ភ្នំពេញ៖ ក្រសួងសាធារណការនិងដឹកជញ្ជូនបានប្រកាសផ្សាយព័ត៌មានថា គម្រោងសាងសង់ផ្លូវក្រវាត់ក្រុងទី៣ (ចាប់ពីផ្លូវជាតិលេខ ៤ ដល់ផ្លូវជាតិលេខ ១) មានប្រវែង សរុបជិត ៥៣គីឡូម៉ែត្រ ជាប្រភេទផ្លូវក្រាលបេតុង ស៊ីម៉ង់ត៍សរសៃដែក និងបេតុងកៅស៊ូ (AC) ហើយគិតត្រឹមខែមិថុនា ឆ្នាំ ២០២០ សម្រេចបាន ៣៩% ។
សូមបញ្ជាក់ថា៖ គម្រោងនេះ ត្រូវបានបើកការដ្ឋានសាងសង់ ក្រោម អធិបតីភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី ១៤ ខែមករា ឆ្នាំ២០១៩ ដែលគ្រោងចំណាយថវិកា ២៧៣ លានដុល្លារអាមេរិក ក្រោមហិរញ្ញប្បទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភណ្ឌមិនទាន់ផ្ទុះ និងរយៈពេលសាងសង់ចំនួន ៤២ខែ។
នៅពេលខាងមុខផ្លូវមួយខ្សែនេះនឹងដើរតួនាទីយ៉ាងសំខាន់សម្រាប់សម្រួល ដល់ការធ្វើចរាចរណ៍ ដឹកជញ្ជូនផលិតផលនានារបស់ ប្រជាពលរដ្ឋ ប្រកបដោយសក្ដានុពល ជាពិសេស រួមចំណែកដល់ការរំដោះការកកស្ទះ ចរាចរណ៍នៃយានយន្ត ដឹកជញ្ជូន ទំនិញធំៗចេញ-ចូលរាជធានី ភ្នំពេញ ផងដែរ។
ផ្លូវមួយខ្សែនេះចំណាយថវិកាសាងសង់ប្រមាណ ២៥៩ ដុល្លារតាមរយៈកិច្ចព្រមព្រៀង ឥណទានសម្បទានជាមួយរដ្ឋាភិបាលចិនដែលមានមានប្រវែងសរុបប្រមាណ ៤៧.៦០៨គីឡូម៉ែត្រ និងមានទទឹងសរុប ២៥ម៉ែត្រ ជាប្រភេទផ្លូវ ៤គន្លង (២ទៅ ២មក) ដោយក្នុងមួយគន្លងមានទទឹង ៣,៥០ ម៉ែត្រ និងផ្លូវទោចក្រយានយន្ត ២គន្លង (១ទៅ ១មក) ក្នុងមួយគន្លងមានទទឹង ២,២៥ម៉ែត្រ។
កំណាត់ផ្លូវក្រវាត់ក្រុងនេះចាប់ផ្តើមពីចំណុចផ្លូវជាតិលេខ៤ ត្រង់គីឡូម៉ែត្រ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ឆ្លងកាត់ផ្លូវជាតិលេខ៣ ផ្លូវជាតិលេខ២ ផ្លូវជាតិ លេខ២១ ផ្លូវជាតិលេខ២១A និងផ្លូវលេខ១១០ ឆ្ពោះទៅផ្លូវជាតិលេខ១ ត្រង់គីឡូម៉ែត្រលេខ២៤+១៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល តភ្ជាប់ទៅកាន់ចំណតផែកុងតឺន័រថ្មីរបស់កំពង់ផែស្វ័យតភ្នំពេញឋិតនៅស្រុកកៀនស្វាយខេត្តកណ្ដាល ជាពិសេសកំណាត់ផ្លូវនេះតភ្ជាប់ផ្លូវ អាស៊ានហាយវេ AH1និងAH11 និងផ្លូវដែលជាច្រករបៀងសេដ្ឋកិច្ចសំខាន់ៗជាច្រើនទៀត៕ ដោយ៖កូឡាប