកម្ពុជា។
សូមបញ្ជាក់ថា ជើងហោះហើររបស់ប្រទេសកម្ពុជា ក៏ដូចជាបណ្តាប្រទេសជាច្រើននៅក្នុងតំបន់ និងពិភពលោក បាននិងកំពុងប្រឈមដោយសារការភ័យខ្លាចពីការឆ្លងនូវជំងឺកូវីដ១៩ ខណៈវិស័យមួយនេះ បានខាតបង់ទឹកប្រាក់រាប់ពាន់លានដុល្លារអាមេរិក ក្នុងវិបត្តិជំងឺនេះ៕
ដោយ៖CEN
