ភ្នំពេញ ៖ លោកឧត្តមសេនីយ៍ស្នងការរងទទួលផែនការងារប្រឆាំងគ្រឿងញៀន បានព្រមានចំពោះមន្ត្រីក្រោមឱវាទ មិនត្រូវឃុបឃិតជាប់ពាក់ព័ន្ធនឹងបទល្មើសគ្រឿងញៀន ក្នុងករណីដែលថ្នាក់លើរកឃើញ មានមន្ត្រីរូបណាជាប់ពាក់ព័ន្ធគ្រឿងញៀន ត្រូវប្រឈមទៅនឹងផ្លូវច្បាប់ ហើយលោកថា នគរបាលរាជធានីភ្នំពេញ ឱ្យបានម៉ឺងម៉ាត់ ធ្វើយ៉ាងណាបង្កើនចេញប្រតិបត្តិការបង្ការទប់ស្កាត់ និងបង្ក្រាបគ្រឿងញៀន នៅក្នុងមូលដ្ឋាន ទទួលខុសត្រូវរបស់ខ្លួន ឱ្យមានប្រសិទ្ធភាពនិងអនុវត្តជាប្រចាំមិនត្រូវដកថយនោះឡើយ ដើម្បីកាត់បន្ថយបញ្ហាបទល្មើសគ្រឿងញៀន
លោកឧត្តមសេនីយ៍ទោ ហួត ចាន់យ៉ារ៉ាន់ ស្នងការរងទទួលផែនការងារប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី២៧ ខែសីហា ឆ្នាំ២០២០ ដឹកនាំកិច្ចប្រជុំផ្សព្វផ្សាយ ផែនការ និងបទបញ្ជារបស់ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ អនុវត្តវិធានការរឹតបន្តឹងយុទ្ធនាការប្រយុទ្ធប្រឆាំងគ្រឿងញៀននៅក្នុងរាជធានីភ្នំពេញឱ្យមានប្រសិទ្ធភាពខ្ពស់ដែលមានការចូលរួមពីលោកនាយនាយរងការិយាល័យនគរបាលប្រឆាំងគ្រឿងញៀន លោក អធិការរង លោកនាយផ្នែក ទទួលការងារប្រឆាំងគ្រឿងញៀននៃអធិការដ្ឋាននគរបាលខណ្ឌទាំង១៤។
កិច្ចប្រជុំនោះក្រោយពីគេមើលឃើញថា អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ឯកឧត្តម ឧត្តមសេនីយ៍ឯក ស ថេត កាលពីថ្ងៃទី២៦ ខែសីហា ម្សិលមិញ បានដឹកនាំកិច្ចប្រជុំបូកសរុបភាពការណ៍សន្តិសុខ សណ្តាប់ធ្នាប់សង្គមប្រចាំខែសីហា លើកទិសដៅការងារប្រចាំខែកញ្ញា បានដាក់ផែនការនិងបទបញ្ជាឱ្យកម្លាំងនគរបាលរាជធានីភ្នំពេញ ត្រូវបង្កើនចេញប្រតិបត្តិការបង្ការទប់ស្កាត់ និងបង្ក្រាបគ្រឿងញៀន ឱ្យមានប្រសិទ្ធភាពបំផុត។ជាពិសេសបង្ការទប់ស្កាត់ចេញបង្ក្រាប់នៅរង្គសាល ក្លិបកម្សាន្ត តូចធំនិងទីតាំងផ្សេងទៀត ដែលលួចលាក់ធ្វើសកម្មភាព ចាត់ចែងសម្រួលឱ្យប្រើប្រាស់ខុសច្បាប់ នូវសារធាតុញៀន។
លោកឧត្តមសេនីយ៍ទោ ហួត ចាន់យ៉ារ៉ាន់ ស្នងការរងទទួលផែនការងារប្រឆាំងគ្រឿងញៀន បានណែនាំមន្ត្រីនគរបាល ដែលទទួលការងារប្រឆាំងគ្រឿងញៀន ត្រូវអនុវត្តតាមផែនការ និងបទបញ្ជារបស់ឯកឧត្តមអគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ឱ្យបានម៉ឺងម៉ាត់ ធ្វើយ៉ាងណាបង្កើនចេញប្រតិបត្តិការបង្ការទប់ស្កាត់ និងបង្ក្រាបគ្រឿងញៀន នៅក្នុងមូលដ្ឋាន ទទួលខុសត្រូវរបស់ខ្លួន ឱ្យមានប្រសិទ្ធភាពនិងអនុវត្តជាប្រចាំមិនត្រូវដកថយនោះឡើយ ដើម្បីកាត់បន្ថយបញ្ហាបទល្មើសគ្រឿងញៀន និងធានាបានសុខសុវត្ថិភាពសង្គម។ គ្រឿងញៀនបានបង្កឱ្យកើតអំពើអសន្តិសុខដែលធ្វើឱ្យប្រជាពលរដ្ឋព្រួយបារម្ភនិងភ័យខ្លាច។
លោកឧត្តមសេនីយ៍ស្នងការរង ក៏បានព្រមានចំពោះមន្ត្រីក្រោមឱវាទ មិនត្រូវឃុបឃិតជាប់ពាក់ព័ន្ធនឹងបទល្មើសគ្រឿងញៀន ក្នុងករណីដែលថ្នាក់លើរកឃើញ មានមន្ត្រីរូបណាជាប់ពាក់ព័ន្ធគ្រឿងញៀន ត្រូវប្រឈមទៅនឹងផ្លូវច្បាប់។ ម្យ៉ាងទៀតនៅពេលបំពេញភារកិច្ចត្រូវស្មោះត្រង់និងវិជ្ជាជីវៈ ចៀសវាងធ្វើសម្មភាពណាមួយខុសច្បាប់ ដែលបង្កឱ្យប៉ះពាល់កិត្តិយសអង្គភាព និងសេចក្តីថ្លៃថ្នូរនគរបាលជាតិ ៕
ដោយ : កូឡាប