ភ្នំពេញ៖ ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា មានប្រសាសន៍ថា ចាប់តាំងពីមានការផ្ទុះឡើងនូវជំងឺវីរុសCOVID-19នេះមក ប្រទេសទាំងពីរចិននិងកម្ពុជាបានជួយយកអាសាគ្នាទៅវិញទៅមក និងបានជម្នះរាល់ឧបសគ្គជាមួយគ្នា បង្កើតបានជាគំរូនៃកិច្ចសហប្រតិបត្តិការទប់ស្កាត់នឹងជំងឺវីរុសសម្រាប់សហគមន៍អន្តរជាតិ ហើយចំណងមិត្តភាពជាប្រពៃណីរវាងប្រទេសទាំងពីរនេះ ត្រូវបានលើកកម្ពស់ថែមមួយកម្រិតទៀតបន្ទាប់ពីឆ្លងកាត់ការលំបាកទាំងនេះ។
ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា បានថ្លែងបែបនេះ ក្នុងកិច្ចសម្ភាសន៍ជាមួយទូរទស្សន៍ជាតិកម្ពុជា ស្តីអំពីកិច្ចសហប្រតិបត្តិការរវាងចិននិងកម្ពុជា ក្នុងកិច្ចទប់ស្កាត់នឹងជំងឺវីរុសCOVID-19 និងកិច្ចសហប្រតិបត្តិការផ្សេងទៀត។
ឯកឧត្តម បានបង្ហាញថា ជំងឺវីរុសគ្មានព្រំដែន វាជាបញ្ហាប្រឈមជាទូទៅមួយសម្រាប់មនុស្សជាតិទាំងឡាយ។ នៅចំពោះមុខការផ្ទុះឡើងភ្លាមៗរបស់ជំងឺវីរុសមួយនេះ ការសិក្សាពីគ្នា និងជួយគ្នាទៅវិញទៅមក គឺជាអត្ថន័យដែលមាននៅក្នុងកិច្ចទប់ស្កាត់នឹងជំងឺវីរុសមួយនេះ សម្រាប់កិច្ចសហប្រតិបត្តិការសហគមន៍អន្តរជាតិ។ ការសហការសាមគ្គីគ្នារវាងប្រទេសទាំងពីរ ក្នុងដំណើរកិច្ចទប់ស្កាត់នឹងជំងឺវីរុស គឺជាសក្ខីភាពដ៏ល្អប្រសើរបំផុតសម្រាប់សហគមន៍ជោគវាសនារួម និងការរួមសុខទុក្ខលើក្បូនតែមួយ របស់មនុស្សជាតិទាំងឡាយ។
ឯកឧត្តម បានសង្កត់ធ្ងន់ថា ឆ្នាំនេះគឺជាខួបអនុស្សាវរីយ៍លើកទី ១ នៃការចុះហត្ថលេខាអនុវត្តផែនការសកម្មភាព កសាងសហគមន៍ជោគវាសនារួម រវាងចិននិងកម្ពុជា។ ភាគីចិន រីករាយបន្តខិតខំប្រឹងប្រែងជាមួយភាគីកម្ពុជា ដើម្បីសម្របសម្រួលជំរុញកិច្ចការពារ សម្រាប់ជំងឺវីរុសមួយនេះ និងដំណើរការសាជាថ្មី នៃសកម្មភាពផលិតកម្ម បន្តអនុវត្តផែនការសកម្មភាពកសាងសហគមន៍ជោគវាសនារួម រវាងចិននិងកម្ពុជា ជំរុញកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ នៃប្រទេសទាំងពីរ ដើម្បីទទួលបានការអភិវឌ្ឍន៍ កាន់តែធំ និងកាន់តែឆាប់រហ័ស ក្នុងយុគសម័យថ្មីនេះ៕ដោយ៖កូឡាប
