តុលាការប្រទេសញូវហ្សឺឡែនបានធ្វើការកាត់ទោសបុរសម្នាក់ដែលបានសម្លាប់មនុស្សចំនួន ៥១នាក់នៅព្រះវិហារសាសនា ២កន្លែងឲ្យជាប់គុកមួយជីវិតដោយគ្មានការដោះលែង។ ខ្មាន់កាំភ្លើងដ៏ឃោរឃៅនេះ បានក្លាយជាមនុស្សដំបូងក្នុងប្រវត្តិសាស្ត្រប្រទេសដែលទទួលទោសបែបនោះ។
ភេរវករឈ្មោះ Brenton Tarrant វ័យ ២៩ឆ្នាំ ជនជាតិអូស្ត្រាលី បានសារភាពថា លោកបានសម្លាប់មនុស្សចំនួន ៥១នាក់ និងប៉ុប៉ងសម្លាប់មនុស្ស ៤១នាក់ផ្សេងទៀត។
ការបាញ់ប្រហារភេរវកម្មដ៏កក្រើកកាលពីខែមីនា ឆ្នាំមុននៅព្រះវិហារសាសនាអ៊ីស្លាម Christchurch បានធ្វើឲ្យពិភពលោកមានការតក់ស្លុកយ៉ាងខ្លាំង។
ចៅក្រមបានហៅសកម្មភាពរបស់ភេរវកររូបនោះថាជាអំពើ “អមនុស្សធម៌”។
វាការកាត់ទោសភេរកម្មលើកដំបូងក្នុងប្រវត្តិសាស្ត្រប្រទេសញូវហ្សឺឡែន។
ចៅក្រមឈ្មោះ Cameron Mander បាននិយាយថា “ឧក្រិដ្ឋកម្មរបស់អ្នកគឺអាក្រក់ខ្លាំងណាស់ ហើយទោះបីអ្នកត្រូវបានគេដាក់គុករហូតដល់ស្លាប់ វានៅមិនទាន់គ្រប់គ្រាន់ចំពោះទោសទណ្ឌនោះដែរ”។
ការជាប់គុកដោយគ្មានការដោះលែង មានន័យថាជនប្រព្រឹត្តិនោះនឹងមិនមានឱកាសចេញពីគុកឡើយ បន្ទាប់ពីអនុវត្តទោសមួយផ្នែកនៃទោសសរុបទាំងអស់។
សូមបញ្ជាក់ថា ញូវហ្សឺឡែនមិនមានការកាត់ទោសប្រហារជីវិតឡើយ ដូច្នេះការដាក់គុកមួយជីវិតគឺជាទោសធ្ងន់បំផុតនៃប្រព័ន្ធយុត្តិធមរបស់ប្រទេសនេះ៕
ប្រែសម្រួល៖ សុភ័ក្រ
ប្រភព៖ BBC
