អាជ្ញាធរមីន៖ សម្តេចនាយករដ្ឋមន្ត្រី បានដាក់ចេញនូវចក្ខុវិស័យ និងផែនការយុទ្ធសាស្ត្រយ៉ាងច្បាស់លាស់ ដើម្បីបញ្ចប់ការគំរាមកំហែងដោយសារមីនប្រឆាំងមនុស្ស ឲ្យអស់ត្រឹមនៅឆ្នាំ២០២៥ និងកាត់បន្ថយគ្រោះថ្នាក់ ដោយសារមីន និងគ្រាប់ ឲ្យនៅកម្រិតអប្បបរមា។
ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអនុញ្ញាតឲ្យលោក Buerli Markus នាយកទីភ្នាក់ងារអភិវឌ្ឍន៍ប្រទេសស្វីសថ្មី ចូលជួបពិភាក្សាការងារស្តីពីកិច្ចសហប្រតិបត្តិការ និងភាពជាដៃគូ លើវិស័យសកម្មភាពមីននៅកម្ពុជា នាព្រឹកថ្ងៃទី១ ខែកញ្ញា ឆ្នាំ២០២០។
ឯកឧត្តមទេសរដ្ឋមន្ត្រី បានលើកឡើងពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់ សម្តេចតេជោ នាយករដ្ឋមន្ត្រី បានដាក់ចេញនូវចក្ខុវិស័យ និងផែនការយុទ្ធសាស្ត្រយ៉ាងច្បាស់លាស់ ដែលសម្តេចតេជោចង់ឃើញ កម្ពុជាបញ្ចប់ការគំរាមកំហែងដោយសារមីនប្រឆាំងមនុស្សដែលបានស្គាល់ អោយអស់ត្រឹមនៅឆ្នាំ២០២៥ និងកាត់បន្ថយគ្រោះថ្នាក់ដោយសារមីននិងគ្រាប់ឲ្យនៅកម្រិតអប្បបរមា។
ក្នុងនាមរាជរដ្ឋាភិបាលកម្ពុជា ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនស្វីស ដែលបានចូលរួមចំណែកដល់ការអភិវឌ្ឍនៅកម្ពុជា ក្នុងនោះរួមមានការងារបោសសម្អាតមីនមនុស្សធម៌ ចាប់តាំងពីឆ្នាំ២០១៣។
ជាមួយនឹងការប្រយុទ្ធប្រឆាំងគ្រាប់បែកចង្កោមនេះ ឯកឧត្តមទេសរដ្ឋមន្ត្រី បានបញ្ជាក់សារជាថ្មីម្តងទៀតថា ក្នុងនាមសម្តេចតេជោ ជាអ្នកកសាង និងស្រឡាញ់សន្តិភាព ហើយកម្ពុជាធ្លាប់រងគ្រោះយ៉ាងធ្ងន់ធ្ងរដោយសារគ្រាប់បែកចង្កោម កម្ពុជានៅរក្សាជំហរដដែល និងនៅតែចូលរួមជារដ្ឋសង្កេតការណ៍នៃអនុសញ្ញាគ្រាប់បែកចង្កោមនេះ ព្រមទាំងត្រៀមផ្តល់នូវកិច្ចសហប្រតិបត្តិការគ្រប់បែបយ៉ាង ក្នុងនាមប្រទេសស្វីសធ្វើជាប្រធាននៃកិច្ចប្រជុំអនុសញ្ញាគ្រាប់បែកចង្កោម ដើម្បីឈានដល់ការបញ្ចប់នូវសោកនាដកម្មដោយសារសំណល់ជាតិផ្ទុះពីសង្គ្រាម ជាពិសេសគ្រាប់បែកចង្កោម។
ឯកឧត្តមបន្តទៀតថា កម្ពុជាបានធ្វើគ្រប់បែបយ៉ាងទាំងអស់ក្នុងការស្រាវជ្រាវ ការរុករក ការកម្ទេចចោល ការអប់រំយល់ដឹងពីគ្រាប់បែកចង្កោម ការធ្វើសកលភាវូបនីកម្មនៃការហាមប្រើប្រាស់ ការជួយជនរងគ្រោះ និងការធ្វើសេចក្តីរាយការណ៍អំពីការងារប្រយុទ្ធប្រឆាំងនឹងគ្រាប់បែកចង្កោម។
ឆ្លៀតក្នុងឱកាសនោះ លោក Buerli Markus បានបញ្ជាក់ថា រដ្ឋាភិបាលស្វីស បានអបអរសាទរចំពោះភាពជាដៃគូ និងកិច្ចសហប្រតិបត្តិការល្អ គាំទ្រជាមួយរាជរដ្ឋាភិបាលកម្ពុជា ក្នុងការងារបោសសម្អាតមីនមនុស្សធម៌នៅកម្ពុជា ហើយនឹងបន្តគាំទ្ររហូតដល់កម្ពុជាអស់មីននៅឆ្នាំ២០២៥ និងបន្តជួយក្រោយឆ្នាំ២០២៥ ទៀត។
លោកបានវាយតម្លៃខ្ពស់ចំពោះការងារបោសសម្អាតមីន និងសំណល់ជាតិផ្ទុះពីសង្គ្រាម ដែលវិស័យនេះ បានចូលរួមចំណែកយ៉ាងសំខាន់លើការងារអភិវឌ្ឍស្ទើរគ្រប់វិស័យរបស់ប្រទេសជាតិ ដូចជា កសិកម្ម ហេដ្ឋារចនាសម្ព័ន្ធ សុខាភិបាល អប់រំ យេនឌ័រ កាត់បន្ថយភាពក្រីក្រ ជាដើម។
ជាមួយគ្នានេះ លោក Buerli Markus បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានគាំទ្រប្រទេសស្វីស ធ្វើជាប្រធានដឹកនាំកិច្ចប្រជុំរដ្ឋភាគីនៃអនុសញ្ញាគ្រាប់បែកចង្កោម នៅចុងឆ្នាំ២០២០ ខាងមុខនេះ៕ដោយ៖កូឡាប
