បន្ទាយមានជ័យ ៖ ស្ត្រីម្នាក់ព្រោះតែស៊ូទ្រាំលែងបាននឹងប្តីដែលខ្វះការទទួលខុសត្រូវជាមេគ្រួសារ ហើយប្រើប្រាស់គ្រឿងញៀន តែងតែធ្វើសកម្មភាពប្រើអំពើហិង្សាវាយដំច្រំធាក់ មកលើខ្លួនជាប្រចាំនោះ នៅថ្ងៃទី២៨ ខែសីហា ឆ្នាំ២០២០ ស្ត្រីរងគ្រោះជាប្រពន្ធ បានដាក់ពាក្យបណ្តឹង ទៅកងរាជអាវុធហត្ថខេត្តបន្ទាយមានជ័យ ចាប់ឃាត់ខ្លួន។ បន្ទាប់ពីកងកម្លាំងជំនាញអាវុធហត្ថសាកសួរយកចម្លើយរួចរាល់ហើយ បានរៀបចំសំណុំរឿងបញ្ជូនទៅសាលាដំបូងខេត្ត ដោយចោទប្រកាន់ពីបទប្រើហិង្សាដោយចេតនាប្រព្រឹត្តដោយសហព័ន្ធ ដើម្បីចាត់ការតាមនីតិវិធីច្បាប់ នៅថ្ងៃទី២៩ ខែសីហា។
លោកវរសេនីយ៍ត្រី ធឿង វាសនា នាយការិយាល័យ ប្រឆាំងការជួញដូរមនុស្ស បានឲ្យដឹងថា ៖ ស្ត្រីរងគ្រោះ ឈ្មោះ ខឿន រីណា ភេទស្រី អាយុ៣២ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ នៅថ្ងៃទី២៨ ខែសីហា ឆ្នាំ២០២០ ស្ត្រីរងគ្រោះជាប្រពន្ធ បានប្តឹងឈ្មោះ ព្រំ ប៊ុនហូ ដែលត្រូវជាប្តីជាមនុស្សប្រើប្រាស់គ្រឿងញៀនជាប្រចាំ នៅវេលាម៉ោង៩យប់ថ្ងៃទី២៧ ខែសីហា ឆ្នាំ២០២០ បានប្រើអំពើហិង្សាវាយដំច្រំធាក់មកលើខ្លួនជាច្រើនលើក ដោយស៊ូទ្រាំនិងទង្វើប្តីរូបនេះ មិនបាននាងក៏ដាច់ចិត្តដាក់ពាក្យប្តឹងឲ្យសមត្ថកិច្ចចាប់ខ្លួនឈ្មោះ ព្រំ ប៊ុនហូ ជាប្តីអនុវត្តតាមនីតិវីធីច្បាប់ ។
លោកនាយការិយាល័យ បានបញ្ជាក់ថា ៖ ក្រោយពីទទួលបានពាក្យបណ្ដឹង កម្លាំងការិយាល័យប្រឆាំងការជួញដូរមនុស្ស សហការជាមួយកម្លាំងអន្តរាគមន៍ ដឹកនាំដោយលោកផ្ទាល់ ចុះធ្វើប្រតិបត្តិការឃាត់ខ្លួនជនសង្ស័យម្នាក់ឈ្មោះ ព្រំ ប៊ុនហូ នៅវេលាម៉ោង១១និង៥៨នាទីព្រឹក ថ្ងៃទី២៨ ខែសីហា ឆ្នាំ២០២០ ហើយបញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីធ្វើការសាកសួរចម្លើយ នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួន និងប្រពន្ធ បានគ្នាជាង១០ឆ្នាំមកហើយ ហើយមានកូន៣នាក់ ខ្លួនតែងតែប្រើប្រាស់គ្រឿងញៀន ហើយប្រើហិង្សាទៅលើប្រពន្ធជាញឹកញាប់ពិតប្រាកដមែន ដោយផ្អែកទៅលើចម្លើយសារភាព បច្ចុប្បន្នជនសង្ស័យត្រូវបាន កម្លាំងជំនាញការិយាល័យប្រឆាំងការជួញដូរមនុស្សកងរាជអាវុធហត្ថខេត្ត កសាងសំណុំរឿងបទប្រើហិង្សាដោយចេតនាប្រព្រឹត្តដោយសហព័ន្ធ បញ្ជូនទៅសាលាដំបូងខេត្តចាត់ការតាមច្បាប់ហើយ៕
ដោយ៖កូឡាប