ខេត្តបាត់ដំបង ៖ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានការណ៍ព័ត៌មានបន្ថែមពី ករណីអគ្គិភ័យកើតឡើងបណ្តាលឲ្យឆេះ តូបលក់ចាប់ហួយ នៅក្នុងបរិវេណផ្សារធំបាត់ដំបង (ផ្សារណាត់)ចំហៀងខាងជើង អស់ចំនួន ៣៣ តូប (ឆេះទាំងស្រុង) នៅថ្ងៃ ទី៣០ ខែសីហា ឆ្នាំ ២០២០ វេលាម៉ោង ១៧និង៣៥ នាទី នៅក្រុមទី ២០ ភូមិ ព្រែកមហាទេព សង្កាត់ ស្វាយប៉ោ ក្រុងបាត់ដំបង ខេត្តបាត់ដំបង សរុបគិតជាទឹកប្រាក់អស់ប្រហែល ៥៥៧.០០០ដុល្លារ និង ១៣.២០០ បាត ដោយ មូលហេតុ ឆ្លងចរន្តអគ្គិសនី ។
ក្នុងប្រតិបត្តិការនេះ កងកម្លាំងសមត្ថកិច្ច បានចេញរថយន្តពន្លត់អគ្គិភ័យចំនួន ៧ គ្រឿង ក្នុងនោះ រថយន្តស្នងការដ្ឋានខេត្ត ៣ គ្រឿង ស្រុកថ្មគោល ១ គ្រឿង ស្រុកសង្កែ ១ គ្រឿង ស្រុកបាណន់ ១ គ្រឿង និងស្រុកឯកភ្នំ ១ គ្រឿង ប្រើប្រាស់អស់ទឹកចំនួន ២៩ ឡាន ។ ប្រតិបត្តិការនេះបានបញ្ចប់ត្រឹមវេលាម៉ោង ២២និង១៥ នាទីយប់ថ្ងៃដដែល ។
សូមបញ្ជាក់ថា នៅល្ងាចថ្ងៃអាទិត្យ ទី៣០ ខែសីហា ឆ្នាំ២០២០ ឯកឧត្តម ងួន រតនៈ អភិបាល នៃគណៈអភិបាលខេត្ត ដឹកនាំបញ្ជាផ្ទាល់ដល់កម្លាំងអន្តរាគមន៍ពន្លត់អគ្គិភ័យ ដែលកំពុងឆាបឆេះនៅផ្នែកមួយនៃអគារខាងលិច ផ្សារធំបាត់ដំបង(ហៅផ្សារណាត់) ក្រុងបាត់ដំបង ខេត្តបាត់ដំបង ដែលមានចូលរួមពី លោកអភិបាលរង នៃគណៈអភិបាលខេត្ត ចំនួន ៣រូប កម្លាំងបញ្ជាការដ្ឋានយោធភូមិភាគទី៥ កម្លាំងស្នងការដ្ឋាននគរបាលខេត្ត កម្លាំងកងរាជអាវុធហត្ថខេត្ត តំបន់ប្រតិបត្តិការសឹងរងបាត់ដំបង និងលោកអភិបាល អភិបាលរងក្រុងផងដែរ។
ឯកឧត្តម អភិបាលខេត្ត ក៏បានថ្លែងអំណរគុណដល់កងកម្លាំងទាំងបីប្រភេទ ជាពិសេសកងកម្លាំងពន្លត់អគ្គិភ័យ នៃស្នងការដ្ឋាននគរបាលខេត្តបាត់ដំបង ដែលបានជួយអន្តរាគមន៍ បានទាន់ពេលវេលា ដែលធ្វើឱ្យការខូចខាតមានតិចតូច និងនៅតែបន្តជួយអន្តរាគមន៍ដល់បងប្អូនប្រជាពលរដ្ឋ អាជីវករ នៅផ្សារណាត់ ក្រុងបាត់ដំបង ។
សូមជម្រាបជូនផងដែរថា ករណីឆាបឆេះផ្សារធំបាត់ដំបង (ហៅផ្សារណាត់) ដែលស្ថិតចំកណ្តាលក្រុងបាត់ដំបង នៅវេលាម៉ោងប្រមាណ ៥ និង ១០ នាទីល្ងាច និងធ្វើការគ្រប់គ្រងសភាពការណ៍ ពន្លត់បានទាំងស្រុង នៅវេលាម៉ោងប្រមាណជាង ៨ យប់ នាទី ដោយប្រើប្រាស់រថយន្តពន្លត់អគ្គិភ័យអស់ប្រមាណជាង ៣០ ដឹក ។ ហើយបណ្តាឱ្យខូចខាតឆេះផ្នែកមួយចំនួននៃអគារផ្សារ(អគារខាងលិច) ដោយសារឆ្លងចរន្តអគ្គិសនី ឬផ្ទុះសេខ្សែភ្លើង។
នៅយប់ថ្ងៃទី៣០ នេះ ក្រោមការដឹកនាំបញ្ជាផ្ទាល់ពី ឯកឧត្តម ងួន រតនៈ អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត បានបញ្ជាឱ្យកងកម្លាំងទាំងបីរួមមាន កងកម្លាំងប្រតិបតិការសឹងរងខេត្ត កងកម្លាំងកងរាជអាវុធហត្ថខេត្ត កងកម្លាំងស្នងការដ្ឋាននគរបាលខេត្ត ត្រូវយាមប្រចាំ ២៤ម៉ោង លើ ២៤ ម៉ោង ដើម្បីរក្សាសន្តិសុខសណ្តាប់ធ្នាប់ និងទ្រព្យសម្បត្តិរបស់អាជីវករ ដែលមិនបានរើសចេញពីក្នុងផ្សារ និងការពារមិនឱ្យមានការលួចគាស់សម្ភារៈ ទិញផ្សេងៗនៅក្នុងតូបនានារបស់អាជីវករ ដើម្បីជៀសវៀងបាត់បង់ដោយប្រការណាមួយ ដោយជនឆ្លៀតឱកាសផងដែរ។
ក្រោយពីមានឧប្បត្តិហេតុករណីអគ្គិភ័យឆេះផ្សារធំបាត់ដំបងនេះរួចមក រដ្ឋបាលខេត្តបាត់ដំបង រៀបចំកិច្ចប្រជុំបន្ទាន់មួយ ដើម្បីសិក្សាអំពីអ្វីដែលយើងត្រូវបន្តនិរន្តរ៍ភាពដើម្បីកុំឱ្យមានហេតុការណ៍នេះកើតឡើងបន្តទៅទៀត និងមានការចុះពិនិត្យសិក្សាវាយតម្លៃទំហំនៃការខូចខាតបណ្តាលមកពឆេះដោយចរន្តអគ្គីសនី ហើយនឹងពិនិត្យលទ្ធភាពដើម្បីធ្វើការជួសជុលនៅផ្នែកដែរឆេះខូច ដែលបណ្តាលមកពីកម្តៅភ្លើងលើតួផ្សារមួយចំនួន និងសិក្សាវាយតម្លៃអំពីគុណភាពសំណង់ ថាតើអាចប្រើប្រាស់បាន ឬត្រូវជួសជុលឡើងវិញផងដែរ ៕
ដោយ៖កូឡាប