ខេត្តរតនគិរី ៖ មន្ត្រីឧទ្យានុរក្សទីស្នាក់ការភូមិចង បានឃាត់ខ្លួនជនសង្ស័យជនជាតិវៀតណាមម្នាក់ជាព្រានព្រៃ មកមន្ទីរបរិស្ថានខេត្តរតនគិរី ដើម្បីចង់ក្រងសំណុំរឿងតាមនីតិវិធី ដោយសារដាក់អន្ទាក់យកសត្វព្រៃដោយខុសច្បាប់ ដើម្បីលក់លើទីផ្សារ។
មន្ទីរបរិស្ថានខេត្តរតនគិរី នៅថ្ងៃទី២៨ ខែសីហា ឆ្នាំ២០២០នេះ បានចេញផ្សាយព័ត៌មានថា នៅថ្ងៃទី២៧ ខែសីហា ឆ្នាំ២០២០ មន្ត្រីឧទ្យានុរក្សទីស្នាក់ការភូមិចង បានចុះល្បាតនៅចំណុចអូរឡាប៉ងឧទ្យានជាតិវីរៈជ័យ ប្រទះឃើញមានការបោះជំរុំមួយកន្លែង ដើម្បីធ្វើសកម្មភាពប្រមាញ់ និងដាក់អន្ទាក់ចាប់សត្វព្រៃគ្រប់ប្រភេទ។
ក្រុមការងារបានធ្វើការត្រួតពិនិត្យឃើញថា មានអន្ទាក់ប្រភេទខ្សែកាបចំនួន៩ និងអង្គប់ដែក អូតូម៉ាទិច (អន្ទាក់ខ្លា) ចំនួន៣ សាច់សត្វប្រើស ២ដុំ សាច់ស្វាមួយដុំ (ឆ្អើ ) ញញួរ១ ទូរស័ព្ទដៃ១គ្រឿង និងខ្សែអន្ទាក់ចំនួន២០ទៀត កំពុងបានដាក់ក្នុងព្រៃឧទ្យានជាតិវីរៈជ័យ។
សកម្មភាពល្មើសនេះ បង្កឡើងដោយឈ្មោះ ហួង វ៉ានកុង ភេទប្រុស អាយុ៤៦ឆ្នាំ ជនជាតិវៀតណាម។ ដោយមានការអនុញ្ញាតពីលោកព្រះរាជអាជ្ញារង លាង អ៊ូ តំណាងអយ្យការសាលាដំបូងខេត្ត ក្រុមការងារ បានឃាត់ខ្លួនជនសង្ស័យមកមន្ទីរ ដើម្បីចង់ក្រងសំណុំរឿងតាមនីតិវិធី៕ ដោយ៖កូឡាប