កំពង់ស្ពឺ ÷ ខារ៉ាអូខេ បង្កប់សេវារួមភេទបំពានច្បាប់នៅស្រុកឱរ៉ាល់ ត្រូវកម្លាំងនគរបាលការិយាល័យប្រឆាំងការជួញដូរមនុស្សនិងការពារអនីតិជននៃស្នង ការដ្ឋាននគរបាលខេត្តកំពង់ស្ពឺ ឆ្មក់ចូលបង្ក្រាបរំដោះនារីរងគ្រោះ បាន៣នាក់ ឃាត់ខ្លួនថៅកែម្នាក់។
នារសៀល ថ្ងៃទី២៨ខែសីហា ឆ្នាំ២០២០កម្លាំងការិយាល័យប្រឆាំងការជួញដូរ មនុស្សនិងការពារអនីតិជន នៃស្នងការដ្ឋាននគរបាលកំពង់ស្ពឺ ដឹកនាំដោយលោកស្រីវរសេនីយ៍ទោ មួន មល្លិកា នាយការិយាល័យ បានឆ្មក់ចូលបង្ក្រាប នៅទីតាំងខារ៉ាអូខេ យីហា រាត្រីប្រជុំមិត្ត ដែលមានថៅកែឈ្មោះ សន ស៊ឹម ភេទប្រុស អាយុ៤១ឆ្នាំ រស់នៅភូមិ ស្វាយទាប ឃុំត្រពាំងជោរ ស្រុកឳរ៉ាល់ ខេត្តកំពង់ស្ពឺ ។
តាមការឱ្យដឹងពីលោកស្រី នាយការិយាល័យថាទីតាំងខារ៉ាអូខេខាងលេី គឺបានប្រព្រឹត្ដផ្ទុយទៅនឹងសេចក្ដីណែនាំរបស់រាជរដ្ឋាភិបាលដែលបានហាមប្រាមមិនឲ្យគ្រប់ទីតាំងខារ៉ាអូខេបម្រេីសេវាជាលក្ខណៈបេីកច្រៀងក្នុងបន្ទប់ដោយត្រូវប្រែក្លាយមកជាការបេីកលក្ខណៈភោជនីយដ្ឋានធម្មតា លេីសពីនោះជំនាញបានស្រាវជ្រាវរកឃេីញថាទីតាំងនោះមានលួចបេីកផ្ដល់ឱ្យមានសេវាផ្លូវភេទ(សញ្ចារកម្ម) ។
ដោយបានគោលការណ៍ដ៏ខ្ពង់ខ្ពស់ពីលោកឧត្ដមសេនីយ៍ទោ សម សាមួន ស្នងការនគរបាលខេត្ដ ជំនាញបានបញ្ជូនខ្លួនថៅកែរួមជាមួយវត្ថុតាង ៖
ស្រោមអនាម័យ១ថង់ (ប្រើរួច) ផ្ទាំងរូបអាសអាភាសចំនួន២ផ្ទាំង មកស្នងការដ្ឋាននគរបាលខេត្ត ចំណាត់ការតាមនីតិវិធីច្បាប់ ។ ក្នុងប្រតិបត្តិការបានរំដោះនារីរងគ្រោះចំនួន៣នាក់ប្រគល់ឱ្យមជ្ឍមណ្ឌលស្ដារនីតិសម្បទាជួយផ្នែកស្ដ្រីងាយរងគ្រោះដេីម្បីជួយផ្នែកស្មារតីនិងផ្ដល់ចំណេះជំនាញ ទៅរកមុខរបរថ្មី៕ ដោយ៖កូឡាប
