ភ្នំពេញ៖ អភិបាលនៃគណៈអភិបាលរាជធានីភ្នំពេញលោកឃួង ស្រេង បានធ្វើការអំពាវនាវដល់ក្មួយៗយុវជនយុវនារី និងបងប្អូនប្រជាពលរដ្ឋទាំងអស់ រួមគ្នាទប់ស្កាត់ ការធ្វើបដិវត្តន៍ពណ៌ ការបម្រើមនោគមន៍វិជ្ជាបរទេស និងប្រឆាំងរាល់ការជ្រៀតជ្រែក ពីសំណាក់កងកម្លាំងអមិត្ត និងមិនឲ្យមានក្រុមណាមួយឬចលនាណាមួយ ទាញសង្គមជាតិរបស់យើងឲ្យធ្លាក់ក្នុងវិបត្តិកលិយុគ ដូចពេលអតីតកាល ៣ឆ្នាំ ៨ខែ និង២០ថ្ងៃទៀតទេ បើទោះបីក្នុងតម្លៃណាក៏ដោយ។
លោកឃួង ស្រេង បានអំពាវនាវបែបនេះ កាលពីព្រឹកថ្ងៃទី១ ខែកញ្ញា ឆ្នាំ២០២០នេះ ក្នុងពិធីសម្ពោធរូបសំណាក «ស្ត្រីកំពុងអង្គុយឱបកូន» នៅមជ្ឈមណ្ឌលប្រល័យពូជសាសន៍ជើងឯក ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ។
លោកឃួង ស្រេង បានមានប្រសាសន៍ថា នៅក្នុងប្រទេសកម្ពុជា និយាយដោយឡែកនៅរាជធានីភ្នំពេញ ក្នុងពេលអតីតកាល នៃរបបប៉ុលពត គឺបានធ្វើឲ្យរាជធានីភ្នំពេញ ក្លាយជាទីក្រុងខ្មោច ប្រជាពលរដ្ឋត្រូវបានជម្លៀសទៅកាន់ជនបទគ្មានសល់ បញ្ញវន្តត្រូវបានសម្លាប់រង្គាល ប្រជាជនអត់អាហារស្គមស្គាំង មានតែស្បែកនិងឆ្អឹង សកម្មភាពសេដ្ឋកិច្ច ពាណិជ្ជកម្មគ្រប់ប្រភេទ ត្រូវបានលុបបំបាត់ និងមានសង្គ្រាមឈ្លបនឹងចលនាឧទ្ទាមពាសពេញប្រទេស ហើយហេដ្ឋារចនាសម្ព័ន្ធនានា ត្រូវបានបំផ្លិចបំផ្លាញដល់ចំណុចសូន្យ។ ដូច្នេះលោកសូមអំពាវនាវឲ្យបងប្អូនជនរួមជាតិទាំងអស់ រក្សាឲ្យបានសន្តិភាព សន្តិសុខ សណ្ដាប់ធ្នាប់សង្គម ធ្វើយ៉ាងណាកុំឲ្យរបបប្រល័យពូជសាសន៍ វិលមកជាលើកទីពីរម្ដងទៀត។
លោកក៏បានបញ្ជាក់ផងដែរថា ការកសាងរូបសំណាកស្ត្រីកំពុងអង្គុយឱបកូន ស្ថិតនៅក្នុងបរិវេណមជ្ឈមណ្ឌលប្រល័យពូជសាសន៍ជើងឯកនេះ គឺដើម្បីរំលឹកឡើងវិញនូវ សច្ចធម៌ប្រវត្តិសាស្ត្រនៃជីវិតរស់នៅរបស់បងប្អូនប្រជាពលរដ្ឋទូទៅ ក្នុងរបបប្រល័យពូជសាសន៍ប៉ុលពត ចន្លោះឆ្នាំ១៩៧៥ ដល់ឆ្នាំ១៩៧៩ ដែលត្រូវព្រាត់ប្រាស់ក្រុមគ្រួសារ ប្រពន្ធព្រាត់ប្ដី ប្ដីព្រាត់កូន ហើយក៏មិនដឹងថាត្រូវព្រាត់ស្លាប់ឬ ព្រាត់រស់ ឯអ្នកនៅរស់ក៏រង់ចាំតែពេលត្រូវបានគេយកទៅសម្លាប់ប៉ុណ្ណោះ ពោលគឺជីវិតមានតែក្តីអស់សង្ឃឹម និងភាពភ័យរន្ធត់គ្រប់ពេលវេលា។ ដូច្នេះយើងត្រូវតែចុងចាំគ្មានថ្ងៃបំភ្លេច នឹងត្រូវផ្សព្វផ្សាយដល់មនុស្សជំនាន់ក្រោយ ឲ្យបានយល់ដឹងកុំឲ្យរបបព្រៃផ្សៃនេះ វិលត្រឡប់មកលើសង្គមជាតិយើង ជាលើកទីពីរទៀតឲ្យសោះ។
លោកស្រីរស់ សុភារ៉ាវី ប្រធានមជ្ឈមណ្ឌលប្រល័យពូជសាសន៍ជើងឯក បានមានប្រសាសន៍លើកឡើងផងដែរថា រូបសំណាកស្ត្រីអង្គុយឱបកូន ក្នុងស្ថានភាពភ័យរន្ធត់ និងអស់សង្ឃឹមក្នុងឆាកជីវិត ធ្វើឡើងអំពីស្ពាន់មានកម្ពស់២ម៉ែត្រ មានខឿនពីរថ្នាក់កម្ពស់ ១,២២ម៉ែត្រ ថ្នាក់ទី១ កម្ពស់១,៨៦ម៉ែត្រ បណ្ដោយ ៤,២០ម៉ែត្រ កម្រាលផ្ទៃខាងលើ៩ម៉ែត្រការ៉េ និងស៊ុំបូកថ្មលាងពណ៌ប្រផេះ បិតម៉ាបពណ៌ខ្មៅនៅជញ្ជាំងទាំងបួន ទិស ដោយមានចារិកអក្សរជាភាសាខ្មែរ និងអង់គ្លេស ដែលមានខ្លឹមសារ ស្ដីពីការចងចាំគ្មានថ្ងៃភ្លេចនូវរបបកម្ពុជាប្រជាធិបតេយ្យ ១៧ខែ ៤ឆ្នាំ ១៩៧៥ ថ្ងៃ៦ ខែមករា ឆ្នាំ១៩៧៩ ។ ថ្នាក់ទី២ កម្ពស់០,៣៦០ ម៉ែត្រ បណ្ដោយ ៤,២ម៉ែត្រ ផ្ទៃ កម្រាលថ្មម៉ាបពណ៌ប្រផេះខ្មៅ។ រូបសំណាកនេះមានកម្ពស់សរុប៣,២២ម៉ែត្រ និងបានប្រើប្រាស់រយៈពេលនៃការសាងសង់ចំនួន ៦ខែ៕ដោយ៖កូឡាប