ភ្នំពេញ ៖ ក្រោយប្រតិបត្តិការចេញមួយយប់ ទីបំផុតនាព្រឹកថ្ងៃទី២ ខែកញ្ញា ឆ្នាំ២០២០នេះ ជនដៃដល់ដែលរំលោភសម្លាប់ក្មេងស្រី អាយុ១៤ឆ្នាំ នៅខណ្ឌពោធិ៍សែនជ័យ កាលពីល្ងាចម្សិលមិញ ត្រូវកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ ចាប់ខ្លួនបាននៅខណ្ឌព្រែកព្នៅ ហើយបញ្ជូនទៅនាយកដ្ឋាននគរបាលព្រហ្មទណ្ឌ ដើម្បីចាត់ការបន្ដតាមនីតិវិធី។
ជនសង្ស័យបានសារភាពប្រាប់សមត្ថកិច្ចថា នៅថ្ងៃកើតហេតុរូបគេមានអាការស្រវឹង ឃើញក្មេងស្រីរងគ្រោះនៅក្នុងបន្ទប់ម្នាក់ឯង ក៏ចូលក្នុងបន្ទប់ចាប់ក្មេងស្រីនោះ ឆក់ខ្សែភ្លើង និងអារក ទើបរំលោភតាមក្រោយ។
អង្គភាពការពារកុមារ (CPU) Child Protection Unit បានចេញរបាយការណ៍ថា ករណីរំលោភសម្លាប់ក្មេងស្រីអាយុ ១៤ឆ្នាំនៅក្នុងផ្ទះ។
អង្គភាពការពារកុមារ (CPU) ក្នុងកិច្ចសហប្រតិបត្តិការជាមួយនគរបាលរាជធានីភ្នំពេញ, នគរបាលខណ្ឌពោធិ៏សែនជ័យ និងក្រសួងមហាផ្ទៃបានរួមគ្នាបង្កើតក្រុមកម្លាំងការងារចម្រុះ GOLF 20 ដើម្បីពិនិត្យទៅលើករណីរំលោភសម្លាប់ទៅលើកុមារអាយុ ១៤ឆ្នាំនៅក្នុងផ្ទះរបស់នាងក្នុងសង្កាត់ចោមចៅ២ ខណ្ឌពោធិ៍សែនជ័យ។
នៅវេលាម៉ោង៣ និង៤៥នាទីរសៀល ម្តាយជនរងគ្រោះបានចេញទៅទិញម្ហូប និងខោអាវ។ នៅវេលាម៉ោង៤ បងប្រុសរបស់ជនរងគ្រោះបានត្រឡប់មកផ្ទះ ហើយប្រទះឃើញសាកសពអាក្រាត របស់ជនរងគ្រោះស្លាប់ក្នុងថ្លុកឈាម។
សមត្ថកិច្ច និងអង្គភាពការពារកុមារបានទទួលដំណឹង ហើយបានចុះទៅកន្លែងកើតហេតុ។ ក្រុមការងារស៊ើបអង្កេតបទល្មើសមនុស្សឃាត (HIT) និងក្រុមការងារបច្ចេកទេស និងវិទ្យាសាស្ត្រ (FST) បានធ្វើការពិនិត្យកន្លែងកើតហេតុ និងសាកសព។
“មុខរបួសដែលមាននៅលើសាកសពក្មេងស្រីនេះ គឺពិតជាសាហាវព្រៃផ្សៃ ដោយមានស្នាមវាយ និងស្នាមកាំបិត។” “យើងនឹងធ្វើគ្រប់យ៉ាងដើម្បីស្វែងរក និងចាប់ខ្លួនជនល្មើសក្នុងករណីនេះ។” លោក James McCABE នាយកប្រតិបត្តិ អង្គភាពការពារកុមារ។
ភស្តុតាងជាច្រើនត្រូវបានដកហូតមករក្សាទុកពីកន្លែងកើតហេតុ ហើយយើងបានចាប់ផ្តើមស្វែងរកជនល្មើស។
ប្រតិបត្តិការនេះ ដឹកនាំដោយលោកឧត្តមសេនីយ៍ត្រី ជាវ វិបុល អនុប្រធាននាយកដ្ឋានព្រហ្មទណ្ឌ ដោយមានការសហការជាមួយកម្លាំងនគរបាលខណ្ឌពោធិ៍សែនជ័យ ខណ្ឌព្រែកព្នៅ ដោយធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, ឧត្តមសេនីយ៍ឯក អ៊ិន បូរ៉ា អគ្គស្នងការរងទទួលផែន និងចង្អុលបង្ហាញយ៉ាងយកចិត្តទុកដាក់ពី លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ឲ្យកម្លាំងជំនាញបើកការស្រាវជ្រាវបន្ទាន់ក្រោយកើតហេតុ។
ក្មេងស្រីម្នាក់ត្រូវបានឃាតករំលោភរួចអារកសម្លាប់បំបិទមាត់ បណ្ដាលឲ្យស្លាប់ទាំងអាក្រាតកាយ នៅក្នុងថ្លុកឈាម។
សាកសពនាងត្រូវបានបងប្រុសជីដូនមួយប្រទះឃើញ បង្កឲ្យមានការភ្ញាក់ផ្អើលវេលាម៉ោង៤និង០០នាទីរសៀល ថ្ងៃទី១ ខែកញ្ញា ឆ្នាំ២០២០ នៅក្នុងបន្ទប់ជួលមួយកន្លែង ស្ថិតនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ក្មេងស្រីដែលត្រូវបានសម្លាប់នោះមានឈ្មោះ ពេញ ស្រីពេជ្រ អាយុ១៤ឆ្នាំ មានបងប្អូនចំនួន៤នាក់ ហើយនាងគឺជាកូនទី៤ មានឪពុកឈ្មោះ ទ្រី អ៉ី អាយុ៥០ឆ្នាំ មុខរបររត់ម៉ូតូកង់បី និងម្តាយឈ្មោះ ចាន់ ស្រី មុំ អាយុ៤៥ឆ្នាំ មុខរបរកម្មការនីរោងចក្រ មានស្រុកកំណើត នៅក្នុងភូមិដីក្រហម ឃុំសំភាស ស្រុកស្ទឹងត្រង់ ខេត្តកំពង់ចាម។ ព្រោះតែការតក់ស្លុតខ្លាំងពេក ម្ដាយបានយំសោករហូតដល់សន្លប់។
ប្រភពខាងលើបានប្រាប់ឲ្យដឹងបន្ថែមទៀតថា នៅមុនពេលកើតហេតុ ជនរងគ្រោះបានទៅលេងផ្ទះអ្នកជិតខាងជាមួយម្ដាយ ក្រោយមកមេឃងងឹតជិតធ្លាក់ភ្លៀង នាងបានទៅប្រមូលខោអាវ ដែលហាលទុកនៅជិតបន្ទប់ជួលដែលស្នាក់នៅ ហើយក៏បាត់រហូតមិនបានឃើញត្រឡប់ទៅរកម្ដាយវិញឡើយ។ ចំណែកម្ដាយ ក៏មិនបានទៅតាមកូនស្រីរូបនេះដែរ។ លុះក្រោយពីរាំងភ្លៀងរយៈពេល១ម៉ោងក្រោយមក មានយុវជនម្នាក់ដែលត្រូវជាក្មួយគាត់ និងជាបងប្រុសជីដូនមួយនារីរងគ្រោះ ជិះម៉ូតូទៅកាន់បន្ទប់ជួលនោះ ក្នុងបំណងឌុបកូនប្រុសគាត់ម្នាក់ទៀត ដែលត្រូវជាបងប្រុសបង្កើតនារីរងគ្រោះ ទៅរកហូបអាហារល្ងាចនៅខាងក្រៅ។ ពេលទៅដល់បានប្រទះឃើញនាងរងគ្រោះស្លាប់ ដោយអាក្រាតកាយនៅក្នុងថ្លុកឈាម និងមានស្នាមអារកថែមទៀត ទើបស្រែកឆោឡោបង្កការភ្ញាក់ផ្អើល ហើយរាយការណ៍ជូនសមត្ថកិច្ចមូលដ្ឋាន ចុះទៅពិនិត្យដើម្បីរាយការណ៍បន្តទៅកាន់នគរបាលការិយាល័យបច្ចេកទេស នៃស្នងការដ្ឋាននគរបាលរាជធានីភ្នំពេញ ចុះធ្វើកោសល្យវិច័យ ដើម្បីកំណត់អត្តសញ្ញាណឃាតករ៕
ដោយ៖បញ្ញាស័ក្តិ
