ភ្នំពេញ៖នៅឆ្នាំ២០១៧ នគរបាលប្រឆាំងគ្រឿងញៀន បានបង្ក្រាបករណីជួញដូរ និងប្រើប្រាស់គ្រឿងញៀនចំនួន៨.១៥២ករណី ឃាត់មនុស្ស១៧.៨៧៧នាក់ (ស្រី១.៥៨២នាក់) ដកហូតសារធាតុញៀនគ្រប់ប្រភេទជាង១៧៣គីឡូក្រាម និង៨៨៦កញ្ចប់ និងកញ្ឆាក្រៀមជាង១១៣គីឡូក្រាម និង២៧៥.៨១៥ដើម។ សម្តេចក្រឡាហោម ក៏បានណែនាំដល់កងកម្លាំងបង្ក្រាបឲ្យចំមេខ្លោង និងកាត់ផ្តាច់ខ្សែរយៈអង្គការចាត់តាំងរបស់ពួកនេះឲ្យដល់ឫសគល់ និងទប់ស្កាត់បទល្មើសគ្រឿងញៀនតាមព្រំដែនកម្ពុជា ឡាវ ដែលជាភូមិសាស្ត្រច្រករបៀងគ្រឿងញៀន ពីតំបន់ត្រីកោណមាស។
ក្នុងពិធីបិទសន្និបាតបូកសរុបលទ្ធផលត្រួតពិនិត្យគ្រឿងញៀនឆ្នាំ២០១៧ និងទិសដៅការងារឆ្នាំ២០១៨ របស់អាជ្ញាធរជាតិប្រយុទ្ធប្រឆាំងគ្រៀងញៀន និងកិច្ចប្រជុំបូកសរុបនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនសុខច្បាប់លើកទី២ឆ្នាំ២០១៧ កាលពីរសៀលថ្ងៃទី៥ ខែកុម្ភៈ ឆ្នាំ២០១៨នេះ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់បញ្ជាឲ្យអង្គភាពពាក់ព័ន្ធត្រូវយកចិត្តទុកដាក់ធ្វើសក្មភាពឲ្យបានកាន់តែសកម្មថែមទៀត ក្នុងការប្រមូលព័ត៌មានស្រាវជ្រាវ ស៊ើបអង្កេត ដើម្បីបង្ការ ទប់ស្កាត់ និងបង្ក្រាបបទល្មើសគ្រឿងញៀន ឲ្យកាន់តែមានប្រសិទ្ធភាព ពិសេសទប់ស្កាត់ឲ្យបានជាមុនកុំឲ្យឧក្រិដ្ឋជនមានលទ្ធភាពចរាចរគ្រឿងញៀនចូល និងឆ្លងកាត់ប្រទេសកម្ពុជា រួមទាំងបង្ការ និងទប់ស្កាត់ឲ្យមានប្រសិទ្ធភាពនូវរាល់ការប៉ុនប៉ងចរាចរដោយខុសច្បាប់នូវសារធាតុគីមីផ្សំ និងការបង្វែរសាធាតុនេះពីជំនួញស្របច្បាប់ទៅផលិតគ្រឿងញៀនខុសច្បាប់។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថា “ត្រូវខិតខំកសាងសមត្ថភាពមន្ត្រីក្នុងការស្រាវជ្រាវ និងស៊ើបអង្កេតបន្ថែមទៀត ដើម្បីមានលទ្ធភាពបង្ក្រាបឲ្យចំមេខ្លោង និងកាត់ផ្តាច់ខ្សែរយៈអង្គការចាត់តាំងរបស់ពួកនេះឲ្យដល់ឫសគល់ ។ ត្រូវផ្តោតការយកចិត្តទុកដាក់ឲ្យបានខ្លាំងថែមទៀត ក្នុងការទប់ស្កាត់បទល្មើសគ្រឿងញៀនតាមព្រំដែនកម្ពុជា ឡាវ ដែលជាភូមិសាស្ត្ររបៀងគ្រឿងញៀន ពីតំបន់ត្រីកោណមាស ដើម្បីធ្វើយ៉ាងណាបង្ការ និងបង្ក្រាបឲ្យបាននូវការលួចលាក់ចរាចរគ្រឿងញៀនឆ្លងកាត់ព្រំដែនចូលមកប្ររទេសយើង” ។ សម្តេចបានលើកឡើងថា តាមស្មារតីដែលបានឯកភាពជាមួយរដ្ឋមន្ត្រីក្រសួងនគរបាលវៀតណាម កម្លាំងនគរបាលបង្ក្រាបគ្រឿងញៀន នៃប្រទេសទាំងបី (កម្ពុជា វៀតណាម ឡាវ) នឹងបង្កើតឲ្យមានវេទិកាជួបជុំគ្នាផ្លាស់ប្តូរវេនដើម្បីរៀបចំកិច្ចសហការបង្ក្រាបគ្រឿងញៀន ព្រមដៃគ្នា និងមានប្រសិទ្ធភាព ។
ជាមួយគ្នានេះ សម្តេចក្រឡាហោម ស ខេង សូមឲ្យមន្ត្រីអនុវត្តច្បាប់ទាំងអស់សហការឲ្យបានល្អជាមួយព្រះរាជអាជ្ញា និងស្ថាប័នតុលាការ ដើម្បីបន្តអនុវត្តឲ្យមានប្រសិទ្ធភាព និងតម្លាភាពក្នុងការពង្រីកនីតិវិធីកសាងសំណុំ និងការរកវត្ថុតាមដាក់បន្ទុក ស្ថានទម្ងន់ទោសឲ្យបានស្របតាមច្បាប់ស្តីពីការត្រួតពិនិត្យគ្រឿងញៀន ។
សម្តេចក្រឡាហោម ក៏បានរម្លឹកឡើងវិញ និងធ្វើការណែនាំឲ្យថ្នាក់ដឹកនាំគ្រប់លំដាប់ថ្នាក់ ត្រូវធ្វើការពង្រឹងក្រមសីលធម៌ វិជ្ជាជីវៈ ឲ្យបានហ្មត់ចត់ ដើម្បីធានាថា មន្ត្រីអនុវត្តច្បាប់របស់ខ្លួនពិតជាគ្មានពាក់ព័ន្ធ ឬនៅពីក្រោយសកម្មភាពឧក្រិដ្ឋទាំងនេះឡើយ ។ ដោយសម្តេចបានព្រមានថា ក្នុងករណីរកឃើញថា មានការជាប់ព័ន្ធព័ន្ធ ឬធ្វើជាខ្នងបង្អែកឲ្យក្រុមឧក្រិដ្ឋជន ត្រូវមានវិធានការរដ្ឋបាល និងវិធានការច្បាប់ឲ្យបានតឹងរឹងបំផុត ។
ចំពោះក្រសួងយុត្តិធម៌ ត្រូវបន្តខិតខំជម្រុញស្ថាប័នអយ្យការ និងតុលាការគ្រប់ជាន់ថ្នាក់ ពន្លឿននីតិវិធី នៃការកាត់ក្តីបទល្មើសគ្រឿងញៀន នីតិវិធីនៃការអនុវត្តសាលក្រមជាស្ថាពរ និងការប្រមូលទ្រព្យសម្បត្តិ ដើម្បីប្រគល់ជូនគណៈកម្មការតាមដាន ប្រមូល គ្រប់គ្រង និងចាត់ចែងទ្រព្យសម្បត្តិដែលពាក់ព័ន្ធនឹងបទល្មើសគ្រឿងញៀន អាចចាត់ចែងបានទាន់ពេលវេលា ដើម្បីឲ្យអាជ្ញាធរជាតិប្រយុទ្ធប្រឆាំងគ្រឿងញៀន មានលទ្ធភាពប្រើប្រាស់ស្របតាមគោលការណ៍ច្បាប់ ។ ជាមួយគ្នានេះ ក្រសួងយុត្តិធម៌ត្រូវពន្លឿនដំណើរការវិសោធនកម្មច្បាប់ស្តីពីការត្រួតពិនិត្យគ្រឿងញៀន ឲ្យបានឆាប់រហ័ស ដើម្បីអាចឲ្យយើងមានច្បាប់ប្រើប្រាស់សមស្របតាមស្ថានភាពជាក់ស្តែងនាពេលបច្ចុប្បន្ន៕ ដោយ៖បញ្ញាស័ក្តិ