ភ្នំពេញ៖ អគ្គស្នងការដ្ឋាននគរបាលជាតិ នាយឧត្តមសេនីយ៍ នេត សាវឿន នៅថ្ងៃទី ១ ខែកញ្ញា ឆ្នាំ២០២០ បានចេញសេចក្តីណែនាំ ស្តីពីវិធានការការពារ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងពិធីបុណ្យកាន់បិណ្ឌ-បុណ្យភ្ជុំបិណ្ឌ ឆ្នាំ២០២០។
នាយឧត្តមសេនីយ៍ នេត សាវឿន បានថ្លែងថា ក្នុងគោលបំណងធានាបាននូវស្ថិរភាពសន្តិសុខ សណ្តាប់ធ្នាប់សាធារណៈ សុវត្ថិភាពសង្គម សំដៅ បង្កបរិយាកាសសប្បាយរីករាយជូនប្រជាពលរដ្ឋក្នុងឱកាសបុណ្យកាន់បិណ្ឌ បុណ្យភ្ជុំបិណ្ឌ តាមប្រពៃណី ទំនៀមទម្លាប់ដ៏រុងរឿងរបស់ជាតិ ដែលនឹងប្រព្រឹត្តទៅចាប់ពីថ្ងៃទី ៣ ដល់ថ្ងៃទី ១៨ ខែកញ្ញា ឆ្នាំ២០២០ ខាងមុខនេះ អគ្គស្នងការដ្ឋាននគរបាលជាតិ សូមធ្វើការណែនាំដល់នាយកដ្ឋានកណ្តាល នាយកដ្ឋាន អង្គភាពជំនាញ និងស្នងការដ្ឋាននគរបាលរាជធានី -ខេត្ត ដូចខាងក្រោម ៖
១-ត្រូវយកចិត្តទុកដាក់បង្កើនការក្តាប់ និងវិភាគវាយតម្លៃនូវសភាពការណ៍ និងព័ត៌មាននានា ពាក់ព័ន្ធសន្តិសុខ និងសណ្តាប់ធ្នាប់សង្គម ជាពិសេសសកម្មភាពភេរវកម្ម ឧក្រិដ្ឋកម្ម និងសកម្មភាព ល្មើសច្បាប់ផ្សេងៗទៀតដើម្បីចាត់វិធានការបង្ការ ទប់ស្កាត់ និងបង្ក្រាបឲ្យមានប្រសិទ្ធភាពទាន់ពេលវេលា។
២ -ត្រូវជំរុញការអនុវត្តគោលនយោបាយ “ភូមិ -ឃុំ មានសុវត្ថិភាព” ឲ្យបានសកម្មផុលផុស និងត្រូវយកចិត្តទុកដាក់គ្រប់គ្រងឲ្យបានហ្មត់ចត់នូវមុខសញ្ញាគ្រប់ប្រភេទនៅតាមសហគមន៍ ភូមិ-ឃុំ ដោយប្រើប្រាស់នូវគ្រប់វិធានការ ដើម្បីបំបាត់ប្រសិទ្ធភាព ជាមុន មិនទុកឲ្យមុខសញ្ញាមានឱកាសធ្វើ សកម្មភាពបង្កអសន្តិសុខ ឬគ្រោះថ្នាក់ដល់អាយុជីវិត និងបង្កមហន្តរាយដល់ទ្រព្យសម្បត្តិរបស់ប្រជា ពលរដ្ឋឡើយ។
៣-ត្រូវចាត់វិធានការការពារយ៉ាងម៉ឺងម៉ាត់គ្រប់គោលដៅប្រារព្ធពិធីបុណ្យ និងគោលដៅ កម្សាន្តសប្បាយនានា ដូចជា៖ ទីវត្តអារ៉ាម ប្រាង្គប្រាសាទ រមណីយដ្ឋាន ព្រមទាំងបង្កើនកិច្ចការពារ សន្តិសុខ និងធានាសុវត្ថិភាពថ្វាយព្រះមហាក្សត្រ និងថ្នាក់ដឹកនាំកំពូលៗរបស់ជាតិ ដែលយាង និង អញ្ជើញទៅចូលរួមពិធីបុណ្យ។ ទន្ទឹមនោះត្រូវយកចិត្តទុកដាក់យាមកាម ល្បាតការពារផ្ទះសម្បែងទ្រព្យ សម្បត្តិប្រជាពលរដ្ឋដែលធ្វើដំណើរទៅស្រុកកំណើត ឬទៅសម្រាកកំសាន្តនៅតាមតំបន់នានាទាំង គ្រួសារ…។ល។
