ក្រចេះ៖នៅព្រឹកថ្ងៃអាទិត្យ ទី៣០ ខែសីហា ឆ្នាំ២០២០ លោកជំទាវ កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភាព្រឹទ្ធសភា និងអធិការកិច្ច អញ្ជើញប្រារព្ធពិធីបួងសួងសុំសេចក្តីសុខ និងប្រគេនស្គរជ័យ និងគងជ័យ ដល់វត្តភ្នំសំបុក ស្ថិតនៅឃុំថ្មគ្រែ ស្រុកចិត្របុរី ខេត្តក្រចេះ ដោយមានការអញ្ជើញចូលរួមពីឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត ឯកឧត្តម វ៉ា ថន អភិបាលខេត្ត និងលោកជំទាវ ថ្នាក់ដឹកនាំក្រសួងទំនាក់ទំនងព្រឹទ្ធសភា រដ្ឋសភា លោកជំទាវអ្នកតំណាងរាស្ត្រមណ្ឌលខេត្តក្រចេះ លោកជំទាវតំណាងរាស្ត្រមណ្ឌលខេត្តស្វាយរៀង ថ្នាក់ដឹកនាំខេត្តក្រចេះ និងព្រមទាំងប្រជាពុទ្ធបរិស័ទ នៅក្នុងចំណុះជើងវត្តភ្នំសំបុកច្រើនកុះករផងដែរ។
គោលបំណងដែលលោកជំទាវកិតិ្តសង្គហបណ្ឌិត បានប្រារព្ធពិធីនេះឡើង គឺទី១ដើម្បីរំលឹកប្រវត្តិសាស្ត្រ និងដឹងគុណូបការៈរបស់អតីតព្រះមហាក្សត្រខ្មែរជាច្រើនជំនាន់ ទី២ ដើម្បីបួងសួងសុំសេចក្តីសុខសន្តិភាព ពីទេវតាបារមីសាកសិទ្ធលើលោកយើងនេះ ទី៣ ដើម្បីឧទ្ឋិសបុណ្យកុសលថ្វាយដល់ព្រះមហាក្សត្រព្រះមហាក្សត្រីយ៉ានីគ្រប់ជំនាន់ ទី៤ ប្រគេនថ្វាយគងជ័យ និងស្គជ័យដល់ព្រះសង្ឃទុកជាមរត៏ ក្នុងព្រះពុទ្ធសាសនា នៅក្នុងវត្តភ្នំសំបុក នេះផ្ទាល់។
លោកជំទាវ ម៉ែន សំអន បានបញ្ជាក់ថា ការធ្វើពិធីបួងសួងនេះគឺដើម្បីដឹងគុណអារុកអារក្ស អ្នកតាព្រៃព្រឹក្សា ដែលធ្វើឲ្យយើងមានជីវិត មានក្តីសង្ឃឹមនេះគឺជាការតបស្នងសងគុណជូនវិញ ហើយយើងត្រូវដឹងគុណសន្តិភាព ដែលបានផ្តល់ឱកាសឲ្យយើងបានប្រកបកិច្ចប្រតិបត្តិ ទាំងផ្នែកអាណាចក្រ និងពុទ្ធចក្រ ដោយមានការរីកចម្រើនគួឲ្យកត់សម្គាល់។
លោកជំទាវកិត្តិសង្គហបណ្ឌិត បានក្រើនរំលឹក អំពាវនាវដល់បងប្អូនប្រជាពលរដ្ឋគ្រប់រូប សូមបន្តយកចិត្តទុកដាក់ ការពារថែទាំថែរក្សាសុខភាព ធ្វើយ៉ាងណាដើម្បីបញ្ចៀសផុតពីការឆ្លងជំងឺរលាកផ្លូវដង្ហើមដ៏កាចសាហាវ គឺជំងឺកូវីដ១៩ ដែលកំពុងតែរាតត្បាតលើសកលលោកយើងនេះ ដោយឡែកប្រទេសកម្ពុជាយើងក៏មានការឆ្លងនូវជំងឺកូវីដ១៩ផងដែរ តែដោយក្រោមការគ្រប់គ្រងពីប្រមុខថ្នាកដឹកនាំ ដែលមានសម្ដេចតេជោ ហ៊ុន សែន នាយកនាយករដ្ឋមន្ត្រី បានគ្រប់គ្រងការពារទប់ស្កាត់មិនឲ្យមានការឆ្លងចូលទៅសហគមន៍នៅឡើយទេ។ ដោយឡែកការងារបង្កបង្កើនផលវិញ សូមឱ្យបងប្អូនយើងខិតខំយកចិត្តទុកដាក់ប្រឹងប្រែង ហើយក្នុងដំណាក់កាលកូវីដ១៩ ប្រមុខរាជរដ្ឋាភិបាលកម្ពុជា បានគិតគូរយកចិត្តទុកដាក់ខ្ពស់ គឺបានជួយឧបត្ថម្ភជាសាច់ប្រាក់ជូនដល់ប្រជាពលរដ្ឋក្រីក្រជារៀងរាល់ខែ ហើយជាពិសេសបានយកចិត្តទុកដាក់ទៅស្ត្រីដែលមានផ្ទៃពោះ គឺបានផ្តល់ប្រាក់ឧបត្ថម្ភរហូតទៅដល់ចំនួន៤លើក ក្រោយសម្រាលកូនហើយ ដើម្បីធ្វើយ៉ាងណាឲ្យកូនដែលសម្រាលហើយមានសុខភាពល្អ។ ចំណុចដែលសំខាន់គឺសូមឲ្យបងប្អូនបន្តថែទាំសុខភាពដោយឧស្សាហ៍លាងដៃនឹងសាប៊ូ អាកុល ឬជែលជាដើម ពាក់ម៉ាសជាប្រចាំ៕ ដោយ៖កូឡាប