ភ្នំពេញ ៖ នារសៀលថ្ងៃសុក្រទី២៨ ខែសីហា ឆ្នាំ២០២០ នាស្តីការក្រសួងសេដ្ឋកិច្ចនិងហិរញ្ញវត្ថុ “កិច្ចប្រជុំពិនិត្យ និងវាយតម្លៃការប្រមូលផលស្រូវដើមដៃ និងការនាំចេញអង្ករ” ត្រូវបានរៀបចំឡើង ក្រោមការដឹកនាំរបស់ឯកឧត្តម ជូ វិជិត្ត រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារ ក្នុងក្របខ័ណ្ឌគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ និងមានការចូលរួមពីសហព័ន្ធស្រូវអង្ករកម្ពុជា (ស.អ.ក) ដែលដឹកនាំដោយ ឧកញ៉ា ចាន់ សុឃាំង អនុប្រធានសហព័ន្ធ និងជាប្រធានគណកម្មាធិការប្រតិបត្តិ ផ្នែកហិរញ្ញវត្ថុ និងវិនិយោគរបស់ស.អ.ក រួមជាមួយ ឯកឧត្តម បណ្ឌិត ឧកញ៉ា ភូ ពុយ និងឧកញ៉ា ហ៊ីម ប៉ោហឿង ជា ទីប្រឹក្សាប្រតិបត្តិរបស់សហព័ន្ធ ហើយក៏មានការចូលរួមពីបណ្តាក្រសួង ស្ថាប័នពាក់ព័ន្ធផ្សេងទៀត នៅក្នុងវិស័យស្រូវអង្ករផងដែរ។
កិច្ចប្រជុំពិនិត្យ និងវាយតម្លៃការប្រមូលផលស្រូវដើមដៃ និងការនាំចេញអង្ករនេះ ត្រូវបានរៀបចំឡើងក្រោមការចង្អុលបង្ហាញដ៏ខ្ពង់ខ្ពស់ពីសំណាក់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ។
គួរបញ្ជាក់ផងដែរថា សហព័ន្ធស្រូវអង្ករកម្ពុជាមានការព្រួយបារម្ភលើបញ្ហាមួយចំនួន ដែលសហព័ន្ធក្រោមអាណាព្យាបាលរបស់ក្រសួងពាណិជ្ជកម្ម បានរៀបចំកិច្ចប្រជុំបន្ទាន់នាទីស្តីការក្រសួងពាណិជ្ជកម្ម កាលពីថ្ងៃទី២៧ ខែសីហា ឆ្នាំ២០២០ ពិភាក្សា និងឯកភាពលើសំណូមពរ ដែលបានលើកឡើងនៅក្នុងអង្គប្រជុំ ទាក់ទងនឹងបញ្ហាមួយចំនួនដែលរួមមាន ៖ ១.) បម្រែបម្រួល អាកាសធាតុ ដែលជំរុញឲ្យមានភាពយឺតយ៉ាវក្នុងការប្រមូលផល និងទិន្នផល ជាពិសេសប្រភេទស្រូវសែនក្រអូប ២.) ភាពយឺតយ៉ាវក្នុងការផ្តល់ទិន្នផលបានជំរុញឲ្យការនាំចេញអង្ករធ្លាក់ចុះយ៉ាងគំហុក ជាពិសេសក្នុងខែសីហា ហើយនិងឈានដល់ខែកញ្ញាផងដែរ ៣.) ការព្រួយបារម្ភក្នុងរយៈពេលវែងខាងមុខ លើការបម្រែបម្រួលអាកាសធាតុលើសន្តិសុខស្បៀងក្នុងស្រុក និង ៤.) ឥណទានបន្ថែមដល់រោងម៉ាស៊ីន ក្នុងការប្រមូលទិញស្រូវពីប្រជាកសិករ និងលក្ខខណ្ឌបង្វិល នារដូវកាលច្រូតកាត់ថ្មី។
បន្ទាប់ពីការពិភាក្សា ផ្លាស់ប្តូរយោបល់ លើបញ្ហាដែលបានលើកឡើងដូចខាងលើនេះ យ៉ាងផុសផុលពីសំណាក់សមាជិកអង្គប្រជុំ និងក្រោមការសម្របសម្រួលរបស់ឯកឧត្តមប្រធានអង្គប្រជុំរួចមក ឯកឧត្តមប្រធានបានធ្វើការវាយតម្លៃខ្ពស់ចំពោះធាតុចូលទាំងអស់ ហើយឯកឧត្តមនឹងរាយការណ៍ជូនឯកឧត្តមអគ្គបណ្ឌិតសភាចារ្យបន្ត ដើម្បីសុំគោលការណ៍ដោះស្រាយ និងលើកបន្តជូនដល់ប្រមុខរាជរដ្ឋាភិបាល ក្នុងការផ្តល់នូវសេចក្តីសម្រេច ក៏ដូចជាផ្តល់នូវអនុសាសន៍ នៅក្នុងបញ្ហានានា ដែលពាក់ព័ន្ធនឹងវិស័យស្រូវអង្ករនេះ ក្នុងគោលបំណងដើម្បីជួយជំរុញផលិតកម្មស្រូវអង្ករ និងការនាំចេញ ស្របតាមគោលនយោបាយរបស់រាជរដ្ឋាភិបាលកម្ពុជា៕
ដោយ៖កូឡាប