បាត់ដំបង ៖ អាជ្ញាធរខេត្តបាត់ដំបង និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ USAID ប្រចាំនៅកម្ពុជា បានបើកដាក់ឲ្យដំណើរការជាផ្លូវការ នូវឧបករណ៍Chatbot និងឧបករណ៍ឆ្លើយតបសម្លេងអន្តរកម្ម(IVR) ដែលជាបច្ចេកវិទ្យាទំនើបកម្ម ក្នុងការជួយសម្រួលសេវាកម្មច្រកចេញ-ចូលតែមួយ និងជួយសម្រួលដល់ការលំបាក ដើម្បីផ្តល់នូវព័ត៌មានជាក់លាក់ ជូនដល់ពលរដ្ឋដែលមានតម្រូវការនិងមកទទួលនូវសេវា។
ឯកឧត្តម សឿម ប៊ុនរិទ្ធិ អភិបាលរងខេត្តបាត់ដំបង បានមានប្រសាសន៍ថា ឧបករណ៍Chatbot និងឧបករណ៍ឆ្លើយតបសំឡេងអន្តរកម្ម(IVR) ដែលជាបច្ចេកវិទ្យាទំនើបកម្ម ក្នុងការជួយសម្រួល សេវាកម្មច្រកចេញ-ចូលតែមួយ និងជួយសម្រួលដល់ការលំបាក និងដើម្បីផ្តល់នូវព័ត៌មានជាក់លាក់ ជូនដល់ពលរដ្ឋដែលមានតម្រូវការ និងមកទទួលនូវសេវា។ ឧបករណ៍បច្ចេកវិជ្ជា ដែលបានដាក់ឲ្យដំណើរការនៅក្នុងក្រុង-ស្រុកចំនួន៥ ដែលជាជំនួយនៃទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិ USAID ប្រចាំនៅកម្ពុជា ដែលប្រព្រឹត្តធ្វើឡើងនៅសាលប្រចុំសណ្ឋាគារ ក្លាស់ស៊ីខេត្តបាត់ដំបង ក្រោមអធិបតីភាពលោកស្រី វីណា រេឌី ប្រធានទីភ្នាក់ងារUSAID ប្រចាំកម្ពុជា និងលោក ឡិន ឌែលហ្វូន ដែលជានាយកកម្មវិធីនៃគម្រោងច្រកចេញ-ចូលតែមួយ ព្រមទាំង លោកនាយកគ្រប់គ្រងក្រុមហ៊ុន Nickl Global Solutions និងក្រុមហ៊ុន ដែលជាដៃគូរួមមានក្រុមហ៊ុន InS_TEDD ilab Southeast Asia និងវិទ្យាស្ថានគាំពារគោលនយោបាយ API ព្រមទាំងវត្តមានអាជ្ញាធរស្រុកក្រុង គោលដៅទាំង៥ ក្នុងនោះរួមមាន ក្រុងបាត់ដំបង ស្រុកមោងឫស្សី ស្រុថ្មគោល ស្រុកបវេល និងស្រុកកំរៀងផងដែរ។
ឯកឧត្តម សឿម ប៊ុនរិទ្ធិ បានមានប្រសាសន៍ ចាត់ទុកការបើកនិងដាក់ឲ្យដំណើរការជាផ្លូវការ តាមរយៈនៃការសម្ពោធបើកឲ្យប្រើប្រាស់ជាផ្លូវការ នូវបច្ចេកវិទ្យាទំនើបកម្មសម្រាប់គម្រោងនៃច្រកចេញ-ចូលតែមួយ ជាមួយឧបករណ៍ Chatbot និងឧបករណ៍ឆ្លើយតបសំឡេងអន្តរកម្ម (IVR) ដល់ស្រុកគោលដៅទាំង៥ ខាងលើនេះ គឺក្នុងគោលបំណងដើម្បីលើកកម្ពស់គណនេយ្យភាពសង្គម សម្រាប់ការផ្តល់សេវា និងជួយសម្រាលការងារស្មុគស្មាញកន្លងមក នៅក្នុងការិយាល័យច្រកចេញចូលតែមួយ តាមរយៈនៃប្រព័ន្ធបច្ចេកវិទ្យាព័ត៌មាន (OWSO-PEA) នាពេលនេះព្រមទាំងជួយសម្រួលដល់បងប្អូនប្រជាពលរដ្ឋ ដើម្បីទទួលបាននូវព័ត៌មានជាក់លាក់ ដែលជាតម្រូវការក្នុងការទទួលនូវសេវា ពីច្រកចេញចូលតែមួយនៅតាមបណ្តាស្រុក-ក្រុង របស់ខ្លួន។ ដោយមានការយកចិត្តទុកដាក់ ពីថ្នាក់ដឹកនាំកំពូលនៃក្រសួងមហាផ្ទៃ បានកំណត់ដោយដាក់ឱ្យដំណើរការសាកល្បង នូវការិយាល័យច្រកចេញ-ចូលតែមួយ ក្នុងក្រុងចំនួន២ មុនគេ គឺការិយាល័យច្រកចេញ-ចូលតែមួយក្រុងបាត់ដំបង និងក្រុងសៀមរាប ដោយមានការគាំទ្រនិងការជឿទុកចិត្ត ពីប្រជាពលរដ្ឋនៃក្រុងទាំង២នេះ។ ក្រសួងមហាផ្ទៃ បានដាក់ចេញនូវការបង្កើតការិយាល័យច្រកចេញ-ចូលតែមួយ និងការិយាល័យប្រជាពលរដ្ឋនៅថ្នាក់ក្រុង ស្រុក ខណ្ឌ ព្រមទាំងបានដាក់ឱ្យដំណើរជាបន្តបន្ទាប់ប្រមាណជាង ១១៥ក្រុង ស្រុក ខណ្ឌ គិតត្រឹមឆមាសទី១ ឆ្នាំ២០២០នេះ។ ដោយឡែក នៅក្នុងខេត្តបាត់ដំបង គឺមានការិយាល័យច្រកចេញ-ចូលតែមួយ មានចំនួន១០ក្រុងស្រុក ហើយនៅសល់ ៤ស្រុកទៀត ដែលកំពុងតែអនុវត្តតាមយន្តការច្រកចេញចូលតែមួយ។
លោកស្រីប្រធានទីភ្នាក់ងារUDAID ប្រចាំកម្ពុជា និងជាម្ចាស់គម្រោងសម្រាប់ច្រកចេញចូលតែមួយ បានមានប្រសាសន៍ឲ្យដឹងថា សារប្រយោជន៍ពីការដាក់ឲ្យដំណើរការគម្រោងនេះ គឺវាពិតជាផ្តល់នូវផលប្រយោជន៍រួម ក្នុងការជួយដល់ពលរដ្ឋដែលមានតម្រូវការ ដើម្បីមកទទួលសេវានិងពីលក្ខខណ្ឌចាំបាច់ ដែលតម្រូវឲ្យពលរដ្ឋត្រៀមរៀបចំ និងបានយល់ដឹងជាមុននូវឯកសារពាក់ព័ន្ធ មុននិងយកមកកាន់ច្រកចេញចូលតែមួយ ដើម្បីទទួលនូវសេវាបានឆាប់រហ័ស និងបញ្ឈប់ពីភាពស្មុគស្មាញ ធ្លាប់កើតមានកន្លងមក ដោយគ្រាន់តែឆែកទូរស័ព្ទដៃធម្មតារបស់ខ្លួន តាមរយៈលេខកូដណែនាំ គឺនិងអាចទទួលបាននូវព័ត៌មានដែលខ្លួន ចង់ដឹងនៅលើទូរស័ព្ទដៃធម្មតា ឬក៏នៅលើស្មាតហ្វូនរបស់ខ្លួនជាដើម គ្រប់ព័ត៌មានដែលទាក់ទិនជាតម្រូវការនៅរបស់ខ្លួន ជាមួយនឹងច្រកចេញ-ចូលតែមួយ របស់ស្រុក-ក្រុងរបស់ខ្លួន។ ការបង្កើតឡើងនូវការិយាល័យច្រកចេញចូលតែមួយនេះ ដើម្បីបង្ខិតការផ្តល់សេវារដ្ឋបាលឲ្យនៅកៀកជិតនឹងប្រជាពលរដ្ឋ ដោយបង្កនូវភាពងាយស្រួល ក្នុងការផ្តល់សេវាជូនប្រជាពលរដ្ឋឱ្យបានលឿន ឆាប់រហ័សប្រកបដោយប្រសិទ្ធភាព ប្រសិទ្ធផលនិងគុណភាព តម្លាភាពនិងឆ្លើយតបបានទាន់ពេលវេលា ឆ្លើយតបទៅតម្រូវការរបស់ប្រជាពលរដ្ឋ៕ ដោយ ៖ អ៊ុងសារុំ
