ភ្នំពេញ៖ ក្នុងបរិបទថ្មីនៃឧស្សាហកម្ម ៤.0 គ្រប់អាជីវកម្ម ទាំងអស់នៅកម្ពុជា រាប់ទាំងធំទាំងតូច កំពុងចាប់យកបច្ចេកវិទ្យាជាកក្តាសំខាន់បំផុត ក្នុងការជំរុញឱ្យអាជីវកម្មរីកលូតលាស់ និងអាចប្រគួតប្រជែងខ្លាំងបាន។
គួបផ្សំនិងវិបត្តិជំងឺកូវីដ-១៩ផងនោះ បានជំរុញឱ្យការរស់នៅក្នុងសម័យឌីជីថល ត្រូវតែផ្លាស់ប្ដូរ និងទាមទារនូវការប្រើជំនាញបច្ចេកវិទ្យាទំនើប។ ហើយគ្រប់វិស័យទាំងអស់ចាំបាច់ត្រូវចេះប្រើអនឡាញ។ ឥឡូវនេះ ព័ត៌មានឌីជីថល បានកំពុងផ្លាស់ប្តូរការរស់នៅរបស់មនុស្ស ដោយ ប្រែពីមើលទូរទស្សន៍ មកមើលតាមទូរស័ព្ទដៃវិញ ព្រោះវាបានផ្តល់ប្រយោជន៍ និងភាពងាយស្រួល និងអាចយកតាមខ្លួនបានគ្រប់ពេលវេលា និងគ្រប់ទីកន្លែង។
បច្ចុប្បន្ននេះ ការប្រើប្រាស់ទូរស័ព្ទដៃបានកើនឡើងខ្ពស់ ព្រោះបច្ចេកវិទ្យាក្នុងទូរស័ព្ទដៃបានជួយដល់មនុស្សជាច្រើន ក្នុងការស្វែងរកអត្ថប្រយោជន៍ ទាំងការទទួលបានព័ត៌មាន និងការធ្វើអាជីវកម្ម ។ មនុស្សបានប្រើទូរស័ព្ទដៃ ក្នុងការស្វែងរកព័ត៌មាន និងចែករំលែកចំណេះដឹងបទពិសោធន៍ជាច្រើន ដែលពួកគេអាចចូលមើល និងទាញយកព័ត៌មានទាំងនោះបាន តាមរយៈគេហទំព័រ Website និង App ជាដើម។
ការស្រាវជ្រាវមួយរកឃើញថា អតិថិជនសម័យនេះ ចាប់ផ្តើមខ្ជិល មិនចង់និយាយជាមួយអ្នកលក់ថាខ្លួនចង់ទិញផលិតនេះផលិតនោះទេ ប៉ុន្តែពួកគេចង់ទិញតាម App ឬវេបសាយ ដោយខ្លួនឯង ហើយបង់លុយអនឡាញ រួចចាំយកអីវ៉ាន់នៅផ្ទះ។
អ្នកជំនួញអនឡាញម្នាក់ បានអះអាងថា ការលក់តាមអនឡាញ ឬហ្វេសប៊ុក ជាមធ្យោបាយលក់អនឡាញ ដែលពេញនិយមនៅកម្ពុជា ប៉ុន្តែមុខរបរលក់អនឡាញដែលកំពុងកាប់កបនេះ នឹងមិននៅស្ថិតស្ថេរនោះទេ ប្រសិនបើអ្នកលក់អនឡាញ មិនបាន Update ខ្លួនឯងឲ្យទាន់សភាពការណ៍សង្គម។
សូមជម្រាបថា នៅកម្ពុជា មានអ្នកប្រើប្រាស់ទូរស័ព្ទចល័តចំនួនជាង ២២លាននាក់ ដែលស្មើនឹង១២០ភាគរយ ជាមួយនឹងអ្នកប្រើប្រាស់អ៊ីនធឺណិតចល័តចំនួន១៥,៦លាននាក់ ដែលស្មើនឹង៩៦,១ភាគរយ ខណៈដែលអ្នកប្រើហ្វេសប៊ុក មានជាង ៨លាននាក់៕
ដោយ៖CEN
