កំពង់ឆ្នាំង ៖ អ្នកនាំពាក្យស្នងការដ្ឋាននគរបាលខេត្តកំពង់ឆ្នាំង នៅថ្ងៃទី១ ខែកញ្ញា ឆ្នាំ២០២០នេះ បានចេញរបាយការណ៍លម្អិតជុំវិញការបង្ក្រាប គំរាមកំហែង និងការប្រើប្រាស់ដឹកជញ្ជូនអាវុធដោយគ្មានការអនុញ្ញាត។ បុរសម្នាក់ជាកូនឧកញ៉ាញឹក ផន ហៅកៅ បានសម្ញែងកាំភ្លើងអាកាស្វ័យបត់ និងគំរាមបុកអ្នកជិះម៉ូតូ២នាក់ នៅស្រុកទឹកផុស ខេត្តកំពង់ឆ្នាំង រហូតមានការឃាត់ខ្លួនកូនអ្នកមានទ្រព្យរូបនោះ ដើម្បីធ្វើការសួរនាំ និងចាត់វិធានការតាមនីតិវិធី។
អ្នកនាំពាក្យ នៃស្នងការដ្ឋាននគរបាលខេត្តកំពង់ឆ្នាំង បានបញ្ជាក់ថា កាលពីថ្ងៃទី ៣១ ខែសីហា ឆ្នាំ ២០២០ វេលាម៉ោង ១៦ និង ៤៥ នាទី នៅចំណុចផ្លូវ ចូលចំការអំពៅរបស់ក្រុមហ៊ុនលោកឧកញ៉ា ញឹក ផន (ហៅភៅ) ស្ថិតក្នុងភូមិថ្នល់កែង ឃុំក្បាលទឹក ស្រុកទឹកផុស ខេត្តកំពង់ឆ្នាំង កើតមានករណីទំនាស់ពាក្យសម្តីគ្នា រវាងអ្នកបើកបររថយន្ត ឈ្មោះ ញឹក ផល ភេទប្រុស អាយុ ៣៨ ឆ្នាំ ជាតិខ្មែរ រស់នៅភូមិថ្នល់កែង ឃុំក្បាលទឹក ស្រុកទឹកផុស ខេត្តកំពង់ឆ្នាំង មុខរបរ មើលការខុសត្រូវចំការអំពៅ និងអ្នកបើកបរម៉ូតូ ឈ្មោះ ប្រាក់ សំបាន ភេទប្រុស អាយុ ៣០ ឆ្នាំ រស់នៅភូមិក្រសាំង ដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំង (បើកបរម៉ូតូក្នុងស្ថានភាពស្រវឹង) មុខរបរ ធ្វើស្រែ ។
អ្នកនាំពាក្យ បានបន្តថា ក្នុងករណីនេះដែរ ឈ្មោះ ញឹក ផល បានយកអាវុធអាកា៤៧ ចេញពីក្នុងរថយន្ត មកគំរាមឈ្មោះ ប្រាក់ សំបាន ប៉ុន្តែ មិនបានផ្ទុះអាវុធនោះទេ ។
ពេលទទួលបានព័ត៌មានខាងលើ លោកស្នងការនគរបាលខេត្ត បានបញ្ជាកម្លាំង ជំនាញព្រហ្មទណ្ឌ ខេត្ត ស្រុក និងប៉ុស្តិ៍ ចុះដល់កន្លែងកើតហេតុ ធ្វើការស្រាវជ្រាវស៊ើបអង្កេត និងបានឃាត់ខ្លួនឈ្មោះ ញឹក ផល បញ្ជូនមកស្នងការដ្ឋាននគរបាលខេត្ត ដើម្បីចាត់ការតាម នីតិវិធី រីឯឈ្មោះ ប្រាក់ សំបាន គេចខ្លួន ។