៤ -ត្រូវបន្តយកចិត្តទុកដាក់រឹតបន្តឹងការអនុវត្តច្បាប់ចរាចរណ៍ផ្លូវគោក តាមស្មារតីអនុក្រឹត្យ លេខ ៣៩អនក្រ.បក ចុះថ្ងៃទី ១៧ ខែមីនា ឆ្នាំ២០២០ ជាពិសេសត្រូវត្រួតពិនិត្យឲ្យបានហ្មត់ចត់នៅ គ្រប់គោលដៅដើមទី។ ជាមួយគ្នានេះ ក៏ត្រូវរៀបចំសណ្តាប់ធ្នាប់ចរាចរណ៍តាមដងផ្លូវជាតិ ទីប្រជុំជន ច្រកចេញ-ចូលរាជធានី -ខេត្តឲ្យបានល្អ សំដៅកាត់បន្ថយការកកស្ទះ ឬគ្រោះថ្នាក់ដែលអាចកើតឡើង ជាយថាហេតុ និងត្រូវសហការជាមួយបណ្តាញព័ត៌មានសំខាន់ៗ ធ្វើការផ្សព្វផ្សាយព័ត៌មានទាន់ ហេតុការណ៍អំពីការកកស្ទះចរាចរណ៍ ដើម្បីឲ្យប្រជាពលរដ្ឋបានជ្រាប និងបង្វែរទិសធ្វើដំណើរ។
៥-ត្រូវជំរុញអនុវត្តតាមខ្លឹមសារសេចក្តីណែនាំរបស់ក្រសួងមហាផ្ទៃ និងរបស់អគ្គស្នងការដ្ឋាននគរបាលជាតិ ស្តីពីវិធានការបន្ទាន់សម្រាប់បង្ការ និងការទប់ស្កាត់ការរាតត្បាតជំងឺកូវីដ-១៩ ដោយ ណែនាំឲ្យមន្ត្រីបន្តចុះធ្វើការផ្សព្វផ្សាយអប់រំបន្ថែមទៀតអំពីវិធានសុខាភិបាល ជូនដល់ប្រជាពលរដ្ឋឲ្យ បានយល់ជ្រួតជ្រាប និងចូលរួមបង្ការជំងឺឆ្លងដ៏កាចសាហាវនេះ ជាពិសេសនៅតាមបណ្តាវត្តអារ៉ាម រមណីយដ្ឋាន ទីកម្សាន្តសប្បាយនានា)។ ក្នុងករណីសង្ស័យមានអ្នកផ្ទុកវីរុសកូវីដ-១៩ ត្រូវរាយការណ៍ ជាបន្ទាន់ទៅអាជ្ញាធរមានសមត្ថកិច្ចដែលនៅជិតបំផុត។
៦ -ត្រូវយកចិត្តទុកដាក់អប់រំប្រជាពលរដ្ឋ ឲ្យមានស្មារតីប្រុងប្រយ័ត្នចំពោះគ្រោះអគ្គិភ័យ និងគ្រោះមហន្តរាយនានា និងត្រូវពង្រឹងបន្ថែមការងារប្រចាំបញ្ជាគ្រប់ថ្នាក់ ដើម្បីត្រៀមអន្តរាគមន៍បានទាន់ពេលវេលា។ ទន្ទឹមនោះ ក៏ត្រូវរៀបចំឲ្យមានការផ្លាស់ប្តូរវេនប្រចាំការ សំដៅធ្វើយ៉ាងណាឲ្យកងកម្លាំងនគរបាលទាំងអស់ បានឈប់សម្រាកចូលរួមក្នុងពិធីបុណ្យគ្រប់ៗគ្នា។
៧-ត្រូវរៀបចំប្រតិភូ និងអំណោយ ចុះសួរសុខទុក្ខកងកម្លាំងនគរបាលនៅសមរភូមិមុខ កម្លាំងកំពុងសម្រាកព្យាបាលនៅតាមមន្ទីរពេទ្យ គេហដ្ឋាន និងគ្រួសារមន្ត្រីនគរបាលដែលបានពលី ឬរងរបួស ក្នុងបុព្វហេតុការពារជាតិ។
៨-ត្រូវបូកសរុបសភាពការណ៍ និងលទ្ធផលកិច្ចប្រតិបត្តិការ ក្នុងអំឡុងពេលកាន់បិណ្ឌ និង បុណ្យភ្ជុំបិណ្ឌ ជាពីរផ្សេងៗគ្នាគឺ ចាប់ពីបិណ្ឌទី១ ដល់ថ្ងៃភ្ជុំបិណ្ឌ និងរយៈពេល ៣ថ្ងៃ បុណ្យភ្ជុំបិណ្ឌរាយការណ៍មកអគ្គស្នងការដ្ឋាននគរបាលជាតិ នៅថ្ងៃទី ១៨ ខែកញ្ញា ឆ្នាំ២០២០ ជាកំហិត។
ទទួលបានសេចក្តីណែនាំនេះ ស្នើអស់លោកប្រធាននាយកដ្ឋានកណ្តាល នាយកដ្ឋាន-អង្គភាព ជំនាញ និងស្នងការដ្ឋាននគរបាលរាជធានី-ខេត្ត ចាត់ចែងអនុវត្តក្នុងស្មារតីទទួលខុសត្រូវ និងប្រកបដោយ ប្រសិទ្ធភាពខ្ពស់៕ដោយ៖កូឡាប