បន្ទាយមានជ័យ ៖ រដ្ឋបាលខេត្តបន្ទាយមានជ័យ បានជូនដំណឹងដល់បងប្អូនអាជីវករលក់ដូរនៅផ្សាររោងក្លឿ ប្រទេសថៃ អំពីការផ្អាកការអនុញ្ញាតពលរដ្ឋខ្មែរ ចេញចូលដឹកជញ្ជូនទំនិញ ដោយចាប់អនុវត្តពីថ្ងៃទី៤ ដល់ ថ្ងៃទី៧ ខែកញ្ញា ឆ្នាំ២០២០។
អាជ្ញាធរថៃ បានផ្អាកការអនុញ្ញាតឲ្យប្រជាពលរដ្ឋខ្មែរចេញចូលដឹកជញ្ជូនទំនិញ ក្នុងផ្សាររោងក្លឿ ស្រុកអារញ្ញប្រាថេត ខេត្តស្រះកែវ ចាប់ពីថ្ងៃទី០៤ ដល់ថ្ងៃទី០៧ ខែកញ្ញា ឆ្នាំ២០២០ ក្នុងអំឡុងថ្ងៃឈប់សាធារណៈរបស់ប្រទេសថៃ។
បើតាមសេចក្ដីជូនដំណឹងរបស់ រដ្ឋបាលក្រុងប៉ោយប៉ែត ដែលបណ្ដាញព័ត៌មានទទួលបាននៅព្រឹកថ្ងៃទី២៩ ខែសីហា ឆ្នាំ២០២០។រដ្ឋបាលក្រុងប៉ោយប៉ែត សូមជម្រាបជូនដំណឹង ដល់បងប្អូនអាជីវករលក់ដូរនៅផ្សាររោងស្រុកអារញ្ញប្រាថេត ខេត្តស្រះកែវ និងសាធារណជនឱ្យបានជ្រាបថា យោងតាមការជូនដំណឹងរបស់ រដ្ឋបាលខេត្តស្រះកែវ នៃព្រះរាជាណាចក្រថៃឡងដ៏ តាមលិខិតលេខ០០៣៨២/ ៤២៨៣ ចុះថ្ងៃទី១៨ ខែសីហា ឆ្នាំ២០២០ ស្តីពីការផ្អាកការអនុញ្ញាត ឱ្យប្រជាពលរដ្ឋខ្មែរចេញចូលដីកជញ្ជូនទំនិញ ក្នុងផ្សាររោងឡើ ស្រុកអារញ្ញប្រាថេត ខេត្តស្រះកែវ ប្រទេសថៃឡងដ៏ ចាប់ពីថ្ងៃទី៤ ដល់ថ្ងៃទី៧ ខែកញ្ញា ឆ្នាំ២០២០ ក្នុងអំឡុងថ្ងៃឈប់សាធារណៈ របស់ព្រះរាជាណាចក្រថៃឡងដ៏ ។
សូមជម្រាបថា កម្ពុជា-ថៃ បានឯកភាពគ្នាដើម្បីអនុញ្ញាតឲ្យអាជីវករខ្មែរ អាចចេញចូលដឹកជញ្ជូនទំនិញ នៅក្នុងផ្សាររោងក្លឿ ចាប់តាំងពីថ្ងៃទី១៥ ខែកក្កដា ឆ្នាំ២០២០មក ក្រោយផ្អាកមួយរយៈដោយសារជំងឺកូវីដ១៩។ ការចេញចូលដឹកជញ្ជូនទំនិញនេះ ត្រូវឆ្លងកាត់ប៉ុស្ដិ៍ត្រួតពិនិត្យសុខភាពយ៉ាងម៉ឺងម៉ាត់ផងដែរ ដើម្បីការពារការចម្លងជំងឺមួយនេះ៕
ដោយ៖កូឡាប