ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានចេញសេចក្តីជូនដំណឹងស្តីពីការទប់ស្កាត់ការចរាចរផលិតផលក្លែងក្លាយ-ខុសច្បាប់ ដែលកំពុងចរាចរនៅលេីទីផ្សារកម្ពុជា និងការចូលរួមទប់ស្កាត់ជនទុច្ចរិតបានបន្លំ និងតាំងខ្លួនជាសមត្ថកិច្ចមកពី គ.ប.ផ.ក ក្នុងន័យបង្កាច់បង្ខូចកិត្តិយស និងសេចក្តីថ្លៃថ្នូរ របស់អង្គភាព គ.ប.ផ.ក។
ខ្លឹមសារលម្អិតក្នុងសេចក្តីជូនដំណឹង បានបញ្ជាក់ថា គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់ សុខភាព និងសុវត្ថិភាពសង្គម (គ. ប.ផ.ក) សូមជម្រាបជូនដល់សាធារណជន មេត្តាជ្រាបថា ក្នុងគោលដៅ ការពារ និងថែរក្សាសុខុមាលភាពប្រជាពលរដ្ឋ និងសុវត្ថិភាពសង្គម ចំពោះការប្រើប្រាស់ផលិតផល់ ដែលកំពុង ចរាចរក្នុងទីផ្សារនៃព្រះរាជាណាចក្រកម្ពុជា គណៈកម្មាធិការ គ.ប.ផ.ក បានពិនិត្យឃើញថា មានផលិតផល ក្លែងក្លាយ – ខុសច្បាប់ ខូចគុណភាព ហួសសុពលភាពប្រើប្រាស់ បន្លំគុណភាព បន្លំការវេចខ្ចប់ ឬស្តុកទុកមិនត្រឹមត្រូវតាមស្តង់ដាបច្ចេកទេស ទាំងផលិតផលក្នុងស្រុក និងនាំចូល រួមទាំងផលិតផលកែច្នៃ ដោយគ្មានការអនុញ្ញាតពីក្រសួង-ស្ថាប័នមានសមត្ថកិច្ច ហើយបានកំពុងបន្លំលក់ និងចរាចរនៅលើទីផ្សារ ជាមួយផលិតផលពិតមានច្បាប់អនុញ្ញាតត្រឹមត្រូវបណ្តាលឲ្យប៉ះពាល់យ៉ាងធ្ងន់ធ្ងរដល់សុខភាព និងសុវត្ថិភាពសង្គម ដែលជាហានិភ័យសម្រាប់ជីវភាពរស់នៅរបស់ប្រជាពលរដ្ឋ គ្រួសារ សហគមន៍ និងសង្គមជាតិ ។ ជាមួយគ្នានេះដែរនាពេលថ្មីៗមានក្រុមទុច្ចរិតបានបន្លំ និងតាំងខ្លួនជាសមត្ថកិច្ចមកពី គណៈកម្មាធិការ គ.ប.ផ.ក ក្នុងន័យបង្កាច់បង្ខូចកិត្តិយស និងសេចក្តីថ្លៃថ្នូររបស់អង្គភាពក្រោមរូបភាពគំរាម និងជំរិតរកលាភសក្ការៈពីម្ចាស់អាជីវកម្មនានា ជាហេតុនាំឲ្យមានការយល់ច្រឡំដល់មតិសាធារណជន និងក្រសួង-ស្ថាប័ននានា ដែលកំពុងអនុវត្តតាមបទបញ្ញត្តិនៃច្បាប់ជាធរមាន។ សូមបញ្ជាក់ថា ការចុះបំពេញការងាររបស់សមត្ថកិច្ចមកពីគណៈកម្មាធិការ គ.ប .ផ.ក ត្រូវមានលិខិតបង្គាប់ការចេញដោយ ប្រធានគណៈកម្មាធិការ និងការសហការ ពីស្ថាប័នពាក់ព័ន្ធបង្កើតជាក្រុមការងារ ដោយមិនមានការចុះជាបុគ្គលនោះទេ។ ដើម្បីរួមចំណែកទប់ស្កាត់ និងប្រយុទ្ធប្រឆាំងរាល់ការចរាចរផលិតផល ដែលបង្កគ្រោះថ្នាក់មាន ហានិភ័យខ្ពស់ដល់សុខភាព និងសុវត្ថិភាពសង្គម ឬសកម្មភាពទុច្ចរិតខាងលើ ឲ្យមានប្រសិទ្ធភាព គណៈ កម្មាធិការ គ.ប.ផ.ក សូមអំពាវនាវដល់សាធារណជនទាំងអស់ចូលរួម និងសហការផ្តល់ព័ត៌មានអំពីទីតាំង ផលិត ការចែកចាយផលិតផលគ្មានការអនុញ្ញាត និងក្រុមទុច្ចរិតទាំងអស់នោះមកគណៈ កម្មាធិការ គ.ប.ផ.ក៕ ដោយ៖បញ្ញាស័ក្តិ