ភ្នំពេញ៖ នារសៀលថ្ងៃអង្គារ ទី២៥ ខែសីហា ឆ្នាំ២០២០ ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានអញ្ជើញចូលរួម ស្តាប់របាយការណ៍ របស់នាយកដ្ឋានច្រកទ្វារទី១ និងទី២ ស្តីពីសភាពការណ៍ភ្ញៀវចេញ-ចូល នៅតាមច្រកទ្វារអន្តរជាតិ ព្រមទាំងកិច្ចសហប្រត្តិបត្តិការ និងវិធានការបង្ការ ទប់ស្កាត់ការរីករាលដាលជំងឺកូវីដ-១៩ នៅអគ្គនាយកដ្ឋានអន្តោប្រវេសន៍។
ក្នុងកិច្ចប្រជុំនេះដែរ ក៏មានការអញ្ជើញចូលរួមពី ឯកឧត្តមនាយឧត្តមសេនីយ៍ ឧត្តមសេនីយ៍ឯក អគ្គនាយករងអន្តោប្រវេសន៍, ប្រធាននាយកដ្ឋាន, អនុប្រធាននាយកដ្ឋាន ព្រមទាំងមន្ត្រីជំនាញដែលពាក់ព័ន្ធ។
ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ មានប្រសាសន៍នៅក្នុងអង្គប្រជុំថា ការប្រជុំនាពេលនេះ គឺដើម្បីត្រួតពិនិត្យមើលសភាពការណ៍ច្រកទ្វារអន្តរជាតិ និងច្រកទ្វារព្រំដែនអន្តរជាតិ ដែលស្ថិតនៅក្រោមការគ្រប់គ្រង របស់អគ្គនាយកដ្ឋានអន្តោប្រវេសន៍ ក្នុងស្ថានភាពដែលកំពុងប្រឈមនឹងការរីករាលដាលជំងឺកូវីដ-១៩ ក៏ដូចជាការប្រឈម ការរារាំង ការដំណើរការរបស់ប្រទេសជិតខាង និងប្រទេសជាតិយើងទាំងមូល ដែលធ្វើឲ្យចំនួនភ្ញៀវ និងចំនួនអ្នកដំណើរឆ្លងកាត់ ចេញ-ចូល ប្រទេស មានការការថយចុះ ដោយសារតែចាត់វិធានការណ៍តឹងរ៉ឹង ដើម្បីការពារទប់ស្កាត់ ការនាំចូលជំងឺកូវីដ-១៩។
ជាមួយគ្នានេះដែរ ឯកឧត្ដម នាយឧត្តមសេនីយ៍ អគ្គនាយក ក៏បានសំណូមពរឲ្យនាយកដ្ឋានទាំងពីរ យកចិត្តទុកដាក់ធ្វើការងារតាមជំនាញ តាមគោលការណ៍របស់អគ្គនាយកដ្ឋាន គោលការណ៍ក្រសួងមហាផ្ទៃ និងតាមគោលការណ៍ក្រសួងសុខាភិបាល រួមទាំងការគ្រប់គ្រងច្រករបៀង ស្លាបឆ្វេង ស្លាបស្តាំរបស់ប៉ុស្តិ៍ ឲ្យបានតឹងរ៉ឹង ជាមួយនឹងការពិនិត្យឡើងវិញ នូវឧបករណ៍ សម្ភារៈ សម្រាប់ការពារជំងឺកូវីដ-១៩៕
ដោយ៖កូឡាប
