ខេត្តកណ្តាល៖ បុរស២នាក់ បានបន្លំស្លៀកស្បង់ចីពរ ជាព្រះសង្ឃ គ្មានច្បាប់អនុញ្ញាត ដើរចែកសំបុត្របុណ្យ និងអង្គាសប្រាក់ ត្រូវសមត្ថកិច្ចស្រុកកណ្តាលស្ទឹងឃាត់ខ្លួន នៅចំណុចភូមិសៀមរាប ឃុំសៀមរាប ស្រុកកណ្តាលស្ទឹង ខេត្តកណ្តាល នាថ្ងៃសៅរ៍ ទី២៩ ខែសីហា ឆ្នាំ២០២០។ ជនសង្ស័យបានចុះដើរចែកសំបុត្របុណ្យ និងអង្គាសប្រាក់នៅតាមដងផ្លូវជាតិលេខ២ មកទិសខាងត្បូង ពេលដើរមកដល់ចំណុចកើតហេតុ បានជួបជាមួយព្រះចៅអធិការវត្ត វិហារកំបោរ ដោយមានការសង្ស័យព្រះចៅអធិការបានសួរនាំ ហើយបាននាំជនសង្ស័យទាំងពីរនាក់ ទៅប្រគល់ជូនព្រះចៅអធិការវត្តវិហារបិតមាស ដែលជាព្រះអនុគុណស្រុកកណ្ដាលស្ទឹងសួរនាំបន្ត ដោយពិនិត្យឃើញថាជនសង្ស័យទាំងពីរជាព្រះសង្ឃក្លែងក្លាយ ក៏ដោះស្បង់ចីពរចេញ ប្រគល់ឲ្យសមត្ថកិច្ចស្រុកកណ្តាលស្ទឹង ។
មន្ត្រីនគរបាលស្រុកកណ្តាលស្ទឹងបានឲ្យដឹងថាជនសង្ស័យ០២នាក់ សមត្ថកិច្ចឃាត់ខ្លួនរួមមាន៖ ១/ ឈ្មោះ ហុន សៀវប៉ាវ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិត ភូមិព្រៃរំដួលខាងលិចឃុំបសេដ្ឋ ស្រុក បសេដ្ឋ ខេត្តកំពង់ស្ពឺ(ឃាត់ខ្លួន)។ ២.ឈ្មោះ វង្ស ដារ៉ា ភេទប្រុស អាយុ ២០ឆ្នាំមានទីលំនៅភូមិ ស្រីជា ឃុំល្បើក ស្រុកឈូក ខេត្តកំពត (ឃាត់ខ្លួន)។
ចំណែកវត្ថុតាងចាប់យករួមមាន៖ ១-ចីពរ ចំនួន២ ។ ២ -ស្បង់ ចំនួន ២ ។ ៣-ហង្សសាក់ ចំនួន ២ ។ ៤–អ៊ុត ឃុត ចំនួន ១។ ៥–លុយខ្មែរចំនួន ៣០.០០០រៀល(បីម៉ឺនរៀល)។ ៦–ឆាយាគណៈមហានិកាយ ១ក្បាល។ ៧–ទូរស័ព្ទដៃម៉ាក អិនចុចពិល ២គ្រឿង។ ៨–សំបុត្របុណ្យ ចំនួន ១៩សន្លឹក។
ប្រភពដដែលបន្តថា នៅថ្ងៃទីខែឆ្នាំកើតខាងលើវេលាម៉ោង ០៧និង០០នាទីជនសង្ស័យចំនួន៥នាក់មានឈ្មោះ ឡុង ជាអ្នកបើករថយន្ត ឈ្មោះ ខ្លា ឈ្មោះ សៅ ឈ្មោះ វង្ស ដារ៉ា និង ឈ្មោះ ហុន សៀកប៉ាវ បានជិះរថយន្តមួយគ្រឿង កាម៉ារី ហើម ពណ៌ខ្មៅ ពាក់ផ្លាកលេខបាត់ដំបង 2L-5453 ចេញពីផ្ទះសំណាក់មួយកន្លែង ក្នុងរាជធានីភ្នំពេញសំដៅមកដល់រង្វង់មូលគួស្រូវ ក្នុងសង្កាត់រលួស ខណ្ឌដង្កោ រាជធានីភ្នំពេញ ក៏ឈប់រថយន្តនៅជិតនោះ ហើយឈ្មោះ ឡុង ក៏បានចែកស្បង់ចីពរ ហង្សសាក់ ថង់យាម អ៊ុតឃុត ឆាយាគណៈមហានិកាយម្នាក់មួយ សំបុត្របុណ្យជាច្រើនសន្លឹក រួចជនសង្ស័យឈ្មោះ ហុន សៀកប៉ាវ និងឈ្មោះ វង្ស ដារ៉ា បានចុះដើរចែកសំបុត្របុណ្យ និងអង្គាសប្រាក់នៅតាមដងផ្លូវជាតិលេខ២ មកទិសខាងត្បូង ពេលដើរមកដល់ចំណុចកើតហេតុខាងលើ បានជួបជាមួយព្រះចៅអធិការវត្ត វិហារកំបោរ ដោយមានការសង្ស័យព្រះចៅអធិការបានសួរនាំ ហើយបាននាំជនសង្ស័យទាំងពីរនាក់ខាងលើ ទៅប្រគល់ជូនព្រះចៅអធិការវត្តវិហារបិតមាស ដែលជាព្រះអនុគុណស្រុកកណ្ដាលស្ទឹងសួរនាំបន្ត ដោយពិនិត្យឃើញថាជនសង្ស័យទាំងពីរជាព្រះសង្ឃក្លែងក្លាយ ក៏ដោះស្បង់ចីពរចេញ ប្រគល់ឲ្យសមត្ថកិច្ចស្រុកកណ្តាលស្ទឹង និងបញ្ជូនមកអធិការដ្ឋានដើម្បីចាត់ការតាមនីតិវិធីច្បាប់៕ដោយ៖កូឡាប
