ក្មេងស្រីជំទង់អាយុ ១៥ ឆ្នាំ ម្នាក់ បានលោតពីលើដំបូលអគារជាន់ទី២៥ នៅស្រុក Lu ខេត្ត Sichuan ប្រទេសចិន និងធ្លាក់ចុះចំលើឪពុករបស់នាង ដែលកំពុងឈររង់ចាំចាប់ខាងក្រោម ក្នុងបំណងកុំឲ្យកូនធ្លាក់ដល់ដី។ ប៉ុន្តែ ជាអកុសល ទាំងឪពុក និងកូនស្រី បានស្លាប់ទាំងពីរដោយសារការប៉ះទង្គិចធ្ងន់ធ្ងរ។
ជុំវិញករណីនៃការស្លាប់ទាំងឪពុកនិងកូនស្រីនេះផងដែរ ត្រូវបានគេរាយការណ៍ថា បានកើតឡើងដោយសារតែការឈ្លោះប្រកែកគ្នាយ៉ាងខ្លាំងក្លាមួយ រវាងឪពុក និងកូនស្រី ខណៈដែលនាងមិនចង់ទៅហាត់រៀនលេងព្យាណូ នៅជាន់ផ្ទាល់ដីនៃអគារកើតហេតុនោះ។
មនុស្សម្នាក់ បានធ្វើការព្រមានដល់ហ្វូងមនុស្ស ដែលកំពុងប្រមូលផ្តុំគ្នានៅខាងក្រោមអគារឲ្យជៀសចេញ។ ទោះយ៉ាងណា អ្នកឈរមើលម្នាក់ ដែលស្ថិតនៅកន្លែងកើតហេតុបាននិយាយថា ឪពុករបស់ក្មេងស្រីនោះបដិសេធចាកចេញទេ និងសូម្បីរត់ទៅព្យាយាមត្រងចាប់នាង នៅពេលនាងធ្លាក់ចុះមក។ ប៉ុន្តែ គួរឲ្យសោកស្តាយ ដោយសារការប៉ះទង្គិចធ្ងន់ធ្ងរឪពុកកូនទាំងពីរក៏បានស្លាប់ភ្លាមៗនៅនឹងកន្លែងតែម្តង។
អាជ្ញាធរក៏បានព្រមានដល់សាធារណជន កុំឲ្យចែករំលែកវីដេអូនៃសកម្មភាពលោតរបស់ក្មេងស្រីផងដែរ តែពុំអាចទប់ស្កាត់បានទេ ខណៈពេលនោះវីដេអូនៃត្រូវបានចរាចរណ៍ ពាសពេញបណ្តាញសង្គមទៅហើយ៕ ដោយ៖ លឹម ហុង