អ្នកនាំពាក្យ នៃស្នងការដ្ឋាននគរបាលខេត្តកំពង់ឆ្នាំង សូមធ្វើការប្រកាសព័ត៌មានជូនមតិសាធារណជនបានជ្រាបថា
១-ឈ្មោះ ញឹក ផល បានឆ្លើយសារភាពបឋម ថាៈ អាវុធធុន អាកា៤៧ គឺជាអាវុធដែល រើសបានពីក្នុងដីពេលភ្ជួរដាំអំពៅ ហើយយកមកដុសខាត់បាញ់ថ្នាំថ្មី ។ ២-ករណីនេះ “លោកស្នងការ បានបញ្ជាឲ្យជំនាញចាត់ការយ៉ាងតឹងរ៉ឹង ទៅតាមច្បាប់ជាធរមាន ។
២-សូមអរគុណទៅដល់ អ្នកប្រើប្រាស់បណ្តាញសង្គមមួយចំនួន ដែលផ្សព្វផ្សាយព័ត៌មានបន្តប្រកបដោយសីលធម៌ ហើយជឿជាក់មកលើចំណាត់ការរបស់សមត្ថកិច្ចនគរបាលខេត្តកំពង់ឆ្នាំង ។
អ្នកបើករថយន្ត និងបានទាញកំភ្លើងមកគំរាម មានឈ្មោះ ញឹក ផល អាយុ៣៨ឆ្នាំ មុខរបរមើលការខុសត្រូវចំការអំពៅ រីឯអ្នកបើកម៉ូតូមានឈ្មោះ ប្រាក់ សំបាន អាយុ៣០ឆ្នាំ រស់នៅភូមិក្រសាំងដុះឡើង ឃុំក្បាលទឹក ស្រុកទឹកផុស (បើកម៉ូតូក្នុងស្ថានភាពស្រវឹង)។
បើតាមស្នងការដ្ឋាននគរបាលខេត្តនៅក្នុងសេចក្តីប្រកាសព័ត៌មានរបស់ខ្លួន ឈ្មោះ ញឹក ផល បានសារភាពថា អាវុធធុនអាកា៤៧ ជាអាវុធដែលខ្លួនរើសបានពីក្នុងដីពេលភ្ជួរដាំអំពៅ ហើយយកមកដុសខាត់បាញ់ថ្នាំថ្មី។ ករណីនេះ លោកឧត្តមសេនីយ៍ស្នងការ បានបញ្ជាជំនាញឲ្យចាត់ការយ៉ាងតឹងរឹងទៅតាមច្បាប់ជាធរមាន។
សូមបញ្ជាក់ថា នៅរសៀលថ្ងៃទី៣១ ខែសីហា ឆ្នាំ២០២០ម្សិលមិញនេះ មានជម្លោះពាក្យសម្តីព្រោះតែការបើកបរមួយរវាងអ្នកជិះរថយន្ត និងអ្នកជិះម៉ូតូ នៅភូមិថ្នល់កែង ឃុំក្បាលទឹក ស្រុកទឹកផុស ខេត្តកំពង់ឆ្នាំង។
តាមរយៈវីដេអូថតដោយបុរសអ្នកជិះម៉ូតូ ហើយបង្ហោះ និងចែកចាយយ៉ាងព្រោងព្រាតលើបណ្តាញសង្គមនោះ គេបានឃើញបុរសភាគីអ្នកជិះរថយន្ត បាននិយាយគំរាមឱ្យបុរសជិះម៉ូតូបើកបរឱ្យ បានត្រឹមត្រូវ ហើយថែមទាំងបានគំរាមបុកអ្នកជិះម៉ូតូផងដែរ។ មិនត្រឹមតែគំរាមបុក និងប្រើសម្តីធ្ងន់ៗដាក់ទៅបុរសជិះម៉ូតូនោះទេ បុរសជាអ្នកជិះរថយន្តនេះថែមទាំងបានទាញយកកាំភ្លើង AK៤៧ ចេញពីក្នុងរថយន្តមកកាន់សម្ញែងដាក់ភាគីជម្លោះថែមទៀតផង៕ដោយ៖កូឡាប