ព្រៃវែង ៖ លោកអ៊ីន ប៊ុនលី ចៅក្រមស៊ើបសួរនៃសាលាដំបូងខេត្តព្រៃវែង បានចេញដីកាបង្គាប់ឲ្យឃុំខ្លួនបណ្តោះអាសន្ន (តាមមាត្រា ២១៩ និងមាត្រាបន្តបន្ទាប់ នៃក្រមនីតិវិធីព្រហ្មទណ្ឌ) ឃុំខ្លួនជនល្មើស២នាក់ជាបងប្អូនបង្កើត ករណីឃាតកម្មសម្លាប់បងប្អូនជីដូនមួយខ្លួនឯង ។
លោកចៅក្រមបានបញ្ជាក់ថា -បានឃើញមាត្រា ២០៣,២០៤,២០៥, និងមាត្រា ២០៦ នៃក្រមនីតិវិធីព្រហ្មទណ្ឌ។ -បានឃើញសំណុំរឿងព្រហ្មទណ្ឌលេខ ៤២២ ចុះថ្ងៃទី ៣១ ខែសីហា ឆ្នាំ២០២០។ -បានឃើញសំណុំរឿងស៊ើបសួរលេខ ២៨៦ មខ ចុះថ្ងៃទី០១ ខែកញ្ញា ឆ្នាំ២០២០។ -បានឃើញដីកាសន្និដ្ឋានបញ្ជូនរឿងឲ្យស៊ើបសួរលេខ ២៨៦ អ.ក ចុះថ្ងៃទី ៣១ ខែសីហា ឆ្នាំ២០២០ របស់តំណាងអយ្យការអមសាលាដំបូងខេត្តព្រៃវែង។ -បានឃើញដីកាសម្រេចឲ្យឃុំខ្លួនបណ្តោះអាសន្នលេខ ៨៨ ចុះថ្ងៃទី០១ ខែកញ្ញា ឆ្នាំ ២០២០ ទាក់ទងនឹងជនត្រូវចោទឈ្មោះ នី ធី ភេទប្រុស អាយុ៣២ឆ្នាំ ជាតិខ្មែរ មុខរបរកម្មករសំណង់ ទីកន្លែងកំណើត និង ទីលំនៅបច្ចុប្បន្ននៅភូមិពារាំង ឃុំរាប ស្រុកពារាំង ខេត្តព្រៃវែង ឪពុកឈ្មោះ ឈៀង នី (ស) ម្តាយឈ្មោះ ព្រីង ម៉ៅ (រ) ប្រពន្ធឈ្មោះ ពិន សុខនីម មានកូន ០៣នាក់ ប្រវត្តិនៃការផ្តន្ទាទោស ពីមុនគ្មាន។ ឃាត់ខ្លួននៅថ្ងៃទី ២៨ ខែសីហា ឆ្នាំ២០២០។
លោកចៅក្រម បានលើកឡើងថា ជននេះត្រូវដាក់ឲ្យស្ថិតក្រោមការពិនិត្យពីបទ ហិង្សាដោយចេតនាមានស្ថានទម្ងន់ទោសដោយសារ មរណភាពនៃជនរងគ្រោះ ប្រព្រឹត្តនៅភូមិគគរ ឃុំរាប ស្រុកពារាំង ខេត្តព្រៃវែង កាលពីថ្ងៃទី២០ ខែសីហា ឆ្នាំ២០២០ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា ២២៤ នៃក្រមព្រហ្មទណ្ឌ។
លោកចៅក្រមក៏បានបង្គាប់ឲ្យភ្នាក់ងារមានសមត្ថកិច្ចនៃកម្លាំងសាធារណៈធ្វើការនាំខ្លួនជនត្រូវចោទឈ្មោះ នី ធី ទៅពន្ធនាគារ ខេត្តព្រៃវែងដោយអនុវត្តឲ្យបានត្រឹមត្រូវតាមនីតិវិធីច្បាប់។ បង្គាប់មកលោកប្រធានពន្ធនាគារខេត្តព្រៃវែង ឲ្យទទួល និងឃុំខ្លួនជននេះរហូតដល់មានបទបញ្ជាថ្មីសម្រេចផ្សេងពីនេះ។ បង្គាប់មកគ្រប់ភ្នាក់ងារនៃកម្លាំងសាធារណៈទាំងអស់ នៅពេលបង្ហាញដីកានេះ ត្រូវសហការអនុវត្តឲ្យបានល្អក្នុងករណីចាំបាច់។
សូមបញ្ជាក់ថា ករណីឃាតកម្មចាក់សម្លាប់យុវជនម្នាក់នៅផ្លូវជាតិលេខ៨ ភូមិគគរ ឃុំកំពង់ពពិល ស្រុកពារាំង ខេត្តព្រៃវែង កាលពីយប់ទី២០ ខែសីហា ឆ្នាំ២០២០នោះ ត្រូវសមត្ថកិច្ចខេត្តព្រៃវែងចាប់ឃាត់ខ្លួនជនដៃដល់បានហើយ ដោយពួកគេមានគ្នា២នាក់ ត្រូវជាបងប្អូនបង្កើតនឹងគ្នា ហើយក៏ត្រូវជាបងប្អូនជីដូនមួយនឹងជនរងគ្រោះ ទៀតផង។
ប្រភពពីសមត្ថកិច្ចខេត្តព្រៃវែងបានឱ្យដឹងថា ជនត្រូវចោទទាំង២នាក់មានទី១៖ ឈ្មោះ នី ថា ភេទប្រុស អាយុ២៧ឆ្នាំ មានទីលំនៅភូមិពារាំង ឃុំរាប ស្រុកពារាំង ខេត្តព្រៃវែង និងទី២៖ ឈ្មោះ នី ធី ភេទប្រុស អាយុ៣២ឆ្នាំ មានទីលំនៅភូមិជាមួយគ្នា។ អ្នកទាំង២ត្រូវបានលោក អ៊ន ប៊ុនលី ចៅក្រមស៊ើបសួរ នៃសាលា ដំបូង ខេត្តព្រៃវែងនៅថ្ងៃទី១ ខែកញ្ញា ឆ្នាំ២០២០ សម្រេចចេញដីកាឃុំខ្លួនដាក់ពន្ធនាគារជាបណ្ដោះអាសន្ន ពីបទហិង្សាដោយចេតនាមានស្ថានទម្ងន់ទោស ដោយមរណៈភាពនៃជនរងគ្រោះតាមមាត្រា ២២៤ នៃក្រមព្រហ្មទណ្ឌ។ ចំណែកជនរងគ្រោះដែលស្លាប់ឈ្មោះ ឈីម ឈុនណា ភេទប្រុស អាយុ២៣ឆ្នាំ មានទីលំនៅភូមិព្រៃខ្លា ឃុំរាប ស្រុកពារាំង ខេត្តព្រៃវែង។
គួររំលឹកថា នៅមុនពេលកើតហេតុ កាលពីព្រលប់ថ្ងៃទី២០ ខែសីហា ឆ្នាំ២០២០ ជនរងគ្រោះនឹងមិត្តភ័ក្ដម្នាក់ទៀតនៅភូមិជាមួយគ្នា បានជិះម៉ូតូឌុបគ្នាចេញពីភូមិក្នុងបំណង ដើរលេង លុះប្រហែលម៉ោង១១យប់ថ្ងៃដដែល ពួកគេបានជិះមកដល់ចំណុចផ្លូវជាតិលេខ៨ ម្ដុំដីឡូត៍មួយកន្លែង ក្នុងភូមិឃុំកើតហេតុខាងលើ ភ្លាមៗនោះស្រាប់ តែលេចមុខជនសង្ស័យ២នាក់ ប្រដាប់ដោយកាំបិតចុងស្រួច មិនស្គាល់មុខបានស្ទុះមកព្រួតគ្នាវាយ នឹងកាប់ចាក់ជនរងគ្រោះ។
ខណៈមិត្តភក្តិជនរងគ្រោះបានរត់គេចបាត់ពីកន្លែង បណ្ដាលឱ្យជនដៃដល់សម្រុកចាក់ជនរងគ្រោះជាច្រើនកាំបិត ធ្លាយខ្នងធ្លាយពោះ បែកក្បាលស្លាប់នៅកន្លែង។ ក្រោយកើតហេតុជនដៃដល់បានរត់គេចមកផ្ទះធ្វើដូចមិនដឹងអ្វីសោះ។
បន្ទាប់មកមិត្តភក្តិជនរងគ្រោះ នឹងគ្រួសារមិនអស់ចិត្តបានតាមហៅរថយន្តដឹកទៅពេទ្យទាំងយប់លុះដល់មន្ទីរពេទ្យ គ្រូពេទ្យប្រាប់ថា ជនរងគ្រោះស្លាប់បាត់ហើយ។ ជាមួយគ្នានោះព្រឹកឡើងថ្ងៃទី២១ ខែសីហា ឆ្នាំ២០២០ សមត្ថកិច្ចចម្រុះបានចុះពិនិត្យនឹងធ្វើកំណត់ហេតុបើកការស្រាវជ្រាវ រហូតឈានដល់ការឃាត់ខ្លួនជនត្រូវចោទ ទាំង២នាក់បងប្អូន នៅភូមិពារាំង ឃុំរាប ស្រុកពារាំង នឹងបានបញ្ជូនខ្លួនទៅតុលាការ កាលពីថ្ងៃទី៣១ ខែសីហា ឆ្នាំ២០២០ ហើយនៅថ្ងៃទី០១ ខែកញ្ញា ឆ្នាំ២០២០ ចៅក្រមស៊ើបសួរនៃសាលាដំបូងខេត្តព្រៃវែង សម្រេចឃុំខ្លួនតែម្ដង៕
ដោយ៖កូឡាប