ភ្នំពេញ៖សម្តេចតេជោ បានថ្លែងថា សុខសប្បាយជាទេបងប្អូនជនរួមជាតិ? តាមទំនៀមទម្លាប់ប្រពៃណីបងប្អូនខ្មែរចិន ថ្ងៃនេះគឺជាថ្ងៃសែនក្បាលទឹក ហើយសម្តេច បានអំពាវនាវដល់ប្រជាពលរដ្ឋឲ្យមានការប្រុងប្រយ័ត្នខ្ពស់បំផុតចំពោះអគ្គិភ័យ ដែលអាចបណ្តាលមកពីការធ្វេសប្រហែសដុតធូបទៀន ក្នុងឱកាសពិធីសែនក្បាលទឹកនេះ។
សម្តេចនាយករដ្ឋមន្ត្រី បានមានប្រសាសន៍បែបនេះនៅលើបណ្តាញសង្គមហ្វេសប៊ុកថា នៅពេលប្រទេសជាតិយើងមានសុខសន្តិភាពពេញលេញ និងរីកចម្រើនមកទល់សព្វថ្ងៃ គឺបានបង្កលក្ខណៈកាន់តែងាយស្រួលឲ្យបងប្អូនប្រជាពលរដ្ឋមានឱកាសប្រារព្ធពិធីបុណ្យទានតូចធំទៅតាមជំនឿ និងទំនៀមទម្លាប់ប្រពៃណីសាសនារៀងៗខ្លួនដោយសេរី ។
ទោះជាយ៉ាងណាក៏ដោយ សូមបងប្អូនប្រជាពលរដ្ឋ ត្រូវតែមានការប្រុងប្រយ័ត្នខ្ពស់បំផុតចំពោះអគ្គិភ័យ ដែលអាចបណ្តាលមកពីការធ្វេសប្រហែសដុតធូបទៀន ក្នុងឱកាសពិធីសែនក្បាលទឹកនេះ ។
ទន្ទឹមនឹងនេះដែរ សូមបងប្អូនប្រជាពលរដ្ឋមានអនាម័យក្នុងការរស់នៅ ហើយមើលថែការពារសុខភាពជាប់ជានិច្ចកុំឲ្យឆ្លងជំងឺកូវីដ-១៩ ឲ្យសោះ ដោយឧស្សាហ៍ដុសលាងសម្អាតដៃជាមួយសាប៊ូ ជែល ឬ អាល់កុល និងពាក់ម៉ាសក្នុងពេលចាំបាច់។
សូមជូនពរបងប្អូនជនរួមជាតិជួបតែសេចក្តីសុខចម្រុងចម្រើន និងលាភសំណាងគ្រប់ៗគ្នាកុំបីខាន។ អរគុណសន្តិភាព៕ដោយ៖កូឡាប
