ភ្នំពេញ ៖ នារីជាកម្មការិនីរោងចក្រម្នាក់ស្លាប់ដោយផ្លែកាំបិតចុងស្រួច របស់បុរសដៃឆៅម្នាក់ ព្រោះតែខឹងចូលស្តីដណ្តឹងនាងមិនបាន ឈានដល់តាមធ្វើសកម្មភាពចាក់សម្លាប់តែម្តង ។
ហេតុណ៍កាលនេះនៅពីវេលាម៉ោង៧និង៤៥នាទីព្រឹកថ្ងៃទី២៨ ខែសីហា ឆ្នាំ២០២០ នៅតាមផ្លូវបេតុងក្បែររោងចក្រ ក្នុងភូមិត្រពាំងឈូក សង្កាត់កន្ទោក ខណ្ឌកំបូល រួចជនដៃដល់ជិះម៉ូតូរត់គេចទៅចងកសម្លាប់ខ្លួននៅដើមអង្កាញ់ ក្នុងបរិវេណវត្តស្ងួនពេជ្រ ភូមិស្ងួនពេជ្រ សង្កាត់កន្ទោក ខណ្ឌកំបូល បង្កឲ្យភ្ញាក់ផ្អើលកាលពីវេលា
ម៉ោង៨និង៣០នាទីព្រឹកថ្ងៃដដែល ។
ជនរងគ្រោះមានឈ្មោះ យិន ស្រីនី អាយុ២៨ឆ្នាំ មុខរបរកម្មការិនីរោងចក្រ BDB មានទីលំនៅភូមិតានួន សង្កាត់កំបូល ខណ្ឌកំបូល រាជធានីភ្នំពេញ។ ចំណែកឯជនដៃឆៅឈ្មោះ ឆន លឹមតិច អាយុ២៤ឆ្នាំ មុខរបរកម្មកររោងចក្រ ផ្នែកខាងគ្រឿងអេឡិចត្រូនិច មានទីលំនៅ ភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល ។
តាមប្រភពនៅកន្លែងកើតហេតុ បរិវេណវត្តស្ងួនពេជ្រ បានឲ្យដឹងថា កន្លងមកនារីរងគ្រោះ និងជនដៃដល់ ធ្លាប់រៀនជាមួយគ្នា ធ្លាប់ស្រឡាញ់គ្នាម្តងហើយ លុះដល់ធ្វើការងាររោងចក្រផ្សេងគ្នា ហើយជនដៃដល់បើតាមអ្នកធ្លាប់ស្គាល់មិត្តភ័ក្តិធ្វើការជាមួយគ្នា ប្រាប់ឲ្យដឹងថា ជនដៃដល់មានស្រី មានសង្សារច្រើន ក៏ប៉ុន្តែមួយរយៈចុងក្រោយនេះ ជនដៃដល់មកសុំស្រឡាញ់នារីរងគ្រោះ រហូតដល់ជនដៃដល់ប្រាប់ឲ្យក្រុមគ្រួសារ ចូលស្តីដណ្តឹងនាង កាលពី៣ថ្ងៃមុនកើតហេតុ តែនាងនិងក្រុមគ្រួសារ មិនពេញចិត្ត ព្រោះតែមានស្រីច្រើនពេក មិនអាចទទួលយកជាគូរអនាគតបានឡើយ ។
យោងតាមប្រភពបន្តទៀតឲ្យដឹងថា ក្រោយពីចូលស្តីដណ្តឹងខាងស្រីគេមិនព្រមឲ្យ តូចចិត្តខឹង បែកគំនិតគុំគួនសងសឹក រហូតមកដល់វេលាម៉ោង៧និង៤៥នាទីព្រឹកថ្ងៃទី២៨នេះ ជនសង្ស័យជិះម៉ូតូតាមពីក្រោយនារីរងគ្រោះ គ្រាដែលនារីរងគ្រោះកំពុងជិះម៉ូតូZOOMER ពណ៌ទឹកក្រូច ពាក់ផ្លាកលេខ ភ្នំពេញ 1 DP-0547 ទៅធ្វើការរោងចក្រ ប្រើប្រាស់កាំបិតចុងស្រួចចាក់ បណ្តាលឲ្យស្លាប់ភ្លាមៗនៅកន្លែង ហើយជនដៃដល់ជិះម៉ូតូ ហុងដាឌ្រីម ស៊េរី២០១២ ពណ៌ខ្មៅ ពាក់ផ្លាកលេខ ភ្នំពេញ 1BN-9027 រត់គេចចូលទៅចងកសម្លាប់ខ្លួន នៅលើដើមអង្កាញ់ ក្នុងបរិវេណវត្តស្ងួនពេជ្រ ភូមិស្ងួនពេជ្រ សង្កាត់កន្ទោក ខណ្ឌកំបូល ដោយប្រើប្រាស់ក្រម៉ាចងភ្ជាប់នឹងដើមឈើ ។
ក្រោយពេលកើតហេតុ នារីរងគ្រោះនោៈត្រូវបានសមត្ថកិច្ចជំនាញ ចុះទៅពិនិត្យ កោលសល្យវិច័យ ឃើញថាពិជាករណីឃាតកម្ម រួចប្រគល់សាកសពជូនក្រុមគ្រួសារដឹកយកទៅធ្វើបុណ្យតាមប្រពៃណី ។ រីឯសពជនដៃដល់ ចងកសម្លាប់ខ្លួន ត្រូវបានសមត្ថកិច្ចជំនាញចុះទៅពិនិត្យកោសល្យវិច័យ និងរងចាំប្រគល់ជូនក្រុមគ្រួសារ ចាត់ចែងដឹកយកទៅធ្វើបុណ្យតាមប្រពៃណី ៕ដោយ៖មីដា ផាន់ណា
