ភ្នំពេញ៖ ខណៈពេលដែលនៅ៣ថ្ងៃទៀតពិធីកាន់បិណ្ឌនឹងចូលមកដល់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់បងប្អូនប្រជាពលរដ្ឋ យកចិត្តទុកដាក់ ថែរក្សាសុខភាពឲ្យបានគ្រប់គ្នា ជាពិសេសការពារខ្លួនចៀសផុតពីជំងឺឆ្លងកូវីដ១៩ ក្នុងឱកាសនៃពិធីកាន់បិណ្ឌ ។
សម្តេចតេជោ ហ៊ុន សែន បានសរសេរក្នុងហ្វេសប៊ុកនៅថ្ងៃទី៣១ ខែសីហា ឆ្នាំ២០២០នេះថា សុខសប្បាយជាទេបងប្អូន! នៅសល់តែបីថ្ងៃទៀតទេ ពិធីកាន់បិណ្ឌនឹងមកដល់។ តាមប្រពៃណីទំនៀមទម្លាប់សាសនា នៅក្នុងឱកាសនៃពិធីកាន់បិណ្ឌភ្ជុំបិណ្ឌ ដែលនឹងចូលមកដល់ក្នុងពេលយ៉ាងខ្លីខាងមុខនេះ សូមបងប្អូនប្រជាពលរដ្ឋទាំងអស់យកចិត្តទុកដាក់ ថែរក្សាសុខភាពឲ្យបានគ្រប់គ្នាជាពិសេស សូមការពារខ្លួនចៀសផុត ពីជំងឺឆ្លង Covid-19 ហើយស្តាប់តាមការណែនាំរបស់ក្រសួងសុខាភិបាល ឲ្យបានខ្ជាប់ខ្ជួនដោយបន្តពាក់ម៉ាសការពារឧស្សា ហ៍ដុសសម្អាតលាងដៃ ជាមួយសាប៊ូ ទឹកអាល់កុល ឬជែលសម្លាប់មេរោគឲ្យបានជាប្រចាំ។
នៅថ្ងៃនេះ តាមរបាយការណ៍អង្គការសុខភាពពិភពលោក (WHO) ថ្ងៃនេះ គឺមានអ្នកឆ្លងសរុប ២៤,៨៥៤,១៤០នាក់ ស្លាប់ ៨៣៨,៩២៤នាក់ និងករណីកើតថ្មីចំនួន ២៦៥,៨៨៨ករណី។ ចំណែកប្រទេសកម្ពុជាយើងវិញមកដល់នេះ មានអ្នកឆ្លងសរុប ២៧៤នាក់ បានជាសះស្បើយចំនួន២៦៦នាក់ និងមានអ្នកឆ្លងថ្មីចំនួន០១នាក់។
សូមបងប្អូនប្រជាពលរដ្ឋទាំងអស់រីករាយជាមួយក្រុមគ្រួសារ មិត្តភក្កិ បងប្អូន ក្នុងឱកាសពិធីកាន់បិណ្ឌមុខនេះ និងសូមឲ្យការធ្វើដំណើរជិតឆ្ងាយ ទទួលបាននូវសុខសុវត្ថិភាព ព្រមទាំងចូលរួមគោរពច្បាប់ចរាចរណ៍ឲ្យបានគ្រប់ៗគ្នា។
សម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៃព្រះរាជាណាចក្រកម្ពុជា បានចេញព្រះរាជសារការរៀបចំពិធីបុណ្យកាន់បិណ្ឌ និងភ្ជុំបិណ្ឌ និងការទប់ស្កាត់ការរីករាលដាលមេរោគកូវីដ-១៩។
បើតាមគណៈសង្ឃនាយកនៃព្រះរាជាណាចក្រកម្ពុជា យោងសេចក្តីណែនាំលេខ ១៤/២០ ក.ស.ជ សណន ចុះថ្ងៃអង្គារ ៧កើត ខែភទ្របទ ឆ្នាំជូត ទោស័ក .២៥៦៤ ត្រូវនឹងថ្ងៃទី២៥ ខែសីហា ឆ្នាំ២០២០ ស្តីពីការរៀបចំពិធីបុណ្យកាន់បិណ្ឌ និងភ្ជុំបិណ្ឌ និងពង្រឹងវិធានការ ការពារសុវត្ថិភាពសង្គម ដើម្បីកាត់បន្ថយហានិភ័យនៃការរីករាលដាលជំងឺកូវីដ-១៩ របស់ក្រសួងធម្មការ និងសាសនា គណៈសង្ឃនាយក នៃព្រះរាជាណាចក្រកម្ពុជា សូមប្រគេនព្រះមេគណ ព្រះអនុគណ ព្រះចៅអធិការគ្រប់វត្ត និងជូន ចំពោះពុទ្ធបរិស័ទគ្រប់មជ្ឈដ្ឋាន ព្រះមេត្តា មេត្តាជ្រាបថា៖ ក្នុងអំឡុងពេលនៃការប្រារព្ធពិធីបុណ្យកាន់បិណ្ឌ និងភ្ជុំបិណ្ឌ ដែលនឹងប្រព្រឹត្តទៅនៅថ្ងៃ១រោច រហូតដល់ថ្ងៃ ១៥រោច ខែភទ្របទ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៣ ដល់ថ្ងៃទី ១៧ ខែកញ្ញា ឆ្នាំ២០២០ ខាងមុខនេះ សូមព្រះសង្ឃគ្រប់វត្តអារាម និងប្រជាពុទ្ធបរិស័ទ គ្រប់រូប ព្រះមេត្តា មេត្តា ចូលរួមទប់ស្កាត់ការរីករាលដាលមេរោគកូវីដ -១៩ និងដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងកិច្ចខិតខំប្រឹង ប្រែងទប់ស្កាត់ការឆ្លងជំងឺកូវីដ-១៩នេះ គណៈសង្ឃនាយក សូមអំពាវនាវដល់ព្រះសង្ឃគ្រប់អង្គ និងប្រជាពុទ្ធបរិស័ទ គ្រប់មជ្ឈដ្ឋានទូទាំងប្រទេសដូចខាងក្រោម៖
១. ត្រូវរៀបចំវត្តអារាម ឱ្យមានសណ្តាប់ធ្នាប់ អនាម័យបរិស្ថានល្អ ចងទង់ បដា ជ្វាលា ពាក្យស្លោក រៀបចំឱ្យមានធុងសំរាមសាធារណៈ និងត្រូវសហការជាមួយអាជ្ញាធរមានសមត្ថកិច្ចនៅមូលដ្ឋាន ដើម្បីរៀបចំឱ្យមានកម្លាំងរក្សាសន្តិសុខ សណ្តាប់ធ្នាប់ សុវត្ថិភាព ជូនប្រជាពលរដ្ឋដែលមកបំពេញបុណ្យកុសលនៅគ្រប់វត្តអារាម។
២. ក្នុងថ្ងៃបុណ្យកាន់បិណ្ឌ និងភ្ជុំបិណ្ឌ ដែលនឹងប្រព្រឹត្តទៅនៅថ្ងៃ ១រោច រហូតដល់ថ្ងៃ ១៥រោច ខែភទ្របទ ឆ្នាំជូត
ទោស័ក ព.ស ២៥៦៤ ត្រូវនឹងថ្ងៃទី៣ ដល់ថ្ងៃទី១៧ ខែកញ្ញា ឆ្នាំ២០២០ ខាងមុខនេះ សូមព្រះមេគណ ព្រះគ្រូអនុគណ ព្រះចៅអធិការគ្រប់វត្តទូទាំងព្រះរាជាណាចក្រកម្ពុជា ប្រកាសសូធ្យព្រះធម៌មាន រតនសុត្តារម្ភៈនិង រតនសូត្រ ជាដើម ឱ្យបានកងរំពងគ្រប់វត្តអារាម ស្របតាមកិច្ចដែលព្រះមហាអានន្ទត្ថេរដ៏មានអាយុ បានតាំងចិត្តប្រកបដោយមេត្តាចំពោះសព្វសត្វទាំងអស់ រួចហើយស្វាធ្យាយ នៅក្រុងវេសាលី កាលដែលព្រះអង្គ គង់ធរមាននៅឡើយ ដែលមានក្នុងសុត្តន្តបិដកខុទ្ទកនិកាយលេខ ៥២ ដើម្បីកម្ចាត់បង់នូវភយន្តរាយទាំងឡាយ ដែលកើតអំពីរោគ អមនុស្ស និងទុរភិក្សជាដើម ឱ្យអន្តរធានបាត់ដោយឆាប់រហ័សក្នុងពេលនោះឯង។ តែមិន ត្រូវប្រមូលមនុស្សម្នាឱ្យជួបជុំគ្នាច្រើនពេកទេ ជាពិសេសហាមឃាត់អ្នកដែលមានការពាក់ព័ន្ធជាមួយអ្នកបាន ឆ្លងវីរុសវីដ -១៩ នេះ ។
៣.រៀបចំឱ្យមានជាកន្លែងពិនិត្យសុខភាព មុនពេលចូលក្នុងទីធ្លាវត្តអារាម ព្រះវិហារ ឬសាលាឆាន់ ត្រូវមានឧបករណ៍ វាស់កម្ដៅ សាប៊ូ ជែល ឬទឹកអាល់កុលសម្រាប់លាងសម្អាតដៃជាប្រចាំ។ ត្រូវពាក់ម៉ាស ក្រមា កន្សែង ឬប្រើក្រដាសខ្ទប់មាត់នៅពេលក្អក ឬកណ្តាស់ និងត្រូវរក្សាគម្លាតបុគ្គលម្នាក់ទៅបុគ្គលម្នាក់ទៀតឱ្យបានយ៉ាងតិច មួយម៉ែត្រកន្លះ និងអនុវត្តតាមវិធានការនានា ដែលបានដាក់ចេញដោយរាជរដ្ឋាភិបាល និងក្រសួងសុខាភិបាល។
៤. ត្រូវបង្កើនការប្រុងប្រយ័ត្នបន្ថែមទៀត និងបន្តការស្វែងយល់អំពីមេរោគកូវីដ-១៩នេះ តាមរយៈការមើល ស្តាប់ និងសិក្សានូវសម្ភារៈអប់រំ ដែលផលិតដោយស្ថាប័នសុខាភិបាលជាតិ-អន្តរជាតិ និងអនុវត្តតាមសេចក្តីណែនាំ របស់ក្រសួងសុខាភិបាល និងអង្គការសុខភាពពិភពលោក (WHO) ។ ត្រូវបន្តការផ្សព្វផ្សាយនូវរាល់សារអប់រំ ណែនាំនានា ដែលផលិតដោយក្រសួងសុខាភិបាល ឱ្យបានទូលំទូលាយ ជាប់ជាប្រចាំនៅក្នុងទីវត្តអារាម និង ផ្សព្វផ្សាយដល់សាធារណជន ពុទ្ធបរិស័ទឱ្យបង្កើនការប្រុងប្រយ័ត្នខ្ពស់ សំដៅបង្ការទប់ស្កាត់ការរីករាលដាល នៃជំងឺកូវីដ-១៩ ក្នុងសហគមន៍។
៥. ត្រូវពាក់ម៉ាស់ឱ្យបានជាប្រចាំ ត្រូវជូតសម្អាតដៃនឹងទឹកអាល់កុល ឬសាប៊ូសម្លាប់មេរោគ ត្រូវជៀសវាងការខាក ពាសវាលពាសកាល ត្រូវប្រកាន់យកនូវអនាម័យស្អាតជានិច្ច និងសុវត្ថិភាព ចំណីអាហារគ្រប់ពេល។
៦. ប្រសិនបើជួបអ្នកជំងឺដែលមានអាការៈដូចជា៖ គ្រុនក្តៅ ក្អក កណ្តាស់ ផ្តាសាយ ហៀរសំបោរ ឬឈឺបំពង់ក ត្រូវជួយបញ្ជូនទៅជួបគ្រូពេទ្យ ដើម្បីទទួលការពិនិត្យ និងព្យាបាលជាបន្ទាន់។
គណៈសង្ឃនាយក នៃព្រះរាជាណាចក្រកម្ពុជា សង្ឃឹមយ៉ាងមុតមាំថាព្រះសង្ឃគ្រប់អង្គ និងពុទ្ធបរិស័ទគ្រប់ មជ្ឈដ្ឋានអនុវត្តតាមដោយសេចក្តីជ្រះថ្លា និងយកចិត្តទុកដាក់ខ្ពស់។
អរោត្យា បរិមា លាភា ការមិនមានរោគជាលាភ ដ៏ប្រសើរ ៕
ដោយ៖កូឡាប
