ភ្នំពេញ ៖ លោកជំទាវ Liurka Rodriguez Barrios ឯកអគ្គរដ្ឋទូត នៃសាធារណរដ្ឋគូបា ប្រចាំនៅព្រះរាជាណាចក្រកម្ពុជា បានសាទរចំពោះលទ្ធផលជាវិជ្ជមាននៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ខណៈរយៈពេល១០០ថ្ងៃនៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត សំណុំរឿងព្រហ្មទណ្ឌជាង៨,០០០ករណី។
នៅ ថ្ងៃទី១ ខែកញ្ញា ឆ្នាំ២០២០ នៅទីស្តីការក្រសួងយុត្តិធម៌ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌បានទទួលជួបសម្តែងការគួរសមនិងពិភាក្សាកិច្ចការមួយចំនួនជាមួយលោកជំទាវ Liurka Rodriguez Barrios ឯកអគ្គរដ្ឋទូតសាធារណរដ្ឋគូបាប្រចាំព្រះរាជាណាចក្រកម្ពុជា។
នៅក្នុងជំនួបនេះ លោកជំទាវឯកអគ្គរដ្ឋទូតបានសម្តែងនូវការកោតសរសើរចំពោះភាពឆ្លាតវៃរបស់ប្រមុខរាជរដ្ឋាភិបាលកម្ពុជាក្នុងការគ្រប់គ្រងការរីករាលដាលនៃវីរុសកូវីដ១៩ ប្រកបដោយប្រសិទ្ធភាព ដែលជាគំរូដ៏ល្អមួយសម្រាប់សកលលោកយកតម្រាប់តាម ហើយលោកជំទាវក៏បានសម្តែងនូវការគាំទ្រនិងសាទរចំពោះលទ្ធផលជាវិជ្ជមាននៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត។
ជាកិច្ចឆ្លើយតប ឯកឧត្តមរដ្ឋមន្ត្រីបានថ្លែងអំណរគុណចំពោះការកោតសរសើររបស់លោកជំទាវឯកអគ្គរដ្ឋទូត ព្រមទាំងបានជម្រាបលោកជំទាវឱ្យបានជ្រាបផងដែរថា នៅក្នុងរយៈពេល១០០ថ្ងៃនៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត សំណុំរឿងព្រហ្មទណ្ឌជាង៨,០០០ករណីត្រូវបានដោះស្រាយដែលស្មើនឹង៦៣%នៃសំណុំរឿងកកស្ទះកន្លងមក ហើយការដោះស្រាយការកកស្ទះសំណុំរឿងនៅតាមសាលាដំបូងរាជធានីខេត្តត្រូវបានរំពឹងថានឹងចប់សព្វគ្រប់នៅដំណាច់ឆ្នាំ២០២០នេះ។
ជាចុងក្រោយ ថ្នាក់ដឹកនាំទាំងពីរបានអបអរសាទរចំពោះខួប៦០ឆ្នាំនៃទំនាក់ទំនងការទូតរវាងប្រទេសទាំងពីរ និងសម្តែងនូវឆន្ទៈយ៉ាងមុតមាំក្នុងការពង្រឹងនិងពង្រីកកិច្ចសហប្រតិបត្តិការទ្វេភាគីឱ្យកាន់តែទូលំទូលាយបន្ថែមទៀត៕ ដោយ៖កូឡាប
